ນາງ Angelina Jolie ນັກສະແດງຮູບເງົາ ແລະຜູ້ສ້າງຮູບເງົາ
Hollywood ໄດ້ເປີດເຜີຍໃຫ້ຮູ້ວ່າ ນາງໄດ້ຜ່າຕັດເອົາຮັງໄຂ່
ແລະທໍ່ນ້ຳໄຂ່ໃນມົດລູກອອກ ເພື່ອຜ່ອນຄາຍຄວາມສ່ຽງທີ່ຈະ
ເປັນໂຣກມະເຮັງນັ້ນ.
ໃນການຂຽນລົງໃນໜັງສືພິມ New York Times ນາງ Jolie
ໄວ 39 ປີ ທີ່ໄດ້ຮັບການຜ່າຕັດເຕົ້ານົມອອກມາທັງສອງເບື້ອງ
ເພື່ອເປັນການປ້ອງກັນ ເມື່ອສອງປີຜ່ານມາ ກ່າວວ່າ ການປ່ຽນ
ແປງລັກສະນະໃນ gene ທີ່ເຮັດໃຫ້ນາງມີຄວາມສ່ຽງທີ່ຈະເປັນ
ໂຣກມະເຮັງໄດ້ໃນເຕົ້ານົມ 87 ເປີເຊັນ ແລະສ່ຽງກັບເປັນໂຣກ
ມະເຮັງໃນມົດລູກໄດ້ 50 ເປີເຊັນນັ້ນ. ທັງຍາແມ່ ແລະແມ່ຕູ້ຂອງ
ນາງ ທັງສອງເສຍຊີວິດໄປຍ້ອນໂຣກມະເຮັງ.
ນາງ Jolie ກ່າວວ່າ ນາງເປີດເຜີຍເລື້ອງນີ້ໃຫ້ຜູ້ຄົນຮູ້ ຍ້ອນການຕັດສິນໃຈຂອງນາງເອງ
ເພື່ອວ່າພວກແມ່ຍິງທັງຫຼາຍຈະຮູ້ຈັກກ່ຽວກັບທາງເລືອກຕ່າງໆທີ່ມີໄວ້ໃຫ້ສຳລັບພວກເຂົາ
ເຈົ້າ.
ມີເປີເຊັນໜ້ອຍດຽວ ທີ່ພວກແມ່ຍິງສືບທອດ gene ທີ່ຜິດພາດແນວດຽວກັນນີ້. ການປ່ຽນລັກສະນະຂອງ gene ສ່ວນຫຼາຍແມ່ນເກີດນຳພວກແມ່ຍິງ ທີ່ມີເຊື້ອສາຍຢິວ ໃນເຂດຢູໂຣບຕາເວັນອອກ ແຕ່ກໍມີກຸ່ມອື່ນໆຮວມທັງຊາວ Norway, Netherland ແລະ Iceland ມີອັດຕາສູງກວ່ານ້ອຍໜຶ່ງ ໃນການປ່ຽນລັກສະນະໃນ gene ນັ້ນ.
