ທ່ານ ສເຕັບເຟັນ ບາຍກັນ (Stephen Biegun), ຜູ້ຕາງໜ້າພິເສດຂອງສະຫະລັດກ່ຽວກັບເກົາຫລີເໜືອ ເອີ້ນການພົບປະຂອງທ່ານເມື່ອ ມໍ່ໆມານີ້ ຢູ່ໃນນະຄອນພຽງຢາງວ່າ ເປັນການພົບປະທີ່ "ມີປະສິດທິຜົນດີ" ກ່ອນຈະມີການຈັດກອງປະຊຸມສຸດຍອດຄັ້ງທີ 2 ລະຫວ່າງປະທານາທິບໍດີ ດໍໂນລ ທຣຳຂອງສະຫະລັດ ກັບຜູ້ນຳເກົາຫລີເໜືອ, ທ່ານ ກິມ ຈົງອຶນ ຂຶ້ນ ແຕ່ວ່າກໍໄດ້ໃຫ້ຄຳເຫັນວ່າ ຍັງມີຫລາຍຢ່າງ ທີ່ຈະຕ້ອງໄດ້ເຮັດຢູ່.
ກະຊວງການຕ່າງປະເທດສະຫະລັດ ຍັງໄດ້ກ່າວວ່າ ທ່ານບາຍກັນ (Biegun) ໄດ້ຕົກລົງທີ່ຈະພົບປະກັບທ່ານ ກິມ ຮີຢົກ ໂຈລ (Kim Hyok Chol), ຄູ່ຕຳແໜ່ງຂອງທ່ານອີກຢ່າງໜ້ອຍເທື່ອນຶ່ງ ກ່ອນໜ້າກອງປະຊຸມສຸດຍອດ ທີ່ຈະຈັດຈັດຂຶ້ນໃນວັນທີ 27-28 ກຸມພາຈະມາເຖິງນີ້ ຢູ່ນະຄອນຫລວງຮາໂນ່ຍຂອງຫວຽດນາມ.
ທ່ານ ກິມ ຈູນ-ຢຸງ, ອາຈານສອນທີ່ມະຫາວິທະຍາໄລຮານດົງ
(Handong), ພະແນກສຶກສາການພົວພັນສາກົນ ແມ່ນບໍ່ມີຄວາມປະຫລາດໃຈແຕ່ຢ່າງໃດເລີຍທີ່ຈະມີກອງປະຊຸມຈັດຂຶ້ນອີກ, ໂດຍເອີ້ນກອງປະຊຸມທີ່ພຽງຢາງວ່າ ເປັນກອງປະຊຸມ "ຂອງຄົນໃນລະດັບປະຕິບັດການທີ່ເໝາະສົມທີ່ຢູ່ໃນຂັ້ນຕົ້ນໆ."
ອາຈານ ກິມ ຈູນ-ຢຸງ ກ່າວວ່າ “ຝ່າຍອາເມຣິກາ ໄດ້ຂໍໃຫ້ເກົາຫລີເໜືອຈັດກອງປະຊຸມໃນລະດັບ ປະຕິບັດການຮ່ວມກັນ ຢູ່ຕະຫລອດມາ; ແຕ່ວ່າບໍ່ມີກອງປະຊຸມນັ້ນຈັດຂຶ້ນຈົນກວ່າວ່າ ຈະມີການໄປຢ້ຽມຢາມສະຫະລັດຂອງທ່ານ ກິມ ຢົງ ໂຈລ ໃນປີກາຍນີ້. ເພາະສະນັ້ນ, ອັນນີ້ເປັນ ກອງປະຊຸມໃນລະດັບປະຕິບັດການຮ່ວມກັນຄັ້ງທຳອິດ ລະຫວ່າງສອງຝ່າຍ.”
"ພວກເຮົາບໍ່ຮູ້ວ່າ ມັນຈະກ້າວໄປເຖິງຂັ້ນໃດກັນແທ້. ແຕ່ພວກເຮົາກຳລັງຢູ່ທ່າມກາງການສົນທະນາກັບເກົາຫລີເໜືອ. ແລະການສົນທະນາຫາລືຂອງພວກເຮົາ ແມ່ນມີປະສິດທິຜົນດີ" ນັ້ນຄືຄຳເວົ້າຂອງທ່ານ Biegun ໃນຂະນະທີ່ທ່ານພົບປະກັບລັດຖະມົນຕີກະຊວງການຕ່າງປະເທດຂອງເກົາຫລີໃຕ້, ທ່ານ ຄາງ ຮຢິງ ຫວາ (Kang Hyung-wha) ໃນວັນເສົາທີ່ຜ່ານມາ ພາຍຫລັງທີ່ໄດ້ມີການພົບປະກັບທ່ານ ກິມ ຮີຢົກ ໂຈລ (Kim Hyok Chol), ຄູ່ຕຳແໜ່ງຂອງທ່ານທີ່ດຳເນີນໄປເປັນເວລາ 3 ວັນແລ້ວ.
