ຜູ້ທີ່ໄວ້ເນື້ອເຊື່ອໃຈ ມາແຕ່ດົນນານຄົນນຶ່ງ ຂອງທ່ານນາງ Hillary
Clinton ອະດີດລັດຖະມົນຕີຕ່າງປະເທດ ສະຫະລັດ ຈະໃຫ້ການ
ຕໍ່ ຄະນະກຳມະການພິເສດ ຂອງລັດຖະສະພາ ທີ່ທຳການສືບ
ສວນສອບສວນ ເຫດການໂຈມຕີກົງສຸນສະຫະລັດ ໃນເມືອງ
Benghazi ປະເທດລີເບຍ ເມື່ອປີ 2012.
ທ່ານ Sidney Blumenthal ຈະໃຫ້ການແບບປິດລັບ ຕໍ່ຄະນະ
ກຳມະການພິເສດຂອງສະພາຕ່ຳ ສືບສວນເລື້ອງ Benghazi
ກ່ຽວກັບ ຂໍ້ຄວາມຕ່າງໆຢູ່ໃນ emails ທີ່ຜູ້ກ່ຽວໄດ້ສົ່ງເຖິງ ທ່ານ
ນາງ Clinton ລາຍງານສະຖານະການ ໃນປະເທດລີເບຍ ຫຼັງ
ຈາກການໂຄ່ນລົ້ມຈອມຜະເດັດການ Moammar Gadhafi ທີ່
ປົກຄອງມາເປັນເວລາດົນນານ ເມື່ອປີ 2011 ນັ້ນ. ທ່ານ Blumenthal ມີຄວາມໃກ້ຊິດກັບທ່ານນາງ Clinton ແລະ ອະດີດປະທານາທິບໍດີ Bill Clinton ສາມີຂອງທ່ານນາງອີກດ້ວຍ ທີ່ທ່ານ Blumenthal ເຄີຍຮັບໃຊ້ເປັນທີ່ປຶກສາໃຫ້ທ່ານ Clinton ໃນລະຫວ່າງລັດຖະບານຂອງທ່ານນັ້ນ. ທ່ານ Blumenthal ໄດ້ສົ່ງອີແມລຫຼາຍຄັ້ງ ໄປຫາອີແມລສ່ວນຕົວຂອງທ່ານນາງ Clinton ທີ່ໄດ້ນຳໃຊ້ໃນລະຫວ່າງເປັນລັດຖະມົນຕີຕ່າງປະເທດ ຢູ່ນັ້ນ ເຊິ່ງເປັນຂັ້ນຕອນທີ່ນຳໄປສູ່ ການຕຳນິຕິຕຽນຢ່າງກວ້າງຂວາງ ແລະ ຖືກກ່າວຫາວ່າ ທ່ານນາງ ປົກປິດຂໍ້ມູນນັ້ນເອງ.
ທ່ານ Blumenthal ໄດ້ສົ່ງມອບອີແມລດັ່ງກ່າວໃຫ້ແກ່ຄະນະກຳມະການ ເມື່ອອາທິດ
ແລ້ວນີ້ ໃນການຕອບສະໜອງ ຕໍ່ຄຳສັ່ງຂອງສານ. ອີແມລຈຳພວກນີ້ ບໍ່ໍລວມຢູ່ໃນຈຳນວນ
ອີແມລຫຼາຍຮ້ອຍສະບັບທີ່ກ່ຽວພັນກັບການໂຈມຕີ ຢູ່ເມືອງ Benghazi ທີ່ກະຊວງການ
ຕ່າງປະເທດ ໄດ້ສົ່ງມອບໃຫ້ຄະນະກຳມະການສະພາຕ່ຳ ເມື່ອຕົ້ນປີນີ້.
ການ ໂຈມຕີກົງສຸນສະຫະລັດໃນເມືອງ Benghazi ໄດ້ເຮັດໃຫ້ຊາວອາເມຣິກັນສີ່ຄົນ
ເສຍຊີວິດ ລວມທັງ ເອກອັກຄະລັດຖະທູດ ປະຈຳລີເບຍ ທ່ານ Christopher Stevens.
ທ່ານນາງ Clinton ເຊິ່ງເປັນຜູ້ມີຄະແນນນຳໜ້າ ໃນການທີ່ຈະຖືກແຕ່ງຕັ້ງ ໃຫ້ເປັນຜູ້ຕາງໜ້າພັກເດໂມແຄຣັດ ໃນການເລືອກຕັ້ງປະທານາທິບໍດີ ສະຫະລັດ ປີ 2016 ໄດ້ຍອມຮັບວ່າ ໄດ້ນຳໃຊ້ຜູ້ໃຫ້ບໍລິການດ້ານອີແມລ ທີ່ເປັນເອກະຊົນ ແລະ ໃຊ້ທີ່ຢູ່ອີແມລສ່ວນຕົວ ໃນລະຫວ່າງປະຕິບັດໜ້າທີ່ ເປັນລັດຖະມົນຕີຕ່າງປະເທດ ແຕ່ປີ 2009 ຫາ 2013.
