ຮຸ້ນຕ່າງໆຂອງກຣິສ ໄດ້ຕົກຕ່ຳລົງຢ່າງໜັກ ໃນວັນຈັນມື້ນີ້ ເມື່ອ
ຕະຫລາດຫລັກຊັບ ຂອງນະຄອນ Athens ເປີດຂາຍ ເປັນຄັ້ງ
ທຳອິດ ຫຼັງຈາກ 5 ອາທິດຜ່ານມາ. ດັດຊະນີ ຂອງການຊື້ຂາຍ
ຫລຸດລາຄາເກືອບ 23 ເປີເຊັນ ໃນເວລາທີ່ເປີດຕະຫລາດ
ບໍ່ດົນເທົ່າໃດ.
ຮຸ້ນຕ່າງໆ ໄດ້ຟື້ນຕົວຂຶ້ນຄືນເລື້ອຍໆ ຢ່າງສະໝ່ຳສະເໝີ ຫຼັງຈາກ
2 ຊົ່ວໂມງຕໍ່ມາ ໂດຍທີ່ດັດຊະນີ ຕົກລົງເຫຼືອຢູ່ 19 ເປີເຊັນ.
ລັດຖະບານກຣິສ ໄດ້ປິດຕະຫລາດຫລັກຊັບລົງ ເມື່ອທ້າຍເດືອນ
ມິຖຸນາຜ່ານມາ ໃນເວລານັ້ນ ກໍປິດທະນາຄານຕ່າງໆລົງເຊັ່ນກັນ
ແລະ ໄດ້ອອກກຳນົດໃນການຖອນເງິນອອກຈາກທະນາຄານ ເພື່ອເປັນການຮັບມືກັບ
ວິກິດການດ້ານໜີ້ສິນຂອງປະເທດ.
ກຣິສ ໄດ້ບັນລຸຂໍ້ຕົກລົງ ກ່ຽວກັບການຊ່ວຍກອບກູ້ເສດຖະກິດຂອງຕົນ ກັບສະຫະພາບ
ຢູໂຣບ ແລະ ອົງການກອງທຶນສາກົນ ຫຼື IMF ເມື່ອເດືອນແລ້ວນີ້ ແລະ ໄດ້ເປີດຄືນ
ທະນາຄານຕ່າງໆ ເມື່ອວັນທີ 20 ກໍລະກົດຜ່ານມາ. ການຄວບຄຸມເງິນທຶນ ຍັງຄົງມີຢູ່
ແລະ ລັດຖະບານຍັງສືບຕໍ່ ເຈລະຈາກັບບັນດາເຈົ້າໜີ້ ກ່ຽວກັບເງື່ອນໄຂຕ່າງໆອັນແທ້ຈິງ
ສຳຫລັບ ການຊ່ວຍກອບກູ້ເສດຖະກິດຊຸດໃໝ່ ທີ່ອາດມີມູນຄ່າເຖິງ 94 ຕື້ໂດລານັ້ນ.
ການຊ່ວຍກອບກູ້ເສດຖະກິດຂອງກຣິສນີ້ ແມ່ນເປັນ ຄັ້ງທີ 3 ແລ້ວ ໃນໄລຍະ 5 ປີຜ່ານມາ
ຊຶ່ງມີຂຶ້ນ ຫຼັງຈາກທີ່ມີການເຈລະຈາກັນ ຫຼາຍອາທິດຜ່ານມາ ແລະ ມີຂໍ້ຄັດແຍ້ງກັນ ທີ່ລວມ
ທັງ ການປະຕິເສດ ໂດຍການລົງປະຊາມະຕິ ຂອງກຣິສ ສຳລັບການຊ່ວຍກອບກູ້ເສດຖະ
ກິດໃນເບື້ອງຕົ້ນ. ຊາວກຣິດຫຼາຍຄົນ ບໍ່ເຫັນດີນຳ ປະເພດຂອງມາດຕະການ ປະຢັດມັດ
ທະຍັດທີ່ຮັດແໜ້ນ ຂອງພວກເຈົ້າໜີ້ທີ່ໄດ້ຮຽກຮ້ອງໃຫ້ປະຕິບັດ ໂດຍກ່າວວ່າ ພວກເຂົາ
ເຈົ້າພຽງແຕ່ຈະເຮັດໃຫ້ ບັນຫາເສດຖະກິດ ຂອງປະເທດ ຮ້າຍແຮງຍິ່ງຂຶ້ນຕື່ມ.
