ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ກ່າວຕໍ່ທ່ານຫູຈິນເຖົາປະທານປະເທດຈີນໃນວັນເສົາວານນີ້ວ່າ ຄົນອາເມຣິກັນກໍາລັງມີຄວາມເຫລືອອົກເຫລືອໃຈແລະຂາດຄວາມອົດທົນຫລາຍຂຶ້ນເລື້ອຍໆນໍາການປ່ຽນແປງທີ່ດໍາເນີນໄປຢ່າງຊ້າໆໃນນະໂຍບາຍດ້ານເສດຖະກິດຂອງກຸງປັກກິງນັ້ນ.
ໃນການພົບປະໂອ້ລົມກັນກັບຜູ້ນໍາຈີນທີ່ນະຄອນໂຮໂນລູລູ ກ່ອນກອງປະຊຸມສຸດຍອດປະຈໍາປີຂອງສະພາຮ່ວມມືເສດຖະກິດແຫ່ງຂົງເຂດເອເຊຍປາຊີຟິກ ຫລື ເອເປັກ ນັ້ນ ທ່ານໂອບາມາເອີ້ນການຮ່ວມມືກັບຈີນວ່າສໍາຄັນຫລາຍ.
ສ່ວນທ່ານຫູຈິນເຖົາກໍໄດ້ຮຽກຮ້ອງໃຫ້ມີການຮ່ວມໄມ້ຮ່ວມມືກັນຫລາຍຂຶ້ນເຊ່ນກັນ ແຕ່ກ່າວຕື່ມວ່າ ທັງສອງປະເທດກໍຈະຕ້ອງນັບຖືຄວາມເປັນຫ່ວງທີ່ສໍາຄັນຂອງກັນແລະກັນ ແລະດໍາເນີນການແກ້ໄຂບັນຫາທີ່ຫລໍ່ແຫລມຕ່າງໆ ຢ່າງເໝາະສົມ.ໃນລະຫວ່າງການພົບປະກັບພວກຫົວໜ້າບໍລິຫານທຸລະກິດໃນວັນເສົາວານນີ້ ທ່ານໂອບາມາໄດ້ຍົກຫົວຂໍ້ຕ່າງໆອອກມາ ນັບແຕ່ເລື້ອງການປົກປ້ອງຊັບສິນດ້ານສະຕິປັນຍາ ໄປຫາເລື້ອງການເອົາບາດກ້າວຕື່ມອີກ ເພື່ອອໍານວຍໃຫ້ເງິນຕາຂອງຈີນປັບຄ່າຂຶ້ນນັ້ນ.
