ປະຊາຊົນອາເມຣິກັນ ໃຫ້ກຽດ ລະນຶກເຖິງ ທ່ານ ມາຕິນ ລູເທີ ຄິງ (ສະໄລດ໌/ວີດິໂອ)

ຊາວ​ອາ​ເມຣິກັນ ພາກັນ​ໃຫ້​ກຽດ​ລະນຶກ​ເຖິງ​ ຜູ້​ນໍາ​ດ້ານສິດທິ​
ພົນລະ​ເມືອງ ທ່ານ Matin Luther King Jr. ​ໃນ​ວັນ​ຈັນ​ມື້​ນີ້
ຊຶ່ງ​ເປັນ​ວັນພັກ​ລາດ​ຊະ​ການ ທີ່​ສ​ະຫລອງ​ວັນ​ເກີດ​ຂອງ​ທ່ານ.

ທ່ານ King ​ເປັນ​ນັກ​ສອນສາສະໜາ Baptist ຜູ້​ທີ່​ໄດ້​ຕໍ່ສູ້​ກັບ
ການ​ກີດ​ກັ້ນ​ດ້ານ​ຜີ​ວພັນ​ໃນສະໄໜຊຸມ​ປີ 1950 ​ແລະ 1960
ສ່ວນໃຫຍ່​ແລ້ວ ​ແມ່ນ​ຢູ່​ທາງ​ພາກ​ໃຕ້​ຂອງສະຫະລັດ ບ່ອນ​ທີ່​
ຊາວ​ຜີວ​ດໍາ ​ໄດ້​ຮັບ​ການ​ປະຕິບັດ​ຕໍ່ ດ້ວຍຄວາມ​ບໍ່​ທ່ຽງ​ທໍາ
ສະ​ເມີ​ພາບ ​ໃນ​ປະຊາ​ຄົມ ​ແລະ​ບາງ​ຄັ້ງ ​ໄດ້​ເປັນ​ເປົ້າ​ໝາຍ
ຂອງ​ຄວາມ​ຮຸນ​ແຮງ.


ທ່ານ King ​ທີ່​ສະໜັບສະໜຸນ​ສົ່ງ​ເສີມ​ການ​ປະທ້ວງ ທີ່​ບໍ່ໃຊ້ຄວາມ​ຮຸນ​ແຮງ ​ໄດ້​ຖືກ​ສັງຫານ​ໃນ​ປີ 1968 ​ເວລາ​ອາຍຸ​ໄດ້ 39 ປີ​. ປັດ​ຈຸ​ບັນ​ນີ້ ມີ​ອານຸສາ​ວະລີ ​ເພື່ອ​ເປັນ​ກຽດ​ໃຫ້​ແກ່​ທ່ານ ທີ່ນະຄອນຫລວງ ວໍ​ຊິງ​ຕັນ.

ທ່ານ King ​ໄດ້​ມີ​ຊື່​ສຽງ​ສໍາຄັນຂຶ້ນ​ມາ ຫລັງ​ຈາກ​ ​ນໍາພາ​ປະ​ທ້ວງ ຢ່າງ​ເປັນ​ຜົນ​ສໍາ​ເລັດ ຕ້ານ​ການ​ແບ່ງ​ແຍກ​ຜີວພັນ ຢູ່​ທີ່​ເທິ່ງລົດ​ເມ ​ໃນ​ເມືອງ Montgomery ລັດ Alabama. ພາຍ​ໃຕ້​ລະ​ບົບດັ່ງກ່າວ ຄົນ​ຜິວ​ດໍາ ຕ້ອງ​ໄດ້​ນັ່ງ​ຢູ່​ທາງ​ຫລັງ​ຂອງ​ລົດ​ເມ ​ແລະຖ້າ​ຫາກ​ວ່າ ລົດ​ເມ​ເຕັມ ​ເຂົາ​ເຈົ້າ​ຕ້ອງ​ໄດ້​ລຸກຢືນ ເອົາ​ບ່ອນໃຫ້​ຄົນ​ຂາວ​ນັ່ງ​.

ກົດໝາຍສະບັບ​ສໍາຄັນວ່າ​ດ້ວຍ​ສິດທິ​ພົນລະ​ເມືອງ ​ທີ່ມີ​ການ​ຮັບ​ຜ່ານ​ເອົາໃນ​ປີ 1964 ​ເຮັດ​ໃຫ້ການແບ່ງ​ແຍກ​ຜີວພັນ ຜິດ​ກົດໝາຍ. ​ໃນ​ປີ​ດຽວ​ກັນນັ້ນ ທ່ານ King ​ກໍ​ໄດ້​ຮັບ​ລາງວັນ Nobel ຂະ​ແໜງສັນ​ຕິ​ພາບ.​