ອົງການນິລະໂທກຳສາກົນ ກ່າວວ່າ ເຈົ້າໜ້າທີ່ພະແນກຮັກສາຄວາມປອດໄພແຫ່ງຊາດຂອງຊູດານໃຕ້ ໄດ້ທຳການຂັດຂວາງປະຊາຊົນ ດ້ວຍຄວາມຕັ້ງໃຈບໍ່ໃຫ້ເດີນທາງອອກຈາກປະເທດ.
ທ່ານນາງ Elizabeth Deng ນັກຄົ້ນຄວ້າ ຂອງອົງການນິລະໂທດກຳສາກົນ ກ່າວວ່າ ພວກເຈົ້າໜ້າທີ່ຮັກສາຄວາມປອດໄພແຫ່ງຊາດ ໄດ້ມີຄຳສັ່ງໄປຫາສາຍການບິນຕ່າງໆ ບໍ່ອະນຸຍາດໃຫ້ພວກຜູ້ຊາຍຊູດານໃຕ້ ເດີນທາງໄປຕ່າງປະເທດຈາກສະໜາມບິນນາໆຊາດນະຄອນຈູບາ. ທ່ານນາງ Deng ກ່າວວ່າ ອົງການນິລະໂທດກຳສາກົນ ຍັງໄດ້ຮັບລາຍງານຈາກຊູດານໃຕ້ວ່າ ພວກຜູ້ຊາຍຍັງຖືກຂັດຂວາງບໍ່ໃຫ້ເດີນທາງເຂົ້າໄປອູການດາ ໂດຍທາງລົດ ທີ່ເມືອງຊາຍແດນ Nimule.
ທ່ານນາງ Deng ກ່າວວ່າ “ພວກເຮົາໄດ້ຮັບລາຍງານເປັນລຳດັບມາວ່າ ຜູ້ຄົນແມ່ນໄດ້ຮັບຄຳສັ່ງບໍ່ອະນຸຍາດ ໃຫ້ພວກຜູ້ຊາຍຊູດານໃຕ້ ເດີນທາງອອກຈາກປະເທດ. ພວກເຂົາເຈົ້າໄດ້ຖືກບອກໃນທຳນອງທີ່ວ່າ ເຈົ້າເປັນຄົນຊູດານໃຕ້ ເປັນຫຍັງຈຶ່ງເດີນທາງອອກຈາກປະເທດ. ພວກເຈົ້າຕ້ອງໄດ້ຢູ່ທີ່ນີ້ ແລະທຳການສູ້ລົບ ດັ່ງນັ້ນຈຶ່ງເບິ່ງຄືວ່າ ມັນຂ້ອນຂ້າງຈະເປັນລະບົບ.” ທ່ານນາງ Deng ຍັງກ່າວວ່າ ກິດຈະການໃນທຳນອງນີ້ ຈະແຈ້ງແມ່ນເປັນການລະເມີດຕໍ່ສິດທິຕາມລັດຖະທຳມະນູນຂອງປະຊາຊົນ ນັ້ນກໍຄືສິດເສລີພາບໃນການເດີນທາງໄປມາ.
ອົງການນິລະໂທດກຳສາກົນ ຮຽກຮ້ອງໃຫ້ລັດຖະບານ ຮັບປະກັນວ່າ ຜູ້ຄົນສາມາດເດີນ ທາງອອກຈາກປະເທດໂດຍຄ້ຳປະກັນຄວາມປອດໄພໃຫ້ພວກພົນລະເຮືອນ ທີ່ຫລົບໜີຄວາມຮຸນແຮງ ແລະອະນຸຍາດໃຫ້ພວກເຂົາເຈົ້າຊອກຫາບ່ອນລີ້ໄພ ທັງຢູ່ໃນແລະນອກ ຊູດານໃຕ້ໄດ້.
ທ່ານນາງ Deng ກ່າວວ່າ ກຸ່ມຂອງທ່ານນາງແມ່ນຍັງບໍ່ສາມາດທີ່ຈະລົງຄວາມເຫັນໄດ້ກ່ຽວກັບທີ່ມາຂອງຄຳສັ່ງບໍ່ໃຫ້ປະຊາຊົນມີສິດເດີນທາງອອກຈາກປະເທດ ແຕ່ກໍກ່າວວ່າ ລັກສະນະໃນການກະທຳຢ່າງເປັນລະບົບດັ່ງກ່າວ ສະແດງໃຫ້ເຫັນວ່າ ຄຳສັ່ງນີ້ອາດມາຈາກເຈົ້າໜ້າທີ່ລະດັບສູງ ຍ້ອນວ່າໄດ້ມີການຈັດຕັ້ງປະຕິບັດໂດຍເຈົ້າໜ້າທີ່ກວດຄົນເຂົ້າເມືອງແລະເຈົ້າໜ້າທີ່ຮັກສາຄວາມປອດໄພແຫ່ງຊາດ
