ອີຄອມເມີຣສ໌ ລາຍໃຫຍ່ຂອງ ສະຫະລັດ ກໍຄື ບໍລິສັດ ອາມາຊອນ ກຳລັງຢູ່ໃນລະຫວ່າງການພັດທະນາແວ່ນຕາອັດສະລິຍະ ຫຼື smart glasses ສຳລັບຄົນຂັບລົດສົ່ງສິນຄ້າຂອງບໍລິສັດ ເພື່ອຊ່ອຍນຳທາງລົດຂົນສົ່ງຢ່າງ ປອດໄພ ແລະວ່ອງໄວຂຶ້ນ ໂດຍອ້າງຈາກຜູ້ກ່ຽວຂ້ອງກັບໂຄງການດັ່ງກ່າວ ຢ່າງໜ້ອຍ 5 ຄົນທີ່ໃຫ້ຂໍ້ມູນຕໍ່ອົງການຂ່າວຣອຍເຕີສ.
ບໍລິສັດ ອາມາຊອນ ໄດ້ເລັ່ງຍົກລະດັບການຈັດສົ່ງສິນຄ້າທີ່ວ່ອງໄວຂຶນກວ່າເກົ່າ ດ້ວຍເທັກໂນໂລຈີແວ່ນຕາອັດສະລິຍະນີ້ ທີ່ຈະຊ່ອຍບອກເສັ້ນທາງຈັດສົ່ງຢ່າງ ລະອຽດທຸກຈຸດລ້ຽວໂຄ້ງ ຢູ່ເທິງໜ້າຈໍຂະໜາດນ້ອຍໆໃນແວ່ນຕາ ທີ່ລະບຸເສັ້ນ ທາງ ແລະຈະບອກທາງໃຫ້ຜູ້ຂັບລົດສົ່ງສິນຄ້າ ແລະທັງຢູ່ພາຍໃນຕຶກອາຄານ ນຳດ້ວຍ.
ແຫລ່ງຂ່າວທີ່ກ່ຽວຂ້ອງ 5 ຄົນ ບອກອົງການຂ່າວຣອຍເຕີສ ວ່າ ໂຄງການ ແວ່ນຕາອັດສະລິຍະດັ່ງກ່າວ ມີຊື່ວ່າ ອາມີເລຍ (Amelia) ເຊິ່ງຢູ່ໃນລະຫວ່າງ ການພັດທະນາຢູ່ ໂດຍຈະມີໜ້າຕາທີ່ຄ້າຍຄືກັບແວ່ນຕາອັດສະລິຍະ ແອັກໂກ ເຟຣມສ໌ (Echo Frames) ທີ່ເປີດໂຕໄປເມື່ອຫຼາຍປີກ່ອນ ແລະຈະມີໜ້າຈໍ ຂະໜາດນ້ອຍໆຢູ່ໃນເລັນຂອງແວ່ນຕາຂ້າງນຶ່ງ ເພື່ອໃຫ້ຄົນຂັບລົດສົ່ງຄ້າໃຊ້ ບະບົບຈີພີແອສ ໄປໄດ້ໃນໂຕມັນເອງ.
ໂຄງການ ອາມີເລຍ ເປັນການຕອກຢ້ຳເຖິງຄວາມພະຍາຍາມໃນການຫລຸດ ຜ່ອນຕົ້ນທຶນການຂົນສົ່ງສິນຄ້າເພື່ອແຂ່ງຂັນກັບຄູ່ແຂ່ງຢ່າງ ວອລມາດທ໌ (Walmart) ຈາກທີ່ມີການປະເມີນວ່າ ຕົນທຶນການຂົນສົ່ງປະມານເຄິ່ງນຶ່ງຂອງ ການຈັດສົ່ງສິນຄ້ານັ້ນ ຢູ່ທີ່ໄລຍະທາງສຸດທ້າຍໃນການຈັດສົ່ງ ເຊິ່ງເປັນ ການເດີນທາງໄປຕາມຄຸ້ມບ້ານ ຫຼືຕຶກອາຄານຕ່າງໆ ເພື່ອສົ່ງສິນຄ້າທີ່ໃຊ້ນ້ຳມັນ ແລະເວລາໃນການຈັດສົ່ງຢ່າງຫຼວງຫຼາຍ.
ຢ່າງໃດກໍຕາມ ໂຄງການແວ່ນຕາອັດສະລິຍະນີ້ ຍັງມີອຸປະສັກໃນຂ້າງໜ້າ ນັ້ນກໍຄື ອາມາຊອນ ຍັງປະເຊີນກັບບັນຫາໃນການເຮັດໃຫ້ແບດເຕີຣີ ຂອງ ແວ່ນຕານີ້ ໃຊ້ໄດ້ດົນເທົ່າກັບເວລາ 8 ຊົ່ວໂມງເຕັມ ແລະເຮັດໃຫ້ມີນ້ຳໜັກ ເບົາພໍທີ່ຈະໃສ່ໄດ້ໝົດມື້.
ນອກຈາກນີ້ ອາມາຊອນ ຍັງຕ້ອງຊຸກຍູ້ໃຫ້ຄົນຂັບລົດສົ່ງສິນຄ້າຂອງບໍລິສັດ ຫັນມາໃສ່ແວ່ນຕານີ້ ເຊິ່ງອາດຈະເປັນການລົບກວນສຳລັບຄົນຂັບທີ່ໃສ່ແວ່ນ ຕາທີ່ປັບສາຍຕາໃຫ້ປົກກະຕິໄດ້ ດ້ວຍເຊັ່ນກັນ.
ຟໍຣັມສະແດງຄວາມຄິດເຫັນ