ກຸ່ມປົກປ້ອງສິດທິມະນຸດກຸ່ມນຶ່ງ ກ່າວວ່າ ຕົນມີຫລັກຖານໃໝ່
ກ່ຽວກັບ “ການສັງຫານແບບປະຫານຊີວິດ” ໂດຍກຳລັງ
ປະກອບອາວຸດນິຍົມຣັດເຊຍຢູ່ໃນພາກຕາເວັນອອກຂອງ
ຢູເຄຣນ ແລະ ກຳລັງຮຽກຮ້ອງໃຫ້ມີການຮັບເອົາຄວາມຮັບ
ຜິດຊອບຫຼາຍຂຶ້ນ ຕໍ່ການລະເມີດສິດທິມະນຸດ ຕ່າງໆ ຢູ່ໃນ
ບັນຫາຂັດແຍ້ງຢູເຄຣນນັ້ນ.
ອົງການນິລະໂທດກຳສາກົນ ຫຼື Amnesty International
ກ່າວວ່າ ຫລັກຖານດັ່ງກ່າວ ເປັນຕົວບົ່ງບອກໃໝ່ ຂອງວິກິດ
ການດ້ານສິດທິມະນຸດ ທີ່ພວມເພີ້ມຄວາມຮຸນແຮງຂຶ້ນ ຢູ້ໃນ
ພາກຕາເວັນອອກຂອງຢູເຄຣນ ບ່ອນທີ່ພວກແບ່ງແຍກດິນແດນ
ທີ່ໜຸນຫລັງໂດຍ ຣັດເຊຍ ໄດ້ທຳການຕໍ່ສູ້ກັບກອງກຳລັງຮັກສາຄວາມສະຫງົບຢູເຄຣນ ເປັນເວລານຶ່ງປີຜ່ານມາ.
ອົງການນິລະໂທດກຳສາກົນ ກ່າວວ່າ ຕົນໄດ້ທົບທວນເບິ່ງພາບວີດີໂອ ທີ່ສະແດງໃຫ້ເຫັນ ການຈັບກຸມ ແລະ ການສອບປາກຄຳ ທະຫານຢູເຄຣນ ທ້າວ Ihor Branovytsky ໂດຍ
ພວກກະບົດນິຍົມຣັດເຊຍ. ອົງການນິລະໂທດກຳສາກົນ ກ່າວວ່າ ລາວໄດ້ຖືກຂ້າຕາຍ
ໃນເວລາຕໍ່ມາ ຂະນະທີ່ຖືກຄຸມຂັງຢູ່ນັ້ນ.
ອົງການນິລະໂທດກຳສາກົນ ກ່າວອີກວ່າ ຕົນໄດ້ເບິ່ງວີດີໂອທີ່ບັນທຶກພາບການຄຸມຂັງ
ແລະ ພາບຖ່າຍຊາກສົບຕ່າງໆ ຂອງທະຫານຢູເຄຣນອີກຢ່າງນ້ອຍສາມຄົນ ແລະກ່າວວ່າ
ຊາກສົບເຫຼົ່ານັ້ນ ມີຮ່ອງ ຮອຍຂອງຮູລູກປືນຫຼາຍລູກ ຢູ່ທີ່ຫົວ ແລະ ສ່ວນເທິງຂອງຮ່າງກ່າຍ ຊຶ່ງມີລາຍງານວ່າ ຊາກສົບເຫຼົ່ານັ້ນແມ່ນໄດ້ຖືກນຳໄປໄວ້ຢູ່ໃນໂຮງເຢັນໃນເມືອງ Donetsk ຊຶ່ງເປັນເຂດທີ່ໝັ້ນຂອງພວກກະບົດ. ພວກທະຫານດັ່ງກ່າວ ຖືກຈັບໄດ້ໂດຍກອງກຳລັງທີ່ນິຍົມຣັດເຊຍ ຢູ່ໃນເມືອງ Debaltseve ລະຫວ່າງ ວັນທີ 12 ຫາ 18 ກຸມພາ.
ການເປີດເຜີຍເລື້ອງດັ່ງກ່າວມີຂຶ້ນ ຫຼັງຈາກທີ່ມີລາຍງານ ຢູ່ໃນ ໜັງສືພິມ Kiev Post ເມື່ອ
ວັນທີ 6 ເມສາຜ່ານມາ ທີ່ມີບົດຄວາມການສຳພາດທາງໂທລະສັບກັບ ຜູ້ນຳຂອງກຳລັງ
ປະກອບອາວຸດນິຍົມຣັດເຊຍ ທີ່ພວມປະຕິບັດການຢູ່ໃນພາກຕາເວັນອອກຂອງຢູເຄຣນ.
ຜູ້ນຳດັ່ງກ່າວ ອ້າງວ່າ ໄດ້ຍິງສັງຫານທະຫານ 15 ຄົນ ລວມທັງທ້າວ Ihor Branovytsky ນຳ.
