ລິ້ງ ສຳຫລັບເຂົ້າຫາ

ວັນອັງຄານ, ໒໑ ພຶດສະພາ ໒໐໒໔

ຊາຍຄົນນຶ່ງຖືກກ່າວຫາ ຊ່ອຍວາງແຜນໂຈມຕີ ງານປະກວດ ກາຕູນ ຢູ່ເທັກຊັສ


ພາບຖ່າຍນີ້ ທີ່ບໍ່ລະບຸວັນເວລາ ຂອງ ນາຍ Abdul Malik Abdul Kareem ໃນຂະນະທີ່ເຈົ້າໜ້າທີ່ຮັກສາກົດໝາຍ ທຳການ ບັນທຶກຕົວເຂົ້າຄຸມຂັງ ໃນເມືອງ Maricopa, ລັດ Arizona.
ພາບຖ່າຍນີ້ ທີ່ບໍ່ລະບຸວັນເວລາ ຂອງ ນາຍ Abdul Malik Abdul Kareem ໃນຂະນະທີ່ເຈົ້າໜ້າທີ່ຮັກສາກົດໝາຍ ທຳການ ບັນທຶກຕົວເຂົ້າຄຸມຂັງ ໃນເມືອງ Maricopa, ລັດ Arizona.

ຊາຍ​ຄົນ​ນຶ່ງ ທີ່ຖືກ​ກ່າວ​ຫາ​ວ່າ ​ໃຫ້ການ​ຊ່ອຍ​ເຫຼືອ ໃນການວາງ​
ແຜນການ​ໂຈມ​ຕີ ຕໍ່​ງານ​ແຂ່ງຂັນແຕ້ມຮູບກາ​ຕູນ​ພະ​ສາ​ສະ​ດາ
Muhammad ຂອງ​ສາ​ສະໜາ​ອິສລາມ ຢູ່​ໃນ​ລັດ Texas ​ເມື່ອ
​ເດືອນ​ແລ້ວ​ນີ້ ​ໄດ້​ປາກົດ​ໂຕ ຢູ່​ທີ່​ສານ​ລັດຖະບານ​ກາງ ​ແຫ່ງນຶ່ງ​
ໃນ​ວັນ​ອັງຄານ​ວານ​ນີ້.

ນາຍ Abdul Malik Abdul Kareem ​ໄດ້​ຖືກ​ຈັບ​ກຸມ ​ເມື່ອ
​ອາທິດແລ້ວ​ນີ້ ຢູ່​ທີ່​ນະຄອນ Phoenix ລັດ Arizona ຢູ່​ທາງ
​ພາກ​ຕາ​ເວັນຕົກ​ສຽງ​ໃຕ້​ຂອງ​ສະຫະ​ລັດ. ອີງ​ຕາມ​ສຳ​ນວນຂອງ
​ສານນາຍ Kareem ໄດ້ໃຫ້ການ​ລ້ຽງ​ດູ ມື​ປືນ​ສອງ​ຄົນ ຄື ທ້າວ
Elton Simpson ​ແລະ ທ້າວ Nadir Soofi ຢູ່​ທີ່​ເຮືອນ ​ຂອງ
​ຜູ້ກ່ຽວ ຕັ້ງ​ແຕ່​ເດືອນ​ມັງກອນ ​ແລະ ​ໄດ້​ປຶກສາ​ຫາລື​ກັນ ​ເລື້ອ​ງ​ການປະຕິບັດການ​ໂຈມ​ຕີ.
ຜູ້ກ່ຽວ​ຖືກ​ ​ຟ້ອງ​ໃນ​ຂໍ້​ຫາ ສະໜອງ​ອາວຸດຫຼາຍຢ່າງ​ ໃຫ້​ແກ່ທ້າວ Simpson ​ແລະ ທ້າວ
Soofi ​ເພື່ອ​ນຳ​ໃຊ້​ໃນ​ການ​ໂຈມ​ຕີ ພ້ອມ​ກັນນັ້ນ ກໍສົມຮູ້​ຮ່ວມ​ຄິດ ​ແລະ ໄດ້ຕົວະ​ເຈົ້າໜ້າ​ທີ່
ລັດຖະບານ​ກາງ.

ທ້າວ Simpson ​ແລະ ທ້າວ Soofi ທີ່ເຊົ່າຫໍພັກ apartment ຢູ່ນຳກັນ ​ໃນ​ນະຄອນ Phoenix ​ໄດ້​ຂັບ​ລົດ​ໄປ ​ເມືອງ Garland ລັດ Texas ​ແລະ ​ໄດ້​ເປີດ​ສາກ​ຍິງປືນ​ເຂົ້າ​
ໃສ່​ສູນ​ຊຸມ​ຊົນ ບ່ອນ​ທີ່​ມີ​ການ​ຈັດ​ງານແຂ່ງຂັນ​ແຕ້ມ​ກາ​ຕູນ​ພະ​ສາ​ສະ​ດາ​ຂອງ​ສາສະໜາ​ອິສລາມ. ພວກ​ເຂົາ​ໄດ້​ຍິງ​ຍາມ​ຄົນ​ນຶ່ງ​ບາດ​ເຈັບກ່ອນ​ທີ່​ພວກ​ເຂົາຖືກ​ເຈົ້າໜ້າ​ທີ່​ຕຳຫຼວດ​
ເມືອງ Garland ຍິງ​ຕາຍ.

​ໃນ​ລະຫວ່າງ​ຮັບຟັງຄຳໃຫ້ການ ເມື່ອ​ວັນ​ອັງຄານ​ວານ​ນີ້ ພະນັກງານ ອົງການ​ສັນຕິ​ບານ​ກາງສະຫະລັດຫຼື FBI ທ່ານ​ນຶ່ງ​ໃຫ້ການ​ວ່າ ນາຍ Kareem ຢາກ​ເຂົ້າຮ່ວມ​ອົງການ​ກໍ່ການ​ຮ້າຍລັດ​ອິສລາມ ​ແລະ ຢາກ​ປະຕິບັດ​ການ​ໂຈມ​ຕີ ການ​ແຂ່ງຂັນ​ຊິງ​ແຊ້ມ Super Bowl ຂອງ​ສະຫະ​ພັນ ຟຸດ​ບອນ​ແຫ່ງ​ຊາດ ອາ​ເມ​ລິ​ກັນ ຫຼື NFL ​ເຊິ່ງ ​ໄດ້​ຈັດ​ຂຶ້ນຢູ່​ໃນ​ລັດ Arizona ​ເມື່ອ​ເດືອນ ກຸມພາ​ຜ່ານ​ມາ.

ນາຍ Kareem ​ໄດ້​ຮ້ອງຮຽນຕໍ່ສານ​ວ່າ ຕົນບໍ່​ຜິດ ໃນ​ຂໍ້​ກ່າວ​ຫາ​ຕ່າງໆເຫຼົ່ານັ້ນ. ຜູ້​ພິພາກ ສາໄດ້​ສັ່ງ​ໃຫ້​ກັກ​ຂັງ​ນາຍ Kareemໂດຍບໍ່ໃຫ້ປະກັນໂຕ.

XS
SM
MD
LG