Assad ວ່າ ທະຫານຊີເຣຍ ກໍາລັງພົວພັນ ໃນບັ້ນສູ້ລົບ ທີ່ຈະກໍານົດຊະຕາກໍາ ຂອງຊາດ

ປະທານາທິບໍດີ ຊີ​ເຣຍ ທ່ານ Bashar al-Assad ກ່າວ​ວ່າ ກອງທັບ​ຂອງ​ທ່ານກໍາລັງ​ສູ້​ລົບ​
ກັບພວກ​ກະບົດ ​ໃນ​ການ​ຕໍ່ສູ້ທີ່​ຈະກໍານົດ​ຊະຕາ​ກໍາ​ຂອງ​ປະ​ເທດ.

ທ່ານ​ Assad ​ໄດ້ຊົມ​ເຊີຍ ກໍາລັງ​ຂອງ​ລັດຖະບານ ຢູ່​ໃນ​ຄໍາ​ຖະ​ແຫລ​ງ​ໃນ​ວັນ​ພຸດມື້​ນີ້ ​ໃນ​ຂະ​ນະ​
ທີ່​ຄວາມ​ຮຸນ​ແຮງ​ຍັງມີ​ຢູ່​ສື​ບຕໍ່​ມາ ​ໃນ​ທົ່ວ​ປະ​ເທດ.

ອົງການ​ສິ້​ງຊອມ​ສິດ​ທິມະນຸດຊີ​ເຣຍ ທີ່​ມີ​ສໍານັກງານ​ຢູ່ປະ​ເທດ​ອັງກິດ ກ່າວ​ວ່າ​ ຢ່າງ​ໜ້ອຍ
ນຶ່ງ​ຄົນ​ໄດ້​ເສຍ​ຊີວິດ ໃນການ​ຕໍ່ສູ້​ກັນ​ລະຫວ່າງພວກ​ກະບົດ ​ແລະ​ ກໍາລັງ​ຮັກສາ​ຄວາມ​ປອດ
ໄພ ຢູ່​ໃນຄຸ້ມນຶ່ງທີ່​ມີ​ຊາວຄຣິສ ​ອາໄສຢູ່ເປັນ​ສ່ວນ​ໃຫ່ຍ​ໃນ​ກຸງ Damascus. ຜ່ານ​ມາ ການ​
ສູ້​ລົບ​ແມ່ນ​ບໍ່​ຄອຍຈະ​ມີຂຶ້ນ​ຢູ່​ໃນ​ເຂດ​ຂອງ ຊາວຄຣິສ ໃນ​ເມືອງ​ຫລວງ ​ໃນ​ລະຍະ 17 ​ເດືອນ​
ຂອງ​ການ​ລຸກ​ຮື​ຂື້ນຕໍ່ຕ້ານ​ການ​ປົກຄອງ​ຂອງ ທ່ານ Assad ນັ້ນ.

ຫ້ອງການ​ຂອງ​ສະຫະ​ປະຊາ​ຊາດ​ໃນ​ຊີ​ເຣຍກ່າວໃນ​ວັນ​ພຸດ​ມື້​ນີ້ວ່າ ຕົນ​ໄດ້​ຮັບ​ການ​ຢືນຢັນ​ວ່າ
ດຽວ​ນີ້ ຝ່າຍ​ກະບົດ​ແມ່ນ​ມີ​ອາວຸດ​ໜັກ​ແລ້ວ ​ໂຮມ​ທັງ​ລົດ​ຖັງ​ນໍາ. ​ໂຄສົກ​ຫ້ອງການ ສປຊ ທ່ານ
​ນາງ Sausan Ghosheh ຍັງ​ກ່າວ​ອີກ​ວ່າ ​ໃນ​ວັນ​ອັງຄານ​ນັ້ນ ຄະນະ​ສັງ​ເກດ​ການ​ຂອງ​
ສະຫະ​ປະຊາ​ຊາດ​ໄດ້​ເຫັນ​ເຮືອບິນ​ລົບ​ຂອງ​ຝ່າຍ​ລັດຖະບານ ລະດົມ​ຍິງ​ໃສ່​ເມືອງ Aleppo
​ເປັນ​ເທື່ອ​ທໍາ​ອິດ.