ລິ້ງ ສຳຫລັບເຂົ້າຫາ

ວັນພຸດ, 17 ສິງຫາ 2022

ປະຊາຊົນໃນ ສະຫະລັດ ເລີ່ມຊື້ເຄື່ອງ ທີ່ຫຼຸດລາຄາຢ່າງຫຼວງຫຼາຍ ໃນວັນ Black Friday 


ປະຊາຊົນຢືນລຽນແຖວຊື້ເຄື່ອງຢູ່ຫ້າງຊັບພະສິນຄ້າ ໄທສັນ ຄໍເນີ.

ວັນພະຫັດວານນີ້ແມ່ນວັນຂອບຄຸນພະເຈົ້າ ຫຼື Thanksgiving day ໃນ ສະຫະລັດ, ຄອບຄົວຂອງຄົນ ອາເມຣິກັນ ສ່ວນຫຼາຍຈະເຕົ້າໂຮມກັນ ແລະ ກິນເຂົ້າຮ່ວມກັນໃນວັນທີ່ສຳຄັນດັ່ງກ່າວ, ເຊິ່ງອາຫານຫຼັກຂອງມື້ນັ້ນຈະແມ່ນໄກ່ງວງ.

ແຕ່ນຶ່ງວັນຫຼັງຈາກວັນບຸນດັ່ງກ່າວກໍຈະເປັນວັນ Black Friday ຫຼື ວັນສຸກມືດ, ເຊິ່ງຕາມປະເພນີແລ້ວວັນທີ່ວ່ານັ້ນເປັນຂີດໝາຍຂອງການເລີ່ມຕົ້ນລະດູການຊັອບປິ້ງບຸນ ຄຣິສມາສ ໃນ ສະຫະ ລັດ. ຮ້ານຂາຍເຄື່ອງຕ່າງໆຈະໂຄສະນາການຫຼຸດລາຄາສິນຄ້າຈຳນວນຫຼວງຫຼາຍ.

ວັນ Black Friday ມັກຈະເປັນວັນທີ່ຄົນຍາດກັນຊື້ເຄື່ອງຫຼາຍທີ່ສຸດໃນ ສະຫະລັດ. ສິນຄ້າທີ່ນິຍົມຊື້ກວ່າໝູ່ກໍຈະເປັນໂທລະພາບ, ເຄື່ອງໃຊ້ອີເລັກໂທຣນິກ ແລະ ເຄື່ອງນຸ່ງ.

ແມ່ຍິງລາວຄົນນຶ່ງຜູ້ທີ່ມີແຜນຈະຊື້ເຄື່ອງໃນວັນດັ່ງກ່າວໄດ້ເວົ້າຕໍ່ພວກເຮົາວ່າ “Black Firday ມື້ນີ້ຂ້ານ້ອຍຈະໄປຊື້ເຄື່ອງກັບໝູ່ຢູ່ຫ້າງ. ຈະໄປຊື້ຈັກເຮັດກາເຟ, ເຄື່ອງສຳອາງກັບເຄື່ອງນຸ່ງ. ຂ້ານ້ອຍມັກຊື້ເຄື່ອງວັນ Black Firday ເພາະວ່າເຄື່ອງຖືກ. ຂ້ານ້ອຍຖ້າຊື້ຈັກເຮັດກາເຟມາຫຼາຍເດືອນແລ້ວ, ເຂົາເຈົ້າຫຼຸດລາຄາ 200 ດອນ ຈາກລາຄາປົກກະຕິ 900 ດອນ. ຂ້ານ້ອຍບໍ່ໄດ້ມີເງິນຫຼາຍດອກ ແຕ່ຢາກຊື້ໃຫ້ເປັນຂອງຂວັນຕົນເອງ ເພາະວ່າເຮັດວຽກມາໝົດປີແລ້ວ ກະເລີຍຢາກໄດ້ຈັກກາເຟເປັນຂອງຂວັນໂຕເອງ. ປີນີ້ໄດ້ອອກມາເລາະຊື້ເພາະວ່າໄດ້ສັກຢາກັນໂຄວິດຄົບແລ້ວ, ແຕ່ກະລະວັງໂຕເອງຢູ່.”

ບາງຄົນທີ່ບໍ່ຢາກອອກບ້ານໄປຊື້ເຄື່ອງຢູ່ຮ້ານ, ເຂົາເຈົ້າກໍຈະສັ່ງຊື້ທາງອອນໄລນ໌ ເພາະວ່າລາຄາກໍຈະຄືກັນ ແລະ ບໍ່ຕ້ອງໄດ້ໄປລຽນແຖວຊື້ກັບຄົນອື່ນໆ. ນອກຈາກນັ້ນ, ປີນີ້ປະຊາຊົນ ອາເມຣິກັນ ແມ່ນມີອິດສະຫຼະພາບໃນການອອກບ້ານຫຼາຍຂຶ້ນ ຍ້ອນຫຼາຍຄົນແມ່ນໄດ້ສັກຢາກັນ COVID-19 ແລ້ວ, ແລະ ມາດຕະການຫ້າມຕ່າງໆ ກໍໄດ້ຖືກຍົກເລີກໄປສ່ວນຫຼາຍ.

ຫຼັງຈາກບຸນ Thanksgiving, ປະຊາຊົນ ອາເມຣິກັນ ກໍຈະກຽມສະເຫຼີມສະ ຫຼອງບຸນ ຄຣິສມາສ, ເຊິ່ງແມ່ນບຸນທີ່ສຳຄັນທີ່ສຸດສຳລັບຊາວ ຄຣິສຕຽນ.

ທ່ານອາດຈະມັກເລື້ອງນີ້ຄືກັນ

XS
SM
MD
LG