ສັດຕູຕ່າງຊາດຂອງອາເມຣິກາ ຈະພະຍາຍາມຄອບງຳການເລືອກຕັ້ງ ສະຫະລັດ ທີ່ກຳລັງຈະມາເຖິງນີ້ອີກຄັ້ງນຶ່ງ, ເຈົ້າຫນ້າທີ່ຄວາມໝັ້ນຄົງລະດັບສູງ ໄດ້ເຕືອນ ສະມາຊິກສະພາສູງໃນວັນພຸດວານນີ້, ໂດຍນໍາໃຊ້ປະໂຫຍດຈາກນະວັດຕະກໍາຫລ້າ ສຸດໃນປັນຍາປະດິດ ເພື່ອເຜີຍແຜ່ຂໍ້ມູນທີ່ບໍ່ຖືກຕ້ອງທາງອິນເຕີເນັດ, ເຮັດໃຫ້ຜູ້ລົງຄະ ແນນສຽງເຂົ້າໃຈຜິດ ແລະກັດເຊາະທໍາລາຍຄວາມໄວ້ວາງໃຈໃນລະບອບປະຊາທິປະໄຕ, ອີງຕາມອົງການຂ່າວ ເອພີ.
ແຕ່ສະຫະລັດໄດ້ປັບປຸງຄວາມສາມາດຂອງຕົນຢ່າງຫຼວງຫຼາຍ ໃນການປົກປ້ອງຄວາມປອດໄພໃນການເລືອກຕັ້ງ ຕະຫຼອດຈົນເຖິງການກຳນົດ ແລະຕ້ານການໂຄສະນາເຜີຍແຜ່ຂ່າວທີ່ບໍ່ເປັນຄວາມຈິງຈາກຕ່າງປະເທດ ນັບແຕ່ປີ 2016 ເປັນຕົ້ນາ, ເມື່ອຣັດເຊຍໄດ້ພະຍາຍາມທີ່ຈະສະແຫວງຫາອິດທິພົນໃນການເລືອກຕັ້ງ, ຜູ້ອຳນວຍການໜ່ວຍງານສືບລັບແຫ່ງຊາດຂອງສະຫະລັດ ທ່ານ ເອວຣີລ ເຮນສ໌ (Avril Haines) ໄດ້ໃຫ້ການຕໍ່ຄະນະກຳມະການສືບລັບຂອງສະພາສູງ.
ການເຕືອນຫຼ້າສຸດຈາກເຈົ້າຫນ້າທີ່ຮັກສາຄວາມໝັ້ນຄົງ ມີຂຶ້ນເມື່ອຄວາມກ້າວຫນ້າໃນ AI ເຮັດໃຫ້ການສ້າງຮູບພາບ, ວີດີໂອ ແລະສຽງທີ່ຄ້າຍຄືກັບມີຊີວິດຈິງ ເປັນເລື້ອງງ່າຍ ແລະ ມີລາຄາຖືກກວ່າທີ່ເຄີຍມີມາ ເຊິ່ງສາມາດຫຼອກລວງໄດ້ແມ່ນແຕ່ຜູ້ລົງຄະແນນສຽງທີ່ ສະຫລາດທີ່ສຸດ. ເຄື່ອງມືອື່ນໆໃນການສະໜອງຂໍ້ມູນທີ່ບໍ່ຖືກຕ້ອງ ປະກອບມີສື່ມວນ ຊົນຂອງລັດ, ຜູ້ມີອິດທິພົນອອນໄລນ໌ ແລະເຄືອຂ່າຍຂອງບັນຊີຜູ້ໃຊ້ປອມທີ່ສາມາດຂະ ຫຍາຍເນື້ອໃນທີ່ບໍ່ຖືກຕ້ອງ ແລະເຮັດໃຫ້ເຂົ້າໃຈຜິດຢ່າງໄວວາ.
ເຈົ້າໜ້າທີ່ຮັກສາຄວາມໝັ້ນຄົງກ່າວວ່າ ຣັດເຊຍ, ຈີນ ແລະ ອີຣ່ານ ຍັງຄົງເປັນຜູ້ດຳ ເນີນການຫຼັກທີ່ຕ້ອງການແຊກແຊງການເລືອກຕັ້ງປີ 2024, ແຕ່ຍ້ອນຄວາມກ້າວໜ້າດ້ານເທັກໂນໂລຈີຂອງປະເທດອື່ນ ຫຼືແມ່ນແຕ່ບັນດາກຸ່ມຕ່າງໆພາຍໃນປະເທດ ອາດພະຍາ ຍາມຍົກລະດັບການໂຄສະນາເຜີຍແຜ່ທີ່ມີຄວາມຊັບຊ້ອນຂອງຕົນ ກ່ຽວກັບການສະ ໜອງຂໍ້ມູນທີ່ບໍ່ຖືກຕ້ອງ.
ທ່ານ ເຮນສ໌ (Haines) ກ່າວວ່າ ຣັດເຊຍຍັງຄົງເປັນ "ໄພຂົ່ມຂູ່ຈາກຕ່າງປະເທດທີ່ມີການເຄື່ອນໄຫວຫຼາຍທີ່ສຸດຕໍ່ການເລືອກຕັ້ງຂອງພວກເຮົາ", ໂດຍນໍາໃຊ້ສື່ມວນຊົນຂອງລັດ ແລະຜູ້ມີອິດທິພົນທາງອອນລາຍຂອງຣັດເຊຍ ເພື່ອທຳລາຍຄວາມໄວ້ວາງໃຈໃນສະຖາບັນຊາທິປະໄຕ ແລະ ການສະໜັບສະໜູນຂອງສະຫະລັດຕໍ່ຢູເຄຣນ.
ຟໍຣັມສະແດງຄວາມຄິດເຫັນ