ບັນດາເຈົ້າໜ້າທີ່ອາວຸໂສຈາກ 21 ປະເທດ ກໍາລັງພົບປະກັນທີ່ລັດຮາວາຍໃນອາທິດນີ້ ໃນກອງປະຊຸມສຸດຍອດປະຈໍາປີຂອງສະພາຮ່ວມມືເສດ ຖະກິດແຫ່ງຂົງເຂດເອເຊຍປາຊິຟິກ ຫລືເອເປັກ. ໃນວັນພະຫັດມື້ນີ້ແລະວັນສຸກມື້ອື່ນ ທ່ານນາງ ຮິລແລຣີ ຄລິນຕັນ ລັດຖະມົນຕີຕ່າງປະເທດ ແລະທ່ານ Timothy Geithner ລັດຖະມົນຕີກະຊວງການເງິນສະຫະລັດ ຈະພົບປະກັບຄູ່ຕໍາແໜ່ງຂອງພວກທ່ານຈາກປະເທດເຫລົ່ານັ້ນ. ແລະໃນວັນອາທິດ ປະທານາທິບໍດີໂອບາມາ ຈະເປັນເຈົ້າພາບກອງປະຊຸມຂອງພວກຜູ້ນໍາກຸ່ມເອເປັກ.
ນັກຂ່າວວີໂອເອລາຍງານມາຈາກນະຄອນໂຮໂນລູລູວ່າ ພວກປະທ້ວງທີ່ຄັດຄ້ານຫົວຂໍ້ການຄ້າເສລີຂອງກອງປະຊຸມກໍພາກັນຕຽມອອກໄປປະທ້ວງ ເພື່ອເຜີຍແຜ່ສານຂອງພວກເຂົາເຈົ້າໃຫ້ຮູ້.
ເຈົ້າໜ້າທີ່ທໍານຽບຂາວທ່ານນຶ່ງກ່າວເມື່ອວັນພຸດວານນີ້ວ່າ ກອງປະຊຸມສຸດຍອດເອເພັກຄັ້ງນີ້ແມ່ນກ່ຽວກັບເລຶ່ອງໜ້າວຽກເປັນຫລັກ ແລະວ່າໃນປີ 2010 ພວກປະເທດສະມາຊິກກຸ່ມເອເປັກ ອັນມີໂຮມທັງ ຄານາດາ ຣັດເຊຍ ຈີນ ແລະຍີ່ປຸ່ນ ໄດ້ຊື້ຜະລິດຕະພັນສົ່ງອອກຂອງສະຫະລັດຫລາຍເຖິງ 60 ເປີເຊັນ ແລະຜະລິດພັນສົ່ງອອກເຫລົ່ານັ້ນແມ່ນຄໍ້າຈຸນວຽກງານຂອງອາເມຣິກາເຖິງສີ່ລ້ານວຽກ.
ຄະນະຜູ້ແທນຂອງສະຫະລັດຫວັງທີ່ຈະລົດຜ່ອນສິ່ງກີດຂວາງການຄ້າລົງ ໂດຍສະເພາະຜະລິດຕະພັນພະລັງງານແລະການບໍລິການທີ່ຍືນຍົງຖາວອນ. ນອກນີ້ແລ້ວ ສະຫະລັດຄາດຫວັງວ່າ ຈະປະກາດໂຄງຮ່າງສໍາລັບຂໍ້ຕົກລົງການຄ້າພາຄີຂ້າມປາຊິຟິກ ຫລື TPP ລະຫວ່າງເກົ້າປະເທດທີ່ປະກອບດ້ວຍ ອອສເຕຣເລຍ ມາເລເຊຍ ຫວຽດນາມ ຊີເລ ແລະອີກຫລາຍປະເທດ. ພວກເຈົ້າໜ້າທີ່ສະຫະລັດຫລິງເຫັນພາຄີດັ່ງກ່າວນີ້ ເປັນພື້ນຖານຂອງເຂດການຄ້າເສລີໃນອະນາຄົດ ທີ່ກວມໄປທົ່ວຂົງເຂດປາຊິຟິກນັ້ນ.
ເບິ່ງວີດີໂອລາຍງານທີ່ກ່ຽວຂ້ອງກັນ:
