ລິ້ງ ສຳຫລັບເຂົ້າຫາ

ກຸ່ມ​ເອ​ເພັກ ​ສິ້ນ​ສຸດ​ ກອງ​ປະຊຸມ​ສຸດ​ຍອດ ​ສອງ​ມື້​ແລ້ວ


ທ່ານນາງ ຄຼິນຕັນ (ທີ່ສີ່ຈາກຂວາ) ແລະທ່ານພູຕິນ (ກາງ) ປະທານາທິບໍດີຣັດເຊຍ ໃນງານລ້ຽງຮັບຮອງກຸ່ມເອເພັກ, ວັນທີ 8 ກັນຍາ 2012.
ສະພາ​ການ​ຮ່ວມ​ມື​ເສດຖະກິ​ດຂອງຂົງ​ເຂດ​ເອ​ເຊຍ​ປາຊິ​ຟິກ ຫຼື ກຸ່ມ​ເອ​ເພັກ ທີ່​ປະກອບ​ດ້ວຍສະມາ​ຊິກ 21 ປະ​ເທດ​ນັ້ນ ​ໄດ້​ສິ້ນ​ສຸດ​ກອງ​ປະຊຸມ​ສຸດ​ຍອດ​ສອງ​ມື້​ຂອງ​ພວກ​ເຂົາ​ເຈົ້າ​ໃນ​ວັນ​ອາທິດ​ມື້​ນີ້ ທີ່​ເມືອງ​ທ່າ Vladivostok ປະ​ເທດຣັດ​ເຊຍ.

ກຸ່ມ​ເອ​ເພັກ​ຕົກລົງ​ກັນ​ທີ່​ຈະ​ຕັດ​ພາສີ​ສິນຄ້າ​ນໍາ​ເຂົ້າ ປະ​ເພດເທັ​ກ​ໂນ​ໂລ​ຢີ່ຂຽວ ​ເອົາ​ບາດກ້າວ​ເພື່ອ​ສົ່ງ​ເສີມ​ການ​ເຕີບ​ໂຕ ​ແລະ​ໃຫ້​ມີເສ​ລີ​ພາບ​ດ້ານ ການ​ຄ້າຫຼາຍຂຶ້ນ ​ເພື່ອຕ້ານ​ຢັນ​ບັນຫາ​ຕ່າງໆ​ທີ່​ຮ້າຍ​ແຮງ​ຂຶ້ນ​ໄປ​ນັບ​ມື້ ຍ້ອນວິ​ກິດ​ການ​ໜີ້​ສິນ​ຂອງ​ພາກ​ພື້ນ​ຢູໂຣບ​ນັ້ນ.

ທ່ານ​ນາງ ຮິ​ລ​ແລ​ຣີ ຄຼິນຕັນ ລັດຖະມົນ​ຕີ​ຕ່າງປະ​ເທດ​ສະຫະລັດ ​ກໍ​ໄດ້ ​ເຂົ້າຮ່ວມ​ໃນ​ກອງ​ປະຊຸມ​ສຸດ​ຍອດ​ດັ່ງກ່າວ ​ແລະ​ໄດ້​ລົງ​ນາມ​ກັບ​ທ່ານ Servei Lavrov ລັດຖະມົນຕີຕ່າງປະ​ເທດຣັດ​ເຊຍ ​ໃນສົນທິສັນຍາ​ສະບັບ​ນຶ່ງ​ເພື່ອ​ຍົກ​ລະດັບ​ການ​ຮ່ວມ​ມື​ດ້ານ​ວິທະຍາສາດ ​ລະຫວ່າງສະຫະ ລັດ ແລະຣັດ​ເຊຍ ​ໃນ​ເຂດ​ມະຫາ​ສະມຸດ​ອັນ​ຕາກຕິກ ຢູ່​ຂວັນ​ໂລກ​ໃຕ້.

​ວັນ​ອາທິດ​ມື້​ນີ້ ທ່ານ​ນາງ ຄຼິນຕັນ ​ໄດ້​ຮຽກຮ້ອງ​ໃຫ້​ຍີ່ປຸ່ນ ​ແລະ​ເກົາຫຼີ​ໃຕ້ ຈົ່ງ​ພາກັນ​ຜ່ອນຄາຍ​ອາລົມ​ຂອງ​ພວກ​ຕົນ​ລົງ ​ໃນ​ຄວາມ​ບໍ່​ເຫັນ​ພ້ອມ​ກັນ​ຂອງ​ເຂົາ​ເຈົ້າກ່ຽວ​ກັບ​ໝູ່​ເກາະ​ທີ່​ເປັນ​ຂໍ້​ຂັດ​ແຍ້​ງກັນ ທີ່​ເຮັດ​ໃຫ້​ທັງ​ສອງປະ​ເທດ​ພັນທະ​ມິດ​ຂອງ​ສະຫະລັດ​ ບໍ່​ລົງ​ຮອຍ​ກັນ.

ທ່ານ Vladimir Putin ປະທານາທິບໍດີຣັດ​ເຊຍ ​ໄດ້​ໃຊ້​ກອງ​ປະຊຸມ​ສຸດ ຍອດ​ດັ່ງກ່າວ​ເພື່ອ​ຊຸກຍູ້​ສົ່ງ​ເສີມ​ຄວາມ​ໄຝ່ຝັນ​ຂອງ​ຣັ​ດ​ເຊຍ ທີ່​ຢາກ​ຍົກ​ລະ ດັບໂຄງ​ລ່າງ​ພື້ນຖານ​ດ້ານ​ການ​ຂົນ​ສົ່ງ​ຢູ່​ທົ່ວທັງ​ສອງ​ທະວີບ​ ທີ່​ຜືນ​ແຜ່ນດິນ​ຂອງຣັດ​ເຊຍ​ກວມ​ເອົາ​ນັ້ນ ​ເພື່ອເພິ່ມທະວີສິນຄ້າ​ສົ່ງ​ອອກ​ໄປ​ຍັງ​ຂົງ​ເຂດ​ເອ​ເຊຍ​ຕາ​ເວັນ​ອອກ ​ໃນ​ຂະນະ​ທີ່​ຄວາມ​ຮຽກຮ້ອງຕ້ອງການ​ຢູ່​ໃນ​ຢູ​ໂຣບລຸດ ນ້ອຍ​ຖອຍ​ລົງນັ້ນ.

ຢູ່​ນອກ​ກອງ​ປະຊຸມ ບັນດາ​ເຈົ້າໜ້າ​ທີ່ຈາກ​ຍີ່ປຸ່ນ ​ແລະ​ຈາກ​ບໍລິສັດ Gazprom ຊຶ່ງ​ເປັນ​ບໍລິສັດ​ແກສຍັກ​ໃຫຍ່​ຂອງ​ຣັດ​ເຊຍ ​ໄດ້ລົງ​ນາມ​ໃນຂໍ້​ຕົກລົງ​ຂັ້ນ​ຕົ້ນ ກ່ຽວ​ກັບ​ການ​ກໍ່ສ້າງ​ໂຮງງານ​ແກ​ສທໍາ​ມະ​ຊາດ​ ​ແລະ​ທ່າ​ເຮືອ ສົ່ງ​ສິນຄ້າ ທີ່​ມີມູນ​ຄ່າ 13 ພັນ​ລ້ານ​ໂດ​ລາ ຢູ່​ໃກ້​ເມືອງ​ທ່າ Vladivostok ນັ້ນ.
XS
SM
MD
LG