ນັກວິໄຈເຢຍຣະມັນສອງທ່ານກ່າວວ່າ ລູກສອນໄຟຂີປະນາວຸດ ທີ່ນໍາມາສະແດງຢູ່ໃນພິທີ
ສວນສະໜາມຂອງທະຫານເກົາຫລີເໜືອຕົ້ນເດືອນນີ້ນັ້ນ ເປັນລູກສອນໄຟປອມຕົບຕາ.
ຢູ່ໃນເອກກະສານທີ່ມີຫົວເລື້ອງວ່າ “A Dog And Pony Show” ຫລືວ່າ “ການສະ
ແດງໝາແລະລໍ” ທີ່ຂຽນໂດຍທ່ານ Markus Schiller ແລະທ່ານ Robert
Schumucker ຈາກອົງການ Schmucker Technologie ຂອງເຢຍຣະມັນ ກ່າວວ່າ
ລູກສອນໄຟຂີປະນາວຸດຂ້າມທະວີບຈໍານວນຫົກລູກ ທີ່ແກ່ໃສ່ເທິງຖານຍິງເຄື່ອນທີ່ ໃນ
ພີທີສວນສະໜາມ ເມື່ອວັນທີ 15 ເດືອນເມສາຜ່ານມານີ້ ລ້ວນແລ້ວແຕ່ເປັນຂອງປອມ.
ເອກກະສານສະບັບນີ້ກ່າວຕໍ່ໄປວ່າ ລູກສອນໄຟເຫຼົ່ານີ້ປະກົດວ່າເປັນ ລູກສອນໄຟທີ່ໃຊ້
ເຊື້ອໄຟທີ່ເປັນຂອງແຫລວ ແລະເຊື້ອໄຟທີ່ບໍ່ແຫລວ ຊຶ່ງເປັນພາກສ່ວນທີ່ບໍ່ສາມາດເຂົ້າ
ກັນໄດ້. ນອກນັ້ນແລ້ວ ແຜ່ນໂລຫະທີ່ຫຸ້ມລູກສອນໄຟ ສະແດງໃຫ້ເຫັນວ່າ ເປັນເຫລັກ
ບາງເກີນໄປທີ່ຈະ ຕ້ານທານໄດ້ ເວລາຍິງຂື້ນສູ່ອາກາດ. ນັກວິໄຈສອງຄົນກ່າວວ່າ ລູກ
ສອນໄຟແຕ່ລະລູກມີຂະໜາດແຕກຕ່າງກັນໜ້ອຍນຶ່ງ ເຖິງແມ່ນວ່າ ລູກສອນໄຟທັງໝົດ
ຄວນທີ່ຈະມີຂະໜາດທໍ່ກັນ ແລະຂະໜາດຂອງມັນກໍບໍ່ເຂົ້າກັນກັບຖານຍິງທີ່ແກ່ລູກສອນ
ໄຟເຫຼົ່ານັ້ນ.
ທ່ານ Schiller ແລະ ທ່ານ Schmucker ກ່າວວ່າ ຍັງບໍ່ມີຫລັກຖານເທື່ອວ່າ ເກົາຫລີ
ເໜືອ ມີລູກສອນໄຟຂີປະນາວຸດຂ້າມທະວີບທີ່ໃຊ້ການ ໄດ້ແລ້ວເທື່ອ.
ການເດີນສວນສະໜາມ ຂອງທະຫານຄັ້ງຍິ່ງໃຫ່ຍ ຮວມທັງອຸບປະກອນທາງທະຫານ
ເກືອບ 900 ຊະນິດ ທີ່ໄດ້ນໍາມາສະແດງ ໃນວັນທີ 15 ເມສາ ແມ່ນເພື່ອລະນຶກເຖິງວັນ
ເກີດຄົບຮອບ 100 ປີຂອງມື້ລາງຜູ້ນໍາເກົາຫລີເໜືອຄົນທໍາອິດ ທ່ານ Kim Il Sung.