ພວກນັກເຄຶ່ອນໄຫວຝ່າຍຄ້ານຂອງຊີເຣຍກ່າວວ່າ ພວກເຂົາເຈົ້າຈະໃຊ້ການປະທ້ວງຕ່າງໆ
ທີ່ໄດ້ວາງແຜນໄວ້ແລ້ວສໍາລັບວັນສຸກນີ້ ເພື່ອຮຽກຮ້ອງໃຫ້ສັນນິບາດຊາດອາຫຣັບ ໂຈະ
ການເປັນສະມາຊິກຂອງຊີເຣຍ ໄວ້ຊົ່ວຄາວ.
ການເຄຶ່ອນໄຫວດັ່ງກ່າວນີ້ມີຂຶ້ນໃນຂະນະທີ່ພວກສະມາຊິກສັນນິບາດຊາດອາຫຣັບ 22
ປະເທດ ຕຽມປະຊຸມສຸກເສີນທີ່ນະຄອນຫລວງໄຄໂຣປະເທດອີຈິບ ໃນວັນເສົາມື້ອື່ນນີ້
ເພື່ອປຶກສາຫາລືເລື້ອງຂໍ້ຕົກລົງທີ່ພັງລົງກັບດາມັສກັສ ເພື່ອໃຫ້ຊີເຣຍຍຸຕິການກວາດລ້າງ
ພວກຄັດຄ້ານລັດຖະບານ ຢ່າງໂຫດຮ້າຍປ່າເຖື່ຶອນນັ້ນ.
ໃນຕົ້ນເດືອນນີ້ ຊີເຣຍໄດ້ຕົກລົງຕໍ່ແຜນການ ທີ່ຮຽກຮ້ອງໃຫ້ຖອນກໍາລັງຮັກສາຄວາມ
ປອດໄພອອກໄປຈາກຖະໜົນຫົນທາງ ແລະໃຫ້ທໍາການເຈລະຈາກັບພວກຝ່າຍຄ້ານ ແຕ່
ພວກນັກເຄຶ່ອນໄຫວແລະພວກເຫັນເຫດການລາຍງານວ່າ ຄວາມຮຸນແຮງຍັງມີຢູ່ຕໍ່ໄປ.
ກຸ່ມສິ້ງຊອມສິດທິມະນຸດ Human Rights Watch ກໍໄດ້ກ່າວຄໍາຮຽກຮ້ອງໃຫ້ໂຈະການ
ເປັນສະມາຊິກສັນນິບາດຊາດອາຫລັບຂອງຊິເຣບໄວ້ຄືກັນ.ໃນລາຍງານສະບັບນຶ່ງທີ່ອອກ
ໃນວັນສຸກມື້ນີ້ ກຸ່ມສິ້ງຊອມສິດທິມະນຸດກ່າວວ່າ ດາມັສກັສ ອາດມີຄວາມຜິດໃນຂໍ້ຫາກໍ່
ອາຊະຍາກໍາຕໍ່ຕ້ານມະນຸດຊາດ ຍ້ອນໄດ້ທໍາການທໍລະມານ ແລະການເຂັ່ນຂ້າທີ່ບໍ່ຖືກຕ້ອງ
ຕາມກົດໝາຍ ຕາມທີ່ມີການກ່າວຫານັ້ນ.
ພວກນັກເຄຶ່ອນໄຫວກ່າວວ່າ ມີຄົນຖືກສັງຫານຢ່າງໜ້ອຍ 33 ຄົນ ໃນວັນພະຫັດວານນີ້.
ຊຶ່ງພວກເຂົາເຈົ້າກ່າວວ່າ ການເສຍຊີວິດຫລາຍໆຄົນນັ້ນ ແມ່ນເກີດຂຶ້ນທີ່ເຂດເມືອງ Hom
ອັນເປັນບ່ອນທີ່ພວກກໍາລັງຮັກສາ ຄວາມປອດໄພໄດ້ທໍາການບຸກຄົ້ນຫາຕົວພວກຄັດຄ້ານ
ລັດຖະບານທັງ ຫລາຍນັ້ນ. ພວກນັກເຄຶ່ອນໄຫວກ່າວວ່າ ທະຫານຊີເຣຍຈໍານວນນຶ່ງຖືກ
ສັງຫານ ໃນເຫດການໂຈມຕີ.
