ໃນລະຫວ່າງວັນ 9 -12 ຂອງເດືອນພະຈິກນີ້ ທາງອົງການສະຫະປະຊາຊາດໄດ້ຈັດກອງປະຊຸມຄັ້ງທໍາອິດຂອງບັນດາລັດພາຄີສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ຫລືລະເບີດບອມບີ ຂຶ້ນທີ່ນະຄອນຫຼວງວຽງຈັນ ສປປ ລາວ ໂດຍໄດ້ມີ 119 ປະເທດເຂົ້າຮວ່ມ ຮວມທັງກຸ່ມອົງກອນທີ່ບໍ່ຂຶ້ນກັບລັດຖະບານຈຳນວນຫຼວງຫຼາຍ ແລະສ່ວນບຸກຄົນນຳ ຊຶ່ງຈຸດປະສົງຫຼັກຂອງກອງປະຊຸມ ກໍເພື່ອຢາກຈະໃຫ້ເຫັນເຖິງຄວາມຮ້າຍແຮງຂອງລະເບີດລູກຫວ່ານ ທີ່ມີຜົນກະທົບຢ່າງສາຫັດຕໍ່ປະຊາຊົນລາວ ຍ້ອນວ່າ ສປປ ລາວ ເປັນປະເທດທີ່ຖືກລູກລະເບີດປະເພດນີ້ຖີ້ມໃສ່ຫຼາຍທີ່ສຸດໃນໂລກ. ແລະມື້ນີ້ ທາງ VOA ໄດ້ສໍາພາດກັບທ່ານ ຢົ້ງ ຈັນທະລັງສີ ເອກອັກຄະລັດຖະທູດລາວປະຈຳນະຄອນເຈນີວາ ສະວີດເຊີແລນ ທີ່ໄດ້ເຂົ້າຮ່ວມໃນກອງປະຊຸມຄັ້ງນີ້ ຊຶ່ງທ່ານໄດ້ໃຫ້ຄວາມກະຈ່າງແຈ້ງກ່ຽວກັບກອງປະຊຸມ ໃນການໂອ້ລົມກັບ VOA ຜ່ານທາງໂທລະສັບ ຈາກນະຄອນຫຼວງວຽງຈັນ ດັ່ງຕໍ່ໄປນີ້:
"ຂ້າພະເຈົ້າຄິດວ່າວຽກງານການເກັບກູ່ລະເບີດນີ້ ພວກເຮົາໄດ້ດໍາເນີນຄົບຂັ້ນ
ຕອນໄປພ້ອມໆກັນ ທັງໆທີ່ວ່າແຕ່ກີ້ມານີ້ ພວກເຮົາມີຄວາມຄວາມຄິດຄວາມສາ
ມາດຈໍາກັດທາງດ້ານການເງິນ ແຕ່ພວກເຮົາເຮັດຄຽງຄູ່ກັບການຊອກຫາ ທຳ ລາຍແລະການຊ່ອຍເຫຼືອໃຫ້ແກ່ພວກທີ່ບາດເຈັບ. ພ້ອມກັນນັ້ນພວກເຮົາດໍາເນີນ
ໂຄສະນາຊວນເຊື່ອ ຢູ່ໃນແບບວ່າຊຸມຊົນ ຢ່າງກ້ວາງຂວາງທີ່ສຸດ ເປັນຕົ້ນແມ່ນ
ເຂົ້າໃນທຸກໆໂຮງຮຽນ ໂດຍການສາທິດລະຄອນຕຸກກະຕາ ແມ່ນພວກເຮົາດໍາ ເນີນມາເປັນລະບົບມາແລ້ວ ຖ້າວ່າສາກົນນີ້ຊ່ວຍເຫຼືອເພີ່ມງົບະມານຂຶ້ນຕື່ມນີ້
ຂ້າພະເຈົາຄິດວ່າ 4-5 ແບບແຜນ (compoments) ອັນນີ້ລະ ຕ້ອງໄດ້ຮັບ
ການເສີມຂະຍາຍແລະດໍາເນີນໄປຄຽງຄູ່ກັນເລີຍ.”
ໃນບັນດາອົງການບໍ່ຂຶ້ນກັບລັດຖະບານທີ່
ໄດ້ໄປຮ່ວມໃນກອງປະຊຸມຄັ້ງນີ້ ກໍມີອົງການ
ບໍ່ຫາຜົນກໍາໄລ Legacy of War ຫລືອົງ
ການມໍລະດົກຕົກທອດຈາກສົງຄາມ ທີ່ເນ້ນ
ໜັກເລື່ອງຜົນກະທົບຈາກເສດເຫຼືອຂອງສົງ
ຄາມໂດຍຕົງ ໂດຍມີ ຈັນນະພາ ຄໍາວົງສາ
ຜູ້ອຳນວຍການຂອງອົງການເປັນຜູ້ຕາງໜ້າ. ຈັນນະພາໄດ້ກ່າວເຖິງຄວາມສໍາຄັນ
ໃນການມີໜ້າໃນຄັ້ງນີ້ ວ່າ:
"ກອງປະຊຸມນີ້ຈັດຂຶ້ນເພື່ອໃຫ້ມີການໂອ້ລົມສົນທະນາກັນກ່ຽວກັບວ່າ ຄວນຈັດຕັ້ງ
ປະຕິບັດສົນທິສັນຍານີ້ແບບໃດເພື່ອໃຫ້ທຸກຂໍ້ກໍານົດແລະກົດໝາຍທີ່ໄດ້ວາງອອກ
ມານັ້ນໄດ້ຮັບການຈັດຕັ້ງປະຕິບັດ ຕົວຢ່າງເຊັ່ນ: ການເກັບກູ້ລະເບີດນີ້ຈະໃຊ້
ເວລາດົນປານໃດແລະຈະທໍາລາຍອາວຸດນີ້ຢ່າງໃດ? ຈະໃຫ້ການຊ່ອຍເຫຼືອພວກ
ທີ່ເຄາະຮ້າຍດ້ວຍວິທີໃດແລະຈະໃຫ້ຂໍ້ມູນແກ່ປະຊາຊົນ, ກະຈາຍຄວາມຮູ້ຕ່າງໆ
ກ່ຽວກັບອັນຕະລາຍຂອງລະເບີດທີ່ຍັງບໍ່ທັນແຕກ ແລະຜົນກະທົບທີ່ອັນຕະລາຍ
ເຖິງຂັ້ນຕາຍນັ້ນແນວໃດ ແລະເງິນທຶນສໍາລັບດໍາເນີນໂຄງການນີ້ ແມ່ນຈະມາ
ຈາກໃສເພື່ອຈະໃຫ້ບັນລຸເປົ້າໝາຍທີ່ວາງໄວ້ ແລະການໂອ້ລົມສົນທະນາກັນນີ້
ຈະກວມເອົາ 20 ກວ່າປະເທດທີ່ຖືກກະທົບໂດຍລະເບີດ bombie ນີ້ ໂດຍສະ
ເພາະ ສປປ ລາວ ບ່ອນທີ່ຖືກກະທົບຫຼາຍທີ່ສຸດໃນໂລກ."
ກໍຫວັງວ່າໂຄງການເກັບກູ້ລະເບີດແລະໂຄງການບຳບັດຢ່າງອື່ນໃນການຟື້ນຟູອາຊີບ
ການງານແລະວິຖີຊີວິດຂອງພວກເຄາະຮ້າຍ ອັນເນື່ອງມາຈາກລູກລະເບີດຫວ່ານນີ້
ຈະໄດ້ຮັບຜົນປະໂຫຍດແລະມີການພັດທະນາທີ່ດີຂຶ້ນ ຈາກກອງປະຊຸມນາໆຊາດຄັ້ງນີ້
ຊຶ່ງທາງວີໂອເອກໍຈະຕິດຕາມເອົາຂ່າວ ນໍາມາສະເໜີທ່ານໃນຄັ້ງຕໍ່ໆໄປ.
ກະລຸນາຄອຍຕິດຕາມຮັບຟັງໃນລາຍການຊີວິດຊາວລາວໃນຕ່າງແດນ
ຂອງ VOA.
