ມືປືນ ທີ່ລະດົມຍິງເຂົ້າໃສ່ ບ່ອນຝຶກຫຼິ້ນເບສບອລ ຂອງລັດຖະສະພາພັກຣີພັບບລີກັນ ໃນວັນພຸດມື້ນີ້ ແມ່ນຜູ້ຕ້ອງຕິ ປະທານາທິບໍດີດໍໂນລ ທຣຳ ຢ່າງແຂງຂັນ ອີງຕາມການລົງຂ່າວທາງສື່ສັງຄົມ ແລະພ້ອມດຽວກັນນັ້ນ ຍັງເຄີຍເປັນອາສາສະໝັກໂຄສະນາຫາສຽງ ໃຫ້ແກ່ສະມາຊິກສະພາສູງທີ່ບໍ່ສັງກັດພັກຈາກລັດເວີມັນທ໌ ທ່ານ Bernie Sanders.
ທ້າວ James Hodgkinson ອາຍຸ 66 ປີ ຈາກເມືອງ of Belleville ລັດ Illinois ໄດ້ຍິງບາດເຈັບ 4 ຄົນ ຮວມທັງສະມາຊິກສະພາຕ່ຳ Steve Scalise ຈາກລັດ Louisiana ແລະບຸກຄົນອື່ນໆອີກ 4 ຄົນໃນການຍິງປືນເຂົ້າໃສ່ ເມື່ອຕອນເຊົ້າວັນພຸດມື້ນີ້ ທີ່ເມືອງອາເລັກຊານເດຣຍ ລັດເວີຈີເນຍ ກ່ອນທີ່ຈະຖືກຍິງຕາຍໂດຍຕຳຫຼວດລັດຖະສະພາສະຫະລັດ ທີ່ໃຫ້ຄວາມຄຸ້ມຄອງແກ່ບັນດາສະມາຊິກສະພາ.
ທ້າວ Hodgkinson ທີ່ມີທຸລະກິດກວດກາບ້ານເຮືອນນັ້ນ ເຄີຍມີປະຫວັດພຽງເລັກນ້ອຍ ແຕ່ກໍຕໍ່ເນື່ອງກັບຕຳຫຼວດ ຮວມທັງການຖືກຈັບຍ້ອນກິນເຫຼົ້າເມົາແລ້ວຂັບລົດ ຂັດຂືນການຖືກຈັບ ແລະການໃຊ້ກໍາລັງພາຍໃນຄອບຄົວ. ນອກນັ້ນ ລາວຍັງເປັນບຸກຄົນທີ່ຕ້ອງຕິພວກນັກການເມືອງຢູ່ວໍຊິງຕັນເປັນປະຈຳ ໂດຍສະເພາະແລ້ວພັກຣີພັບບລີກັນ. ຢູ່ເຟສບຸກ ທ້າວ Hodgkinson ເປັນສະມາຊິກຂອງກຸ່ມທີ່ເອີ້ນຕົນເອງວ່າ ຜູ້ທຳລາຍພັກຣີພັບບລີກັນ.
ເກືອບວ່າເປັນປະຈຳ ທ້າວ Hodgkinson ໄດ້ຂຽນຂໍ້ຄວາມລົງໃນສື່ສັງຄົມແລະມັກໃຊ້ຄຳເວົ້າຕ່ຳຊ້າຕໍ່ຕ້ານທ່ານທຣຳ ຊຶ່ງໃນບາງຄັ້ງແມ່ນຕິດຕາມດ້ວຍຂ່າວທີ່ບໍ່ມີມູນຄວາມຈິງ.
ທ່ານທຣຳມີຄວາມຜິດແລະຄວນຕິດຄຸກຍ້ອນຂາຍຊາດ ນັ້ນແມ່ນນຶ່ງໃນຂໍ້ຄວາມທີ່ຜູ້ກ່ຽວໄດ້ຂຽນລົງໃນເຟສບຸກ. ທ່ານທຣຳແມ່ນເປັນຣັດເຊຍຫຼາຍກວ່າອາເມຣິກັນ ນັ້ນຄືຂໍ້ຄວາມອີກຕອນນຶ່ງ.
ເບິ່ງ ສະມາຊິກສະພາສູງ Bernie Sanders ປະນາມ ການຍິງປືນເຂົ້າໃສ່ດັ່ງກ່າວ
ທ້້າວ Hodgkinson ຍັງເປັນທີ່ປາກົດວ່າ ຍັງເປັນຜູ້ສະໜັບສະໜຸນຢ່າງຂຸ້ນຂ້ຽວຕໍ່ການໂຄສະນາຫາສຽງເປັນປະທານາທິບໍດີ ທີ່ປະສົບກັບຄວາມລົ້ມແຫຼວຂອງທ່ານ Sanders. ໃນການຖະແຫຼງທີ່ຫ້ອງປະຊຸມຂອງສະພາສູງນັ້ນ ທ່ານ Sanders ກ່າວວ່າ ທ່ານໄດ້ຖືກແຈ້ງໃຫ້ແລ້ວວ່າ ທ້າວ Hodgkinson ເປັນບຸກຄົນທີ່ປາກົດວ່າເຄີຍເປັນອາສາສະໝັກໃຫ້ແກ່ການໂຄສະນາຫາສຽງເປັນປະທານາທິບໍດີຂອງຂ້າພະເຈົ້າ. ຂ້າພະເຈົ້າຮູ້ສຶກເປັນທີ່ໜ້າລັງກຽດຕໍ່ການກະທຳນີ້ ແລະຂ້າພະເຈົ້າຂໍປະກາດຢ່າງຈະແຈ້ງ ເທົ່າທີ່ຂ້າພະເຈົ້າສາມາດເວົ້າໄດ້ວ່າ ການກໍ່ຄວາມຮຸນແຮງ ບໍ່ວ່າຊະນິດໃດກໍຕາມ ແມ່ນເປັນທີ່ຮັບເອົາບໍ່ໄດ້ເດັດຂາດ ຢູ່ໃນສັງຄົມຂອງພວກເຮົາ ແລະຂ້າພະເຈົ້າຂໍປະນາມ ການກະທຳນີ້ ດ້ວຍຄຳເວົ້າທີ່ແຮງທີ່ສຸດເທົ່າທີ່ເປັນໄປໄດ້.
ຮູບພາບກ່ຽວກັບຊີວະປະຫວັດຂອງນຶ່ງໃນຫລາຍໆອັນແມ່ນໄດ້ພັນລະນາວ່າທ່ານ Sanders ເປັນສະຫະ ລັດຫລື Uncle Sam. ສ່ວນອີກອັນນຶ່ງກ່າວວ່າ ສັງຄົມນິຍົມເດໂມແຄຣັດໄດ້ອະທິ ບາຍດ້ວຍຄຳເວົ້າສາມຄຳ: ພວກເຮົາປະຊາຊົນ.
ໃນຂໍ້ຄວາມຈຳນວນນຶ່ງທີ່ນຳອອກເຜີຍແຜ່ນັ້ນ ທ້າວ Hodgkinson ຍັງໄດ້ຕ້ອງຕິທ່ານນາງ Hillary Clinton ທີ່ຖືກແຕ່ງຕັ້ງໃຫ້ເປັນຜູ້ສະໝັກປະທານາທິບໍດີຂອງພັກເດໂມແຄຣັດໃນປີ 2016.
ຍັງບໍ່ືທັນເປັນທີ່ຈະແຈ້ງເທື່ອວ່າ ທ້າວ Hodgkinson ຮູ້່ລ່ວງໜ້າຫລືບໍ່ວ່າ ສະມາຊິກສະພາພັກຣີພັບບລີກັນ ຈະພາກັນໄປຊ້ອມຢູ່ເດິ່ນດັ່ງກ່າວ ຫລືແນເປົ້າໝາຍໃສ່ສະມາຊິກສະພາໃດນຶ່ງຢ່າງເປັນການສະເພາະເຈາະຈົງ. ສື່ມວນຊົນຫລາຍໆສະບັບໄດ້ອ້າງຄຳເວົ້າຂອງພວກທີ່ຢູ່ໃກ້ຄຽງທີ່ກ່າວວ່າ ລາວໄດ້ໄປທີ່ YMCA ຊຶ່ງຕັ້ງຢູ່ໃກ້ໆກັບສະຖານທີ່ແຫ່ງນີ້.
ທີ່ກອງປະຊຸມຖະແຫຼງຂ່າວໃນຕອນເຊົ້າມື້ນີ້ ເຈົ້າໜ້າທີ່ຄຸ້ມຄອງກົດໝາຍກ່າວວ່າ ຍັງເປັນການໄວເກີນໄປທີ່ຈະເວົ້າໄດ້ວ່າ ເຫດການດັ່ງກ່າວນີ້ເທົ່າກັບເປັນການໂຈມຕີຂອງພວກກໍ່ການຮ້າຍ.
