ຊາຍໜຸ່ມອາເມຣິກັນ ທີ່ຖືກຕັດສິນລົງໂທດ ໃຫ້ເຮັດວຽກອອກ
ແຮງງານໜັກ ຢູ່ຄ້າຍສັບພະທຸກເປັນເວລາ 6 ປີ ໃນເກົາຫຼີເໜືອ
ໄດ້ບັນລະຍາຍເຖິງຊີວິດໃໝ່ຂອງລາວວ່າ ບໍ່ສາມາດພົບກັບຜູ້ໃດ
ຢູ່ໃນປະເທດຄອມມິວນິສທີ່ໂດດດ່ຽວດັ່ງກ່າວ.
ທ້າວ Matthew Miller ໄດ້ໂອ້ລົມກັບອົງການຂ່າວ AP ໃນວັນ
ພະຫັດມື້ນີ້ ຊຶ່ງເປັນມື້ທຳອິດຂອງການຮັບໃຊ້ໂທດຂອງລາວ ຫຼັງ
ຈາກທີ່ໄດ້ຖືກພົບເຫັນວ່າມີຄວາມຜິດ ໃນຂໍ້ຫາການກະທຳທີ່ເປັນ
“ປໍລະປັກ” ຕໍ່ຕ້ານລັດ.
ທ້າວ Miller ທີ່ໂກນຫົວ ແລະໃສ່ຊຸດນັກໂທດສີຂີ້ເທົ່າ ໄດ້ກ່າວວ່າ
ລາວຖືກບັງຄັບໃຫ້ເຮັດວຽກ 8 ຊົ່ວໂມງຕໍ່ມື້ ໂດຍຂຸດດິນໃນສວນແຕ່ວ່າ ສຸຂະພາບຂອງ
ລາວ ບໍ່ໄດ້ຊຸດໂຊມລົງແຕ່ຢ່າງໃດ.
ທ້າວ Miller ເວົ້າວ່າ “ຊີວິດຢູ່ໃນຄຸກ ແມ່ນເຮັດວຽກ 8 ຊົ່ວໂມງຕໍ່ມື້. ສ່ວນໃຫຍ່ແລ້ວ
ມັນເປັນການປູກຝັງທາງກະສິກຳ ຄືເຮັດວຽກຢູ່ກັບດິນ ຂຸດໄປຂຸດມາ. ນອກຈາກ
ນັ້ນແລ້ວ ແມ່ນການຢູ່ຕາມລຳພັງແບບໂດດ ດ່ຽວ ບໍ່ໃຫ້ພົບກັບຜູ້ໃດເລີຍ. ແຕ່
ສຸຂະພາບຂ້ອຍດີຢູ່ ບໍ່ປ່ວຍ ບໍ່ເຈັບ ຫຍັງ.”
ທ້າວ Miller ກ່າວອີກວ່າ ລາວໄດ້ຮ້ອງຂໍຄວາມຊ່ວຍເຫຼືອໃນຈົດ ໝາຍຫຼາຍໆສະບັບ ທີ່ສົ່ງເຖິງສະຕີໝາຍເລກນຶ່ງທ່ານນາງ Michelle Obama ແລະ ລັດຖະມົນຕີຕ່າງປະເທດ ທ່ານ John Kerry ພ້ອມກັນກັບ ຜູ້ດຳລົງຕຳແໜ່ງກ່ອນໜ້ານີ້ ຄືທ່ານນາງ Hillary Clinton ນັ້ນ.
ເກົາຫຼີເໜືອ ຍັງກັກຂັງຊາວອາເມຣິກັນອີກ 2 ຄົນ. ເຊື່ອກັນວ່າເກົາຫຼີເໜືອຫາທາງທີ່ຈະໃຫ້ມີການເດີນທາງໄປຢ້ຽມຢາມ ໂດຍເຈົ້າໜ້າທີ່ລະດັບສູງສະຫະລັດ ເພື່ອຊ່ວຍເຈລະຈາຕົກລົງການໃຫ້ປ່ອຍຕົວພວກກ່ຽວນັ້ນ.
ທ້າວ Miller ໄວ 25 ປີ ໄດ້ຖືກຈັບກຸມ ໃນເດືອນເມສາຜ່ານມາ ຫຼັງ ຈາກທີ່ໄດ້ຈີກວີຊາຂອງລາວຖິ້ມຢູ່ທີ່ກົມກວດຄົນເຂົ້າເມືອງ ແລະໄດ້ຮຽກຮ້ອງຂໍຢູ່ລີ້ໄພໃນເກົາຫຼີເໜືອ. ອົງການຂ່າວຂອງທາງການເກົາຫລີ ເໜືອກ່າວຫາລາວວ່າ ພະຍາຍາມແຊກຊຶມເຂົ້າໃນຄຸກຂອງເກົາຫຼີເໜືອ ຢ່າງລັບໆ.
