ນາຍົກລັດຖະມົນຕີຂອງຊີເຣຍ ໄດ້ໂຕນໜີ 2 ເດືອນຫຼັງຈາກໄດ້ຂຶ້ນກໍາຕໍາແໜ່ງ ແລະກ່າວວ່າ ທ່ານຈະໄປສົມທົບກັບຝ່າຍທີ່ຕໍ່ຕ້ານ ປະທານາທິບໍດີ Bashar al-Assad.
ໃນຄໍາຖະແຫລງທີ່ອ່ານອອກໃນນາມຂອງທ່ານ ທາງສະຖານີໂທລະພາບ Al Jazeera ໃນວັນຈັນມື້ນີ້ ທ່ານ Riad Hijab ກ່າວວ່າ ທ່ານໄດ້ໜີອອກມາຈາກ ອັນທີ່ທ່ານເອີ້ນວ່່າ “ອໍານາດປົກຄອງກໍ່ການຮ້າຍແລະເຂ່ນຂ້າປະຊາຊົນ.”
ຄໍາຖະແຫລງເວົ້າວ່າ ທ່ານແລະຄອບຄົວຢູ່ໃນບ່ອນທີ່ປອດໄພ. ບັນດາເຈົ້າໜ້າທີ່ຈໍແດນ ກ່າວວ່າ ທ່ານ Hijab ໄດ້ໂຕນໜີໄປຍັງຈໍແດນ.
ໂທລະພາບຂອງລັດຊີເຣຍລາຍງານຂ່າວວ່າ ທ່ານ Hijab ໄດ້ຖືກໄລ່ອອກ ແລະຜູ້ຮອງຂອງທ່ານ ຄືທ່ານ Omar Ghalawanji ໄດ້ຂຶ້ນມາກໍາໜ້າທີ່ແທນ.
ຂ່າວດັ່ງກ່າວນີ້ມີຂຶ້ນ ຫຼາຍຊົ່ວໂມງຫຼັງຈາກສື່ຂອງລັດລາຍງານວ່າ ໄດ້ເກີດເຫດ ລະເບີດຂຶ້ນ
ໃນຕຶກຂອງສະຖານີໂທລະພາບໃນເມືອງຫລວງ Damascus ທີ່ພາ ໃຫ້ຫລາຍຄົນ ໄດ້ຮັບບາດເຈັບ.
ສະຖານນີໂທລະພາບດັ່ງກ່າວຍັງໄດ້ສືບຕໍ່ຖ່າຍທອດ ຫຼັງຈາກເກີດເຫດລະເບີດ ທີ່ໄດ້ເຮັດໃຫ້ຊັ້ນທີ່ 3 ຂອງຕຶກ ເພພັງເສຍຫາຍ.
ສະຖານີໂທລະພາບເອກກະຊົນແຫ່ງນຶ່ງ ທີ່ເຂົ້າຂ້າງທາງລັດຖະບານ ຊຶ່ງກໍໄດ້ຖືກ ລະເບີດຮ້າຍແຮງເຖິງຂັ້ນມີຜູ້ເສຍຊີວິດໃນເດືອນມິຖຸນານັ້ນ ໄດ້ຖ່າຍທອດໃຫ້ເຫັນພາບຝາພະໜັງທີ່ຫັກພັງ ສາຍໄຟຫ້ອຍລົງມາຈາກເພດານທີ່ຍຸບລົງ ແລະພວກຜູ້ຄົນ ຍ່າງຜ່ານ ທາງຍ່າງທີ່ເຕັມໄປດ້ວຍຄັວນໄຟ.
ບັນດານັກເຄື່ອນໄຫວທີ່ຕໍ່ຕ້ານລັດຖະບານຊີເຣຍ ລາຍງານວ່າ ການໂຈມຕີຂອງກອງ ກໍາລັງຂອງລັດຖະບານ ຍັງດໍາເນີນສືບຕໍ່ມາ ໃນເມືອງພາກເໜືອ Aleppo ໃນວັນຈັນ ມື້ນີ້.
ກຸ່ມສັງເກດການສິດທິມະນຸດຊີເຣຍ ກ່າວວ່າ ກອງທັບຊີເຣຍຍັງລະດົມຍິງໃສ່ຫຼາຍໆ ຄຸ້ມໃນເມືອງ Aleppo ແລະວ່າ ມີພົນລະເຮືອນເກືອບ 30 ຄົນເສຍຊີວິດ ໃນທົ່ວປະເທດ.
