ການປະທ້ວງ ມື້ທີ່ສາມ ຕໍ່ຕ້ານ ປ. Morsi ໃນອີຈິບ

25.11.2012

ພວກປະທ້ວງກໍາລັງຫຼົບຫຼີກລະເບີດນໍ້າຕາ ທີ່ຕໍາຫຼວດຍິງໃສ່

ການປະທ້ວງຢູ່ໃນອີຈິບ ກ່ຽວກັບການຕັດສິນໃຈຂອງປະທານາ ທິບໍດີ Mohamed Morsi ເພື່ອເຂົ້າກໍາອໍານາດໃນຂອບເຂດທີ່ກວ້າງອອກໄປອີກນັ້ນ ແມ່ນໄດ້ຍືດເຍື້ອມາໄດ້ເປັນມື້ທີ່ສາມ. ດໍາລັດຂອງປະທານາທິບໍດີ ແມ່ນເຮັດໃຫ້ທ່ານມີອໍານາດເໜືອຝ່າຍຕຸລາການ ແລະເພື່ອປົກປ້ອງສະມາ ຊິກພັກສາສະໜາອິສລາມ ທີ່ສະໜັບສະໜຸນທ່ານ ຢູ່ໃນສະພານັ້ນ.

ພວກປະທ້ວງທີ່ຈະຕຸລັດ Tahrir ໃນນະຄອນຫຼວງໄຄໂຣ ຊຶ່ງເປັນຈຸດສູນ ກາງໃນການລຸກຮືຂຶ້ນເມື່ອປີ 2011 ທີ່ໄດ້ໂຄ່ນລົ້ມ ອະດີດປະທານາທິບໍດີ Hosni Mubarak ນັ້ນ ໄດ້ພາ ກັນຂວ່າງກ້ອນຫີນໃສ່ພວກຕໍາຫຼວດ ເມື່ອວັນອາທິດມື້ນີ້. ຕໍາຫຼວດກໍຍິງຕອບໂຕ້ດ້ວຍລະເບີດນໍ້າຕາ.

ເມື່ອວັນເສົາວານນີ້ ທ່ານ Mohammed Elbaradei ຂອງກຸ່ມສະໜັບ ສະໜຸນປະຊາທິ ປະໄຕອີຈິບ ທີ່ມີຊື່ສຽງ ໄດ້ຮຽກຮ້ອງໃຫ້ປະທານາທິບໍດີ Morsi ຈົ່ງເລີກລົ້ມແຜນການທີ່ຈະເຂົ້າກໍາອໍານາດເກືອບວ່າເດັດຂາດ ທີ່ທ່ານໄດ້ມອບໃຫ້ແກ່ຕົນເອງນັ້ນ.

ເວລາກ່າວຕໍ່ຝຸງຊົນທີ່ຈະຕຸລັດ Tahrir ນັ້ນ ທ່ານ Elbaradei ເວົ້າວ່າ ປະທານາທິບໍດີຈະຕ້ອງໄດ້ເອົາມາດຕະການຢ່າງໃດຢ່າງນຶ່ງເພື່ອຫຼີກລ່ຽງບໍ່ໃຫ້ເກີດເຫດການວຸ້ນວາຍທີ່ອາດເພີ່ມທະວີຂຶ້ນໄດ້ໃນອີຈິບ ຊຶ່ງເປັນປະເທດທີ່ຫາກໍໄດ້ຂັບໄລ່ລັດຖະບານກົດຂີ່ປະຊາຊົນມາດົນນານໄດ້ເມື່ອບໍ່ດົນມານີ້.

ສະຖາບັນຜູ້ພິພາກສາທີ່ມີອຳນາດສູງສຸດຂອງອີຈິບ ກໍຄືສະພາຕຸລາການສູງສຸດນັ້ນ ກໍໄດ້ປະນາມດໍາລັດດັ່ງກ່າວຂອງປະທານາທິບໍດີ Morsi ນໍາເຊັ່ນກັນ.