ລິ້ງ ສຳຫລັບເຂົ້າຫາ

logo-print

ຊາວອາເມຣິກັນ ສະຫລອງ ວັນເກີດ ຄົບຮອບ 238 ປີ (ວີ​ດີ​ໂອ/ສະໄລດ໌)


Happy Birthday America!

ວັນ​ສຸກ​ມື້​ນີ້ ຊາວ​ອາ​ເມຣິກັນ​ໃນ​ທົ່ວ​ປະ​ເທດ ກໍ​ຄື​ທົ່ວ​ໂລກ ພາກັນ​ ສະຫລອງ​ວັນຊາດ ​ ​ວັນ​ເອກະ​ລາດ ຫລືວັນເກີດ ​ປີ​ທີ 238 ຂອງ​ປະ​ເທດ​ຂອງ​ເຂົາ​ເຈົ້າ ທີ່​ເອີ້ນ​ກັນວ່າ ສະຫະລັດ​ອາ​ເມຣິກາ ຊຶ່ງ​ມີ​ຄວາ​ມ​ເປັນ​ມາ​ແນວ​ໃດ ​ຫລື​ວ່າ ​ເຂົາ​ເຈົ້າ​ສະ​ເຫລີ​ມສະຫລອງ​ກັນ​ແນວ​ໃດ​ນັ້ນ ດາຣາມີເລື້ອງ​ລາວ​ມາ​ເລົ່າຫຍໍ້ໆ ສູ່​ທ່ານ​ຟັງ.

ລິງໂດຍກົງ

ວັນ ​ທີ 4 ກໍລະກົດ ປີ 1776 ​ແມ່ນ​ວັນທີ່​ຊາວອາ​ເມຣິກັນ ປະກາດ​ຕົນ​ເປັນ​ເອກະລາດ ຈາ​ກ ການ​ເປັນ​ຫົວ​ເມືອງ​ຂຶ້ນ​ຂອງ​ລາດ​ຊະ​ອານາຈັກ​ອັງກິດ ປະ​ເທດ​ທີ່​ບັນພະບຸລຸດ​ຂອງພວກ​ເຂົາ​ເຈົ້າ​ໜີ​ຈາກ​ມາ ເມື່ອປະມານ 100 ປາຍປີກ່ອນໜ້າ​ນັ້ນ ເພື່ອ​ຫລົບໜີ​ການ​ປະ​ຫັດ​ປະຫານ​ທາງ​ສາສະໜາ ​ເພາະວ່າ​ກະສັດຂອງ​ອັງກິດ ​ບໍ່​ອະນຸຍາດ​ໃຫ້​ເຂົ​າ​ເຈົ້າ​ໄດ້​ນັບຖື ສາສະໜາ​ທີ່​ເຂົາ​ເຈົ້າ​ເຫລື້ອມ​ໃສ​ແລະ​ສັດທາ.

ຊາວ​ອັງກິດ​ຈຸ​ທຳ​ອິດ ​ທີ່​ເອີ້ນ​ວ່າ ຊາວ pilgrims ຫລື​ພວກ​ສະ​ແຫວ​ງບຸນ ໄດ້​ພາກັນ​ສ່ຽງ​ຕາຍ​ເດີນທາງຂ້າມ​ມະຫາ​ສະມຸດ​ແອັດ​ແລນ​ຕິກ ມາໃນ​ກາງ​ສັດຕະວັດ ທີ່ 17 ຫລື​ກາງ​ຊຸມ​ປີ 1600 ມາຮອດ​ບ່ອນ​ທີ່​ດຽວ​ນີ້ ​ເອີ້ນ​ວ່າ​ເມືອງ Plymouth ລັດ Massachusetts ທາງ​ພາກ​ຕາ​ເວັນ​ອອກ​ສຽງເໜືອ​ຂອງ​ສະຫະລັດ. ການ​ມາ​ຕັ້ງ​ຖິ່ນ​ຖານ​ໃໝ່​ຢູ່​ໃນ​ດິນ​ແດນ​ໃໝ່ ທີ່​ເອີ້ນ​ວ່າ the new World ຫລື​ໂລກ​ໃໝ່ແຫ່ງ​ນີ້ ​ແມ່ນ​ເຕັມ​ໄປ​ດ້ວຍ​ຄວາມ​ລຳ​ບາກ ​ຈົນຫລາຍໆ​ຄົນ​ເອົາ​ຊີວິດ​ບໍ່​ລອດ ຈົນ​ກະ​ທັງ​ເຂົາ​ເຈົ້າ​ໄດ້​ພົບ​ກັບ ​ຊົນ​ເຜົ່າ​ພຶ້ນ​ເມືອງ​ທີ່​ອາ​ໄສ​ຢູ່​ໃນ​ດິນ​ແດນ​ແຫ່ງ​ນີ້​ມາ​ກ່ອນ ກໍ​ຄື​ຊົນ​ເຜົ່າ​ ອິນ​ເດຍ​ແດງ ຫລື American Indians ຊຶ່ງ​ດຽວ​ນີ້​ເອີ້ນ​ວ່າ Native Americans ຫລື​ຊາວ​ອາ​ເມຣິກັນ​ພື້ນ​ເມືອງ ທີ່​ໄດ້​ຊ່ວຍ​ສອນ​ວິທີ​ຫາ​ຢູ່​ຫາ​ກິນ​ຕາມ​ປ່າ​ຕາມ​ດົງ​ໃຫ້​ເຂົາ​ເຈົ້າ ຈົນ​ຜ່ານ​ພົ້ນ​ລະດູ​ໜາວ​ທີ່ກັນດານເອົາ​ຊີວິດ​ລອດ​ມາ​ໄດ້.

​ຈາກ​ນັ້ນ ຊາວ​ອັງກິດແລະ​ຊາວ​ຢູ​ໂຣບຈຸ​ຕໍ່ໆ​ໄປ​ ກໍຕິດຕາມມາ​ຢູ່ນຳ ​ໃນ​ຈຳນວນ​ທີ່​ຫລວງ
ຫລາຍ​ຂຶ້ນ ເຊັ່ນ​ດຽວ​ກັນ​ກັບ​ທະຫານ​ອັງກິດ ທີ່​ຕິດຕາມ​ມາ​ຄວບ​ຄຸມ​ແລະ​ປົກຄອງ ​ເພາະ​ລາດ​ຊະ​ອານາຈັກ​ອັງກິດ​ຍັງ​ຖື​ວ່າ​ ພວກ​ເຂົາ​ເຈົ້າ​ເປັນ​ພົນລະ​ເມືອງ​ຂອງ​ຕົນ​ຢູ່. ຊາວ​ອັງກິດ​ທີ່​ຫລົບໜີ​ມາກໍ​ໄດ້​ພາກັນ ​ຍົກຍ້າຍ​ລົງ​ມາ​ທາງ​ທິດໃຕ້ ​ຕັ້ງ​ຖິ່ນ​ຖານ​ຢູ່​ບ່ອນ​ໃໝ່ ເລາະ​ຕາມ​ແຄມ​ຝັ່ງ​ມະຫາ​ສະມຸດ​ແອັດ​ແລນ​ຕິກ ຈົນ​ເພີ້​ມຂຶ້ນ​ເປັນຮອດ 13 ອານາ​ນິຄົມ ທີ່​ຕົກ​ເປັນຫົວ​ເມືອງຂຶ້ນ​ຂອງ​ອັງກິດ ຖືກເກັບພາສີຖືກກົດ​ຂີ່​ຂົ່ມ​ເຫັງ​ຕ່າງ​ໆ​ນາໆ ​ໂດຍ​ທີ່​ບໍ່​ມີ​ຜູ້ແທນ​ຕາງໜ້າ​ໃນ​ລະບົບ​ການປົກຄອງ ບໍ່​ມີ​ສິດ​ມີ​ສຽງ​ໃນ​ເລື້ອງ​ໃດໆ​ທັງສີ້​ນ ​ແລະ​ນັ້ນ​ເອງ​ພາ​ໃຫ້​ເຂົາ​ເຈົ້າ​ລຸກ​ຮື​ຂຶ້ນ ປະກາດ​ຕົນ​ເອງ​ເປັນ​ເອກະລາດ ​ໃນ​ວັນທີ 4 ກໍລະກົດ ປີ 1776 ​ແລະ​ໃສ່​ຊື່ວ່າ the United States of America ກໍ​ຄື​ສະຫະລັດ​ອາ​ເມຣິກາ​ ​ເພາະວ່າໃນນຕອນ​ນັ້ນ ມີ 13 ລັດ​ຮ່ວມ​ກັນ​ ສະຖາປະນາ​ເປັນ​ປະ​ເທດ​ຂຶ້ນ.

ເບິ່ງວີດີໂອ ກ່ຽວກັບ ໃບປະກາດເອກະລາດ ຂອງອາເມຣິກາ:

ໃນ​ມື້​ນີ້ ຊາວ​ອາ​ເມຣິກັນພາກັນ​ສະ​ເຫລີ​ມສະຫລອງ​ຢ່າງ​ມ່ວນ​ຊື່ນ. ຢູ່​ຕາມ​ຫົວ​ເມືອງ​ນ້ອຍ​ໃຫຍ່ ​ແມ່ນ​ຈະ​ມີ​ການ​ສວນສະໜາມ ທີ່​ຜູ້​ປະກອບ ສ່ວນພາກັນ​ນຸ່ງ​ເຄື່ອງ​ຊຸດ​ສະ​ໄມ​ຫົວ​ເມືອງ​ຂຶ້ນ. ບາງ​ແຫ່ງ​ກໍ​ຈະ​ມີ​ການສະ​ແດງ​ລະຄອນ​ກ່ຽວ​ກັບ​ຕອນ​ໃດ​ຕອນ​ນຶ່ງ​ທີ່​ສຳຄັນ​ຂອງປະຫວັດ
ສາດ ການ​ຕໍ່ສູ້​ເພື່ອ​ສະຖາປະນາ​ປະ​ເທດ​ນີ້​ຂຶ້ນ​ມາ. ຊາວ​ອາ​ເມຣິກັນສ່ວນ​ໃຫຍ່​ແມ່ນ​ຈະພາກັນ
​ໄປປິກ​ນິກ​ຊຸມ​ເຂົ້າ​ກັນ​ຕອນ​ກາງ​ເວັນ ຢູ່ຕາມ​ສວນສາທາລະນະ ​ແລ້ວ​ກໍ​ຫລິ້ນ​ກິລາ​ກັນມ່ວນໆ.

ການຍິງບັ້ງໄຟດອກ ສະຫລອງ ວັນເອກະລາດຂອງອາເມຣິກາ ຢູ່ທາງຫລັງອານຸສາວະລີນາງເສລີພາບ ທີ່ອ່າວ ຮັດສັນ ນອກຝັ່ງນະຄອນນິວຢອກ.
ການຍິງບັ້ງໄຟດອກ ສະຫລອງ ວັນເອກະລາດຂອງອາເມຣິກາ ຢູ່ທາງຫລັງອານຸສາວະລີນາງເສລີພາບ ທີ່ອ່າວ ຮັດສັນ ນອກຝັ່ງນະຄອນນິວຢອກ.

ພໍ​ແລງ​ໆ​ມາກໍ​ພາກັນ​ໄປ​ຊົມ​ການສະ​ແດງ​ຄອນ​ເສີດດົນຕີ ດ້ວຍ​ບັນດາ​ນັກ​ຮ້ອງ​ຊື່​ດັງ ທີ່ພາກັນມາ​ຮ້ອງ​ເພງ​ຮັກ​ຊາດ​ແລະ​ສະດຸ​ດີ​ປະ​ເທດ​ຂອງ​ເຂົາ​ເຈົ້າ ຊຶ່ງ​ທາງ​ການຈັດ​ຂຶ້ນຢູ່​ກາງ​ແຈ້ງ ​ເຊັ່ນ​ຢູ່ເດິ່ນສະໜາມ​ຫລວງ​ໃນ​ນະຄອນຫລວງວໍ​ຊິງ​ຕັນ​ດີ​ຊີ ຫລືຢູຸ່ຈະຕຸ​ລັດ Time Square ທີ່​ນະຄອນ​ນິວຢອກ ​ແລະ​ແຄມ​ແມ່​ນໍ້າ Hudson ແລະ​ປິດ​ທ້າຍ​ດ້ວຍ​ການ​ຈູດ​ບັ້ງ​ໄຟ​ດອກ ຢ່າງ​ສວຍ​ງາມ​ແລະ​ໜ້າ​ຕື່ນ​ຕາ​ຕື່ນ​ໃຈ.

ສ່ວນ​ຊາວ​ລາວ​ອາ​ເມຣິກັນ​ແລະ​ຊົນ​ຊາດ​ອື່ນໆ​ທີ່​ເຂົ້າ​ມາ​ອາ​ໄສ​ຢູ່​ໃນ​ປະ​ເທດ​ນີ້ ກໍ​ພາກັນສະ​ເຫລີ​ມສະຫລອງ​ຕາມ​ທີ່​ຊາວ​ອ​ເມ​ຮິ​ກັນ​ເຮັດ​ກັນ. ບາງ​ປະຊາ​ຄົມ​ກໍ​ໃຊ້​ໂອກາດ​ນີ້ ​ຈັດ​ບຸນ​ເຕົ້າ​ໂຮມ​ເຄືອ​ຍາດ ເຊັ່ນ​ຢູ່​ວັດ​ລາວ​ພຸດ​ທະ​ວົງ ທີ່​ເມືອງ Catlett ລັດ​ເວີ​ຈີ​ເນຍ ທີ່​ຈັດ​ງານ​ນີ້​ເປັນ​ປະຈຳ​ທຸກໆ​ ມີຄົນ​ລາວ​ຈຳນວນ​ຫລວງຫລາຍ​ຈາກ​ທົ່ວ​ສະຫະລັດ ມາ​ຮ່ວມ​ງານ ຊຶ່ງ​ມີ​ທັງ​ພິທີ​ທາງ​ສາສະໜາ ຕະຫລາດນັດ ​ແລະ​ຄອນ​ເສີດ​ດົນຕີ.

ຂະນະ​ທີ່​ເຮົາ​ອອກ​ອາກາດ​ຢູ່​ນີ້ ​ແມ່ນ​ເວລາ​ປະມານ 8 ​ໂມງ 45 ນາທີ​ ຕອນ​ເຊົ້າ​ທາງ​ຝັ່ງ​ຕາ​
ເວັນ​ອອກ​ຂອງ​ສະຫະລັດ ​ແລະ​ເຊົ້າ​ກ່ວາ​ນັ້ນ​ອີກ ທາງ​ພາກ​ກາງ​ແລະ​ກ້ຳ​ຕາ​ເວັນ​ຕົກ ສະ​ນັ້ນ ການສະ​ເຫລີ​ມສະຫລອງ​ສ່ວນ​ໃຫຍ່​ກໍ​ແມ່ນ​ຍັງ​ບໍ່​ທັນ​ເລີ້ມ​ຂຶ້ນ​ເທື່ອ ​ຈົນ​ກ່ວາ​ອີກ​ສອງສາມ​ຊົ່ວ​ໂມງ​ຂ້າງ​ໜ້າ. ​ໂດຍ​ລວມ​ແລ້ວ ການ​ສະຫລອງ​ໃນ​ມື້​ນີ້​ແມ່ນ​ຈະຄຶກຄັກມ່ວນ​ຊຶ່ນ ​ແລະ​ເຕັມ
ໄປດ້ວຍບັນຍາ​ກາດ​ແຫ່ງ​ນໍ້າ​ໃຈຮັກ​ຊາດ ​ແລະ​ພູມ​ໃຈ​ໃນ​ຄວາມ​ເປັນ​ຄົນ​ອາ​ເມ​ຣິກັນ ​ເປັນ​ພົນລະ​ເມືອງ​ຂອງ​ປະ​ເທດ​ທີ່​ເສລີມີ​ປະຊາທິປະ​ໄຕ​ແຫ່ງ​ນີ້. ​ເພື່ອ​ສະ​ແດງ​ເຖິງ​ຄວາມ​ພູມ​ໃຈ​ດັ່ງກ່າວ​ນີ້ ຊາວ​ອາ​ເມຣິກັນຈະ​ພາກັນ​ເອ້ຍ້ອງ​ແລະ​ຕົກ​ແຕ່ງ​ດ້ວຍສີ ​ແດງ ຂາວ ​ແລະ​ຟ້າ​ແກ່ ຫລື red white and blue ອັນ​ເປັນ​ສີຂອງ​ທຸງຊາດ​ຂອງ​ເຈົ້າ ​ແລ​ະພາກັນ​ຮ້ອງ​ເພງ​ສະດຸ​ດີ​ປະ​ເທດ​ຂອງ​ເຂົາ​ເຈົ້າ ​ເຊັ່ນ​ເພງ​ນີ້​ຂອງນັກ​ຮ້ອງ​ລູກ​ທົ່ງ​ຊື່​ດັງ Lee Greenwood – God Bless the USA. ຂ້າພ​ເຈົ້າ​ຂໍ​ອຳ​ລາ​ທ່ານ​ໄປ​ພ້ອມ​ກັບ​ເພງ​ນີ້​ເລີຍ ສຸກ​ສັນ​ວັນ​ເກີດ ອາ​ເມຣິກາ Happy Birthday. Happy July 4th!

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG