ລິ້ງ ສຳຫລັບເຂົ້າຫາ

logo-print

ການສືບສວນ ຂອງທ່ານ ມອລເລີ ເຜີຍໃຫ້ເຫັນ ການສໍ້ລາດບັງຫຼວງ ຂອງພວກໃກ້ຊິດ ທ່ານທຣຳ


ຈາກຊ້າຍ ທ່ານພອລ ແມນນາຝອດ, ອະດີດ​ຫົວໜ້າ​ໂຄສະນາ​ຫາ​ສຽງ​ ຂອງ​ທ່ານ​ທຣຳ ແລະທ່ານ ໄມເກິລ ໂຄເຮັນ, ອະດີດ ທະນາຍຄວາມສ່ວນຕົວ ຂອງທ່ານທຣຳ.

ພວກ​ທີ່ມີສ່ວນຢ່າງ​ໃກ້ຊິດໃນອະດີດ ​ກັບ​ປະທານາທິບໍດີສະຫະລັດ ທ່ານ​ດໍ​ໂນ​ລ ທຣຳ
2 ທ່ານ ​ໄດ້ຖືກພົບ​ເຫັນ​ວ່າ ​ມີ​ຄວາມ​ຜິດ​ດ້ານອາຊະຍະ​ກຳທີ່​ຮ້າຍ​ແຮງ. ​ໃນ​ວັນ​ອັງ​ຄານ
​ວານ​ນີ້ ອະດີດ​ຫົວໜ້າ​ໂຄສະນາ​ຫາ​ສຽງ​ຂອງ​ທ່ານ​ທຣຳ ​ຄື ທ່ານ ພອລ ແມນນາຝອດ
ໄດ້​ຖືກ​ພົບ​ເຫັນ​ວ່າ ມີ​ຄວາມ​ຜິດ ​ໃນ 8 ກະ​ໂທ​ງ ກ່ຽວ​ກັບ​ທະນາຄານ​ແລະ​ບິດ​ເບືອນ​ພາສີ ໃນຂະນະທີ່ອະດີດທະນາຍຄວາມສ່ວນຕົວຂອງທ່ານ ທຣຳ ຄື ທ່ານ ໄມເກິລ ໂຄເຮັນ ໄດ້ຍອມຮັບຜິດ ໃນຄະດີອາຊະຍາກຳແປດກະໂທງ. ພວກ​ນັກວິ​ເຄາະ​ກ່າວ​ວ່າ ທັງ​ສອງ​
ຄະດີນີ້ ​ເປີດ​ເຜີຍເຖິງເລື້ອງ​ການ​ສໍ້​ລາດ​ບັງ​ຫຼວງ ທີ່​ຢັ່ງ​ລົງ​ເລິກ​ເຂົ້າໄປ ​ໃນ​ວົງ​ຈອນຂອງ
​ທ່ານ​ທຣຳ ​ເຖິງ​ແມ່ນ​ວ່າ ການ​ເອົາ​ບາດກ້າວ​ທາງ​ກົດໝາຍໃນປັດຈຸບັນ ຍັງ​ບໍ່​ທັນ​ໄດ້​
ກະທົບ​ໃນ​ທັນທີ ຕໍ່​ການຄວາມ​ຈົງ​ຮັກ​ພັກດີຕໍ່​ທ່ານ ກໍ​ຕາມ. ນັກ​ຂ່າວ​ວີ​ໂອ​ເອ ຊລາ​ຕິ​ກາ
​ໂຮ​ກ ມີ​ລາຍ​ງານ ​ກ່ຽວ​ກັບ​ເລື້ອງ​ນີ້ ຊຶ່ງວັນນະ​ສອນ ຈະມີ​ລາຍ​ລະອຽດ​ມາສະ​ເໜີ​ທ່ານ ​
ໃນ​ອັນ​ດັນ​ຕໍ່​ໄປ.

ທ່ານ​ໂຄເຮັນ ​ໄດ້​ຮັບ​ສາລະພາບ​ຜິດ ​ໃນ​ການທະນາຄານ​ ດ້ານພາສີ ແລະ​ການລະ​ເມີດ
​ກົດໝາຍ​ໃນເລື້ອງ​ການ​ເງິນ​ຂອງ​ໜ່ວຍ​ໂຄສະນາ​ຫາ​ສຽງ. ຮອງຫົວໜ້າທະ​ນາຍຄວາມ
​ປະຈຳເຂດ ທ່ານ​ໂຣ​ເບີຣ໌ດ ຄູ​ຊາ​ມີ ກ່າວ​ວ່າ ອາຊະ​ຍາ​ກຳ​ນີ້​ແມ່ນ​ຮ້າຍ​ແຮງ ​ແລະ​ສົ່ງ​ຜົນ​
ສະທ້ອນ​ໃຫ້ເຫັນ ການ​ຕົວະລ່າຍ​ທີ່​ເປັນ​ແບບ​ແຜນ​ແລະຄວາມ​ບໍ່​ຊື່ສັດທີ່ມີມາ​ຍາວນານ.​

ທ່ານ​ໂຣ​ເບີຣ໌ດ ຄູ​ຊາ​ມີ ຮອງຫົວໜ້າທະ​ນາຍຄວາມ​ຝ່າຍຍຸຕິ​ທຳ ປະຈຳ​ລັດ​ນິວ ຢອກ
ກ່າວ​ວ່າ “ທ່ານ​ໂຄເຮັນ ​ໄດ້​ຮັບ​ສາລະພາບ​ຜິດ ​ໃນ​ການ​ໃຊ້​ຈ່າຍ​ເງິນ​ຂອງໜ່ວຍ
ໂຄສະນາ​ຫາ​ສຽງ​ ຊຶ່ງນຶ່ງ​ໃນ​ນັ້ນ​ກໍແມ່ນໄດ້ຮັບເງິນມາຈາກການບໍລິຈາກ​ທີ່​ຜິດ​ກົດ
ໝາຍ​ຈາກບໍລິສັດແລະ​ອັນ​ທີ 2 ​ແມ່ນ ການ​ບໍລິຈາກ​ເປັນ​ການ​ສ່ວນ​ຕົວ​ແບບໂພດ
ເກີນໄປ​ ຊຶ່ງ​ທັງສອງຢ່າງແມ່ນເພື່ອ​ເປົ້າ​ໝາຍ​ໃນ​ການສ້າງ​ອິດ​ທິພົນ​ສຳລັບ​ການ​
ເລືອກ​ຕັ້ງ ປີ 2016.”

ນອກຈາກ​ນັ້ນ​ແລ້ວ ທ່ານ​ໂຄເຮັນ ​ໄດ້​ຮັບ​ຮູ້​ ເຖິງ​ການ​ຈ່າຍ​ເງິນ​ ໃຫ້​ພວກ​ແມ່​ຍິງ​ສອງ​ຄົນ
ຊຶ່ງ​ຄຳຖະແຫຼງຂອງພວກເຂົາເຈົ້າອາດຈະ​ມີ​ຜົນ​ກະທົບ​ໃນ​ທາງ​ລົບ ​ຕໍ່ການໂຄສະນາ​ຫາ​
ສຽງ​ຂອງ​ທ່ານ​ທຣຳ ກໍເປັນໄດ້.

ສ່ວນທ່ານແມນນາຝອດ ​ໄດ້​ຖືກ​ພົບ​ເຫັນ​ວ່າ​ ມີ​ຄວາມ​ຜິດ​ໃນ 8 ກະ​ໂທ​ງ ໃນຈຳນວນ
18 ​ຂໍ້ຫາວ່າກະທຳຜິດ. ພວກ​ນັກ​ວິ​ເຄາະ ​ໄດ້​ບອກ​ ​ວີໂອ​ເອວ່າ ສອງ​ກໍລະນີ ​ແມ່ນ​ໄດ້​ໃຫ້​
ອຳນາດ​ໃໝ່ແກ່ການ​ພິສູດ​ຂອງໄອຍະການພິເສດ ທ່ານໂຣເບີດ ມອລເລີ ​ສຳລັບການ
ສືບສວນກ່ຽວກັບການແຊກແຊງຂອງຣັດເຊຍໃນການ​ເລືອກ​ຕັ້ງຂອງສະຫະລັດ ປີ 2016.

ທ່ານ​ເດ​ວິດ​ ເອບຣາ​ແຮມ ຈາກມະ​ຫາ​ວິທະຍາ​ໄລ ​ໄມ​ອາ​ມີ ກ່າວ​ວ່າ “ການ​ສືບສວນ​
ສອບ​ສວນ​ຂອງ​ທ່ານມອລເລີ ​ໄດ້​ຄົ້ນ​ພົບ​ເຫັນຄວາມ​ເນົ່າ​ເໝັນ​ຢູ່​ໃນ​ຈຸດ​ສູນ​ກາງຂອງ​
ວົງ​ຈອນ​ຂອງ​ທ່ານ​ທຣຳ ​ແລະເຖິງແມ່ນວ່າການຕັດສີນຄວາມຜິດນີ້​ ​ແມ່ນ​ບົນ​ພື້ນຖານ​ຂອງທ່ານ ແມນນາຝອດກໍຕາມ ​ກ່ອນ​ໜ້າ​ການ​ພົວພັນ​ກັບທ່ານ​ທຣຳ, ແຕ່ມັນກໍ​ໄດ້​
ສະ​ແດງ​ອອກ ​ເຖິງ​ກິດຈະກຳ​ຕ່າງໆ​ ​ແລະ​ເຖິງ​ພວກ​ຜູ້​ຄົນ​ແບບໃດ ທີ່​ເປັນ​ໃຈ​ກາງ​ຂອງ
​ໜ່ວຍ​ໂຄສະນາ​ຫາ​ສຽງ​ຂອງ​ທ່ານ​ທຣຳ.”

ປະທານາທິບໍດີ​ທຣຳ ກ່າວ​ວ່າ ການ​ຕັດສິນຄວາມຜິດ​ຂອງ​ທ່ານແມນນາຝອດ ບໍ່​ໄດ້
​ພິສູດ​ໃຫ້​ເຫັນ​ເຖິງ​ການ​ເຂົ້າ​ແຊກ​ແຊງ​ໃດໆ ລະຫວ່າງ ໜ່ວຍ​ໂຄສະນາ​ຫາ​ສຽງຂອງ​ທ່ານ
ກັບຣັດ​ເຊຍ. ​ແຕ່​ວ່າ​ພວກ​ນັກວິ​ເຄາະ ​ກໍໃຫ້ຂໍ້ສັງເກດວ່າການພິຈາລະນາ​ຄະດີ​ຄັ້ງທີ 2
ຂອງ​ທ່ານ ແມນນາຝອດ ​ໃນ​ເດືອນ​ກັນຍາ​ ຈະ​ເບິ່ງ​ເຂົ້າ​ໄປໃນ​ການ​ຫາທາງ​ຊັກ​ຈູງຈາກ​
ພວກ​ທີ່​ສະໜັບສະໜຸນລັດຖະບານຣັດ​ເຊຍ ​ໃນ​ຢູ​ເຄຣນ. ທ່ານແມນນາຝອດ ​ໄດ້​ເຂົ້າ
​ຮ່ວມ​ໃນ​ກອງ​ປະຊຸມ ກ່ອນ​ການ​ເລືອກ​ຕັ້ງ ​ໃນ​ຕຶກ​ທຣຳ ທາວ​ເວີຣ໌ ຮ່ວມກັ​ບຜູ້​ໃກ້ຊິດ
​ທ່ານ​ທຣຳ ຄົນ​ອື່ນໆ​ ລວມທັງ​ທະນາຍຄວາມຣັດ​ເຊຍ ຜູ້​ຊຶ່ງ​ຖືກ​ກ່າວ​ຫາວ່າ ​ໄດ້ສະ​ເໜີ
​ຂໍ້​ມູນ​ທີ່​ຈະ​ເປັນ​ບ່ອນ​ທຳລາຍ​ຄູ່​ແຂ່ງ​ຂອງ​ທ່ານ ຈາກ​ພັກ​ເ​ດ​ໂມ​ແຄຣັດ ຄືທ່ານ​ນາງ​ຮິ​ລ
ລາຣີ ຄລິນ​ຕັນນັ້ນ.

ທ່ານ ພອລ ຊິ​ຟ ​ເບີຣ໌​ເມັນ ຈາກ​ມະຫາວິທະຍາ​ໄລ ຈອຕຈ໌ທາວ​ນ໌ ກ່າວ​ວ່າ “​ມັນ​ເປັນ​
ເລື້ອງ​ປົກກະຕິ​ທີ່​ວ່າ ‘ການ​ເຮັດ​ເປື້ອນ​ເປິ’ ​ໃສ່​ຄູ່​ແຂ່ງຂັນ​ອີກ​ຄົນ​ນຶ່ງ​ນັ້ນ ​ແມ່ນ​ສ່ວນ​ນຶ່ງ​
ຂອງ​ການ​ເມືອງ. ​ແຕ່​ວ່າ ການ​ເອົາ​ຄວາມ​ເປິ​ເປື້ອນຈາກ​ຄູ່ສັດຕູຕ່າງປະ​ເທດ​ທີ່​ມີ​
ອໍານາ​ດນັ້ນ ​ບໍ່​ແມ່ນ​ເລື້ອງ​ປົກກະຕິ​ຂອງ​ການ​ເມືອງ. ສະ​ນັ້ນ ມັນ​ຈຶ່ງ​ຈະ​ແຈ້ງ​ແລ້ວ​ວ່າ
ມັນ​ຜິດ​ກົດໝາຍ ​ແລະ​ມັນ​ຍັງ​ສະ​ແດງ​ໃຫ້​ເຫັນ​ວ່າ ທ່ານ​ທຣຳ ອາດ​ຈະ​ເປັນ​ຜູ້​ທີ່​
ບົງ​ການ​ໃຫ້ຣັດ​ເຊຍ ນຳ​ຂໍ້​ມູນ​ກ່ຽວ​ກັບໜ່ວຍ​ໂຄສະນາ​ຫາ​ສຽງຂອງທ່ານ​ນາງຄລິນ​ຕັນ
​ແລະ​ນຳມາຊ່ອຍ​ໃນ​ການ​ເລືອກ​ຕັ້ງ​ຂອງ​ທ່ານ.”

ພວກ​ນັກ​ວິ​ເຄາະ ​ໄດ້​ບອກວີໂອ​ເອວ່າ ການ​ສືບສວນ​ທີ່​ນຳພາ​ໂດຍ​ທ່ານມອລເລີ ຈະ​ບໍ່
​ລົ້ມເລີກ​ໄດ້ ​ແບ​ບຖືວ່າ ​“ເປັນ​ການຊອກ​ຫາເອົາຄວາມຜິດ”​ ​ດັ່ງ​ທີ່​ທ່ານ​ທຣຳ ​ໄດ້​ເວົ້າໄປ​, ​
ແລະ​ມັນ​ເບິ່ງ​ຄື​ວ່າ ຈະ​ເປັນ​ການ​ເພີ້​ມການ​ນອງ​ນັນ​ຂຶ້ນອີກ.

ທ່ານຊິ​ຟ ​ເບີຣ໌​ເມັນ ກ່າວ​ຕໍ່​ໄປ​ວ່າ “ຜູ້​ຄົນ​ພວກ​ນີ້--​ທ່ານ​ໂຄ​ເຮັນ ​ແລະ​ອາດຈະ​ແມ່ນ​
ທ່ານແມນ​ນາ​ຝອດ​ນຳ--​ຈະ​ເປັນ​ການ​ເລີ້ມ​ໃຫ້ການ​ຮ່ວມ​ມື​ກັບ​ໄອ​ຍະ​ການ​ພິ​ເສດ
ສະ​ນັ້ນ ຂ້າພະ​ເຈົ້າ​ຄິດ​ວ່າ ຂໍ້​ມູນ​ທີ່​ສະໜັ່ນ​ຫວັ່ນ​ໄຫວນີ້ ຍັງ​ຈະ​ສືບ​ຕໍ່​ໄປ​ຢູ່.”

ພວກ​ນັກ​ວິ​ເຄາະ ເຫັນ​ພ້ອມ​ກັບ​ຫຼັກ​ຖານ​ທີ່​ພົບ​ເຫັນ​ໃນ​ຫວ່າງ​ມໍ່ໆ​ມາ​ນີ້ ທີ່​ໄດ້​ເປີດ​ເຜີຍ
ເຖິງການ​ສໍ້​ລາດ​ບັງ​ຫຼວງ​ໃນ​ກຸ່ມ​ຜູ້​ໃກ້ຊິດ​ຂອງທ່ານ​ທຣຳ ມັນ​ອາດ​ຈະ​ບໍ່​ມີ​ຜົນ​ກະທົບ
​ໃນ​ທັນທີ ຕໍ່​ພວກ​ທີ່​ສະໜັບສະໜຸນ​ທັງຫຼາຍ. ​ແຕ່​ວ່າ ພວກ​ເຂົາ​ເຈົ້າ​ເຊື່ອ​ວ່າ ການ​ກົດດັນ
​ ທີ່​ເພີ້​ມທະວີຄູນ​ນັ້ນ ອາດ​ຈະ​ປີ້ນ​ທິດ​ທາງ​ຂອງ​ພວກ​ທີ່​ມີ​ສິດ​ປ່ອນ​ບັດທັງຫຼາຍ ທັງຈະ​ເປັນ​
ການ​ລຳບາກ ​ທີ່​ຈະ​ໃຫ້ເລືອກ​ເອົາ​ທ່ານ ກັບຄືນມາ​ສູ່​ອຳນາດ​ອີກ.

ອ່ານ​ຂ່າວ​ນີ້​ເພີ່ມຕື່ມ​ເປັນ​ພາສາ​ອັງກິດ

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG