ສັນນິບາດຊາດອາຫຣັບກໍາລັງລໍຖ້າ ໃຫ້ຊີເຣຍຕອບຕໍ່ແຜນການນຶ່ງທີ່ທາງສັນນິບາດໄດ້
ສະເໜີໄປ ທີ່ໃຫ້ຊີເຣຍຢຸດເຊົາປາບປາມການລຸກຮືຂຶ້ນຂອງປະຊາຊົນທີ່ຄັດຄ້ານລັດຖະບານ
ທີ່ໄດ້ເອົາຊີວິດຜູ້ຄົນໄປຢ່າງຫລວງຫລາຍນັ້ນ.
ນາຍົກລັດຖະມົນຕີປະເທດກາຕ້າ ທ່ານ Hamad bin Jasim al-Thani ກ່າວວ່າ ໄດ້ມີການສົ່ງຂໍ້ສະເໜີທີ່ເອົາຈິງເອົາຈັງແລະໃນທາງບວກ ໃຫ້ຊີເຣຍໃນວັນອາທິດວານນີ້ ຫລັງຈາກທ່ານນໍາພາການເຈລະຈາກັນທີ່ນະຄອນຫລວງໂດຮາຂອງກາຕ້ານັ້ນ. Sheikh Hamad ກ່າວວ່າ ສັນນິບາດຊາດອາຫຣັບຄາດວ່າລັດຖະບານ Damascus ຈະຕອບຂໍ້ສະເໜີຂອງພວກຕົນໃນວັນຈັນມື້ນີ້.
ບໍ່ໄດ້ມີການເປີດເຜີຍລາຍລະອຽດຂອງຂໍ້ສະເໜີໃຫ້ຮູ້ ແຕ່ຄວາມພະຍາຍາມໃນຄັ້ງໆກ່ອນຂອງສັນນິບາດ ເພື່ອໄກ່ເກ່ຍໃຫ້ມີຂໍ້ຕົກລົງກັນກັບກຸງ Damascus ນັ້ນ ແມ່ນຮວມທັງຄໍາຮຽກຮ້ອງໃຫ້ປະທານາທິບໍດີຊີເຣຍ ທ່ານ Bashar al-Assad ຖອນກໍາລັງອອກ ແລະໃຫ້ເລື່ອນວັນເລືອກຕັ້ງປະທານາທິບໍດີນັ້ນ ຂຶ້ນມາໄວກວ່າແຕ່ກ່ອນ.
Sheikh Hamad ກ່າວວ່າ ທາງສັນນິບາດຈະຕັດສິນໃຈວ່າ ຈະດໍາເນີນການແບບໃດກ່ຽວກັບຊີເຣຍໃນວັນພຸດສັບປະດານີ້ ຫລັງຈາກໄດ້ຮັບຄໍາຕອບຈາກລັດຖະບານທ່ານ Assad ແລ້ວ.
ສັນນິບາດຊາດອາຫຣັບທີ່ມີ 22 ປະເທດເປັນສະມາຊິກໄດ້ທໍາການຕໍາໜິຕິຕຽນຢ່າງໜັກຂຶ້ນ
ຕໍ່ຊີເຣຍ ຫລັງຈາກພວກນັກເຄື່ອນໄຫວດ້ານສິດທິມະນຸດກ່າວວ່າ ພວກກໍາລັງຮັກສາຄວາມ
ປອດໄພຂອງຊີເຣຍໄດ້ຍິງປືນແລະສັງຫານພວກປະທ້ວງຕໍ່ຕ້ານລັດຖະບານຫລາຍສິບຄົນ
ໃນວັນສຸກຜ່ານມານີ້.
ໃນຂະນະດຽວກັນ ປະທານາທິບໍດີຂອງຊີເຣຍເຕືອນວ່າ ພາກຕາເວັນອອກກາງຈະລຸກໄໝ້
ເປັນໄຟ ຖ້າປະຊາຄົມນາໆຊາດເຂົ້າແຊກແຊງໃນວິກິດການທີ່ໄດ້ດໍາເນີນມາໄດ້ 7 ເດືອນແລ້ວ
ຢູ່ໃນຊີເຣຍນັ້ນ.
