ບັນດາຜູ້ບໍລິຫານຈາກ ບໍລິສັດ ມິດຊູບິຊິ ຂອງຍີ່ປຸ່ນ ໄດ້ສະເໜີ ຈະຂໍຄະມາໂທດສ່ວນຕົວຢ່າງເປັນປະຫວັດການ ທີ່ໄດ້ໃຊ້ນັກໂທດ ສົງຄາມ ຊາວ ອາເມຣິກັນ ໃຫ້ເຮັດວຽກສັບພະທຸກໃຫ້ບໍລິສັດ ໃນສະໄໝສົງຄາມໂລກຄັ້ງທີ ສອງ.
ຜູ້ບໍລິຫານບໍລິສັດ ມິດຊູບິຊິ ທ່ານ Hikaru Kimura ໄດ້ສະເໜີ “ການຂໍໂທດສຳນຶກຜິດທີ່ສຸດ” ຕໍ່ອະດີດນັກໂທດສົງຄາມ ທ່ານ James Murphy ອາຍຸ 94 ປີ ໃນລະຫວ່າງພິທີຊ້ອງໜ້າປະຊາຊົນໃນວັນອາທິດວານນີ້ ທີ່ຫໍພິພິທະພັນຂອງສູນ Simon Wiesenthal ໃນນະຄອນ Los Angeles. ກ່ອນໜ້າການຈັດພິທີດັ່ງກ່າວ, ທ່ານ Kimura ແລະ ບັນດາຜູ້ບໍລິຫານຄົນອື່ນໆ ໄດ້ຂໍຄະມາໂທດໃນລະຫວ່າງການປະຊຸມສ່ວນຕົວກັບທ່ານ Murphy.
ທ່ານ Murphy ກ່າວວ່າ “ມື້ນີ້ແມ່ນວັນທີ່ປະເສີດໃນຮອບ 70 ປີ
ທີ່ພວກເຮົາຢາກໃຫ້ເກີດຂຶ້ນ,” ທ່ານ Murphy ເປັນໜຶ່ງໃນບັນດານັກໂທດສົງຄາມປະມານ 900 ຄົນ ທີ່ໄດ້ເຮັດວຽກໃຫ້ກັບບໍ່ແຮ່ ທີ່ເປັນຂອງບໍລິສັດ ແລະ ໂຮງງານອຸດສາຫະກຳຫຼາຍ ແຫ່ງໃນລະຫວ່າງສົງຄາມປາງນັ້ນ.
