ຢູ່ນອກຕຶກ Trump Tower ທີ່ທາງແຍກ ບ່ອນຖະໜົນເລກ 5 ແລະຖະໜົນ 56 ຕັດກັນ ໄດ້ມີການຮ້ອງໂຈມຕີກັນຢ່າງຮ້ອນແຮງ ທ່າມກາງສະພາບອາກາດທີ່ເຍືອກເຢັນຂອງຕອນເຊົ້າ ໃນຂະນະທີ່ບັນດາຜູ້ສະໜັບສະໜູນການ ນັບບັດຄະແນນສຽງຄືນໃໝ່ຢູ່ໃນສາມລັດເຂົ້າຮ່ວມສົມທົບກັບຜູ້ສະໝັກປະທານາທິບໍດີຂອງ ພັກ Green Party ທ່ານ ນາງ Jill Stein ໃນການໂຮມຊຸມນຸມປະທ້ວງ ເພື່ອ ຄໍ້າປະກັນວ່າ ການນັບບັດເປັນໄປ ຢ່າງ “ຖືກຕ້ອງ ປອດໄພ ແລະຍຸຕິທຳ”.
ທ່ານນາງ Stein ກ່່າວວ່າ “ພວກເຮົາມາທີ່ນີ້ ເພື່ອໃຫ້ການຄໍ້າປະກັນ ແກ່ທ່ານ Trump ວ່າ ບໍ່ມີຫຍັງເປັນໜ້າຢ້ານ. ຖ້າຫາກທ່ານເຊື່ອໃນປະຊາທິປະໄຕ ຖ້າຫາກທ່ານເຊື່ອໃນຄວາມ ໜ້າເຊື່ອຖືໃນໄຊຊະນະຂອງທ່ານ ຈົ່ງເອົາແຂນຂອງທ່ານລົງ ຍຸຕິການຂັດຂວາງຖ່ວງດຶງຂອງທ່ານ ຍຸຕິການຂົ່ມຂູ່ ແລະເຂົ້າຮ່ວມກັບພວກເຮົາປະຊາຊົນອາເມຣິກັນ ຜູ້ທີ່ຮຽກຮ້ອງເອົາປະຊາທິປະໄຕ ທີ່ໃຫ້ບໍລິການແກ່ພວກເຮົາທຸກຄົນ ແລະການເລືອກຕັ້ງທີ່ພວກເຮົາສາມາດເຊື່ອຖືໄດ້.”
ພວກປະທ້ວງໄດ້ພາກັນລົບກວນ ແລະເຍາະເຍີ້ຍກຸ່ມສະໜັບສະໜູນດ້ວຍການຮ້ອງປະນາມ ແລະປ້າຍຄຳຂວັນຕ່າງໆ. “ການລົງຄະແນນສຽງຜິດກົດໝາຍ ພວກຊ້າຍຈັດຮ້ອງໃຫ້ຄືກັນກັບແອນ້ອຍ ທ່ານນາງ Stein ຈະບໍ່ປ່ຽນແປງຜົນການເລືອກຕັ້ງ: ປະທາ ນາທິບໍດີ Trump ໃນວັນທີ 20 ປີ 2017!!” ນັ້ນຄືປ້າຍຄຳຂວັນຂອງແມ່ຍິງຄົນນຶ່ງ.
ຜູ້ສະໜັບສະໜູນຄົນນຶ່ງຮ້ອງຕອບຄືນວ່າ “ພວກຝັນຫວານໃນຕົນເອງ.”
ຜູ້ພິພາສາຄົນນຶ່ງ ໄດ້ສັ່ງໃຫ້ນັບບັດຄືນດ້ວຍມື ເລີ້ມຢູ່ໃນລັດ Michigan ນຶ່ງໃນຈຳນວນສາມລັດທີ່ມີຄະແນນສຽງປ່ຽນໄປມາ ທີ່ທ່ານນາງ Stein ເຊື່ອວ່າ ອາດໄດ້ຖືກໂຈມຕີຍ້ອນ ເຄື່ອງຈັກປ່ອນບັດເກົ່າແກ່. ຄ້າຍຄືກັນນີ້ ທ່ານນາງໄດ້ກົດດັນໃຫ້ສານລັດຖະບານກາງ ອອກຄຳສັ່ງໃຫ້ນັບບັດຄະແນນສຽງຄືນໃໝ່ ຢູ່ໃນລັດ Pennsylvania.
ທ່ານນາງ Rachel Desario ຜູ້ສະໜັບສະໜູນ ທ່ານນາງ Clinton ທີ່ໄດ້ເຂົ້າຮ່ວມການປະທ້ວງໃນວັນຈັນວານນີ້ ກ່າວວ່າ “ໃນນາມຜູ້ປ່ອນບັດພວກເຮົາຢາກ ໃຫ້ເປັນທີ່ແນ່ໃຈວ່າ ປະຊາທິປະໄຕບໍ່ໄດ້ຖືກຂັດຂວາງດ້ວຍວິທີການໃດນຶ່ງແລະການລົງຄະແນນສຽງຂອງພວກເຮົາໄດ້ມີການນັບເອົາຢ່າງຖືກຕ້ອງ.”
ເຖິງຢ່າງໃດກໍດີ ຄົນອື່ນໆມອງເຫັນວ່າ ຄວາມພະຍາຍາມຂອງທ່ານນາງ Stein ເປັນການສິ້ນເປືອງເງິນ ແລະເວລາໂດຍບໍ່ມີປະໂຫຍດ.
ນາງ Pim Couch ນັກທ່ອງທ່ຽວຈາກລັດ Texas ກ່າວວ່າ “ພວກເຮົາໝົດ ທຸກຄົນມີໂອກາດໄດ້ປ່ອນບັດລົງຄະແນນສຽງ. ທຸກຄົນໄດ້ເຮັດ. ແລະບັດນີ້ພວກເຮົາຕ້ອງເດີນໄປໜ້າຕໍ່ໄປ.”
