ບັນດາຜູ້ສັງເກດການສາກົນ ໄດ້ກ່າວຕໍ່ສະພາຄວາມໝັ້ນຄົງ ສະຫະປະຊາຊາດໃນວັນ ພະຫັດວານນີ້ວ່າ ການລະເມີດຢຸດຍິງ ທີ່ຍັງເຄັ່ງຕຶຶງຢູ່ຕໍ່ມາ ໃນພາກຕາເວັນອອກຂອງ ຢູເຄຣນ ລະຫວ່າງ Kyiv ພວກກະບົດ ທີ່ໜູນຫລັງໂດຍຣັດເຊຍ ໄດ້ມາເຖິງຈຸດ “ທີ່ໜ້າ ຕື່ນຕົກໃຈ” ແບບທີ່ບໍ່ເຄີຍເຫັນມາໃນຮອບຫລາຍເດືອນ.
ທ່ານ Ertugrul Apakan ຫົວໜ້າສັງເກດການຂອງອົງການ OSCE ທີ່ປະຕິ ບັດງານ ສັງເກດການພິເສດ ຢູ່ໃນຢູເຄຣນ ກ່າວວ່າ “ຄວາມຮຸນແຮງຢູ່ພາກຕາເວັນອອກຂອງ ຢູເຄຣນ ອີກຄັ້ງນຶ່ງ ໄດ້ຢູ່ລະດັບສູງສຸດ” ທ່ານກ່າວວ່າ ນັບແຕ່ເດືອນເມສາເປັນຕົ້ນມາ ບັນດາຜູ້ສັງເກດການຂອງທ່ານ ໄດ້ຈົດບັນທຶກໂຕເລກການລະເມີດຢຸດຍິງເປັນຈຳນວນ ສູງສຸດນັບແຕ່ເດືອນສິງຫາປີ 2015 ໃນຂະນະ ທີ່ພວກອາວຸດໜັກ ຊຶ່ງແຕ່ກ່ອນໄດ້ເກັບ ໄວ້ໃນສາງຢ່າງຖາວອນແລະບັນດາບ່ອນເກັບມ້ຽນ ໄດ້ຫາຍສາບສູນໄປ ແລະໄດ້ຖືກພົບ ເຫັນວ່າ ມີການນຳໃຊ້ ຢູ່ໃນເຂດ ແນວໜ້າ.
ທ່ານ Pakan ໄດ້ກ່າວຕໍ່ບັນດາສະມາຊິກສະພາຄວາມໝັ້ນຄົງວ່າ “ພວກເຮົາຕ້ອງການ ໃຫ້ມີການຍຸຕິການເປັນປໍລະປັກກັນ ແລະການຢຸດຍິງແບບຍືນຍົງ.
ທ່ານ Pakan ແລະທ່ານ Martin Sajdik ຜູ້ຕາງໜ້າພິເສດຂອງປະທານອົງການ OSCE ປະຈຳຢູເຄຣນ ແລະຢູ່ໃນກຸ່ມຕິດຕໍ່ສາມຝ່າຍ ກ່າວວ່າ ທັງສອງຝ່າຍ ຕ້ອງນັບຖືການຢຸດ ຍິງ ກ່ອນໜ້າວັນພັກບຸນ Easter ຂອງ Orthodox ທີ່ຈະສິ້ນສຸດລົງໃນວັນອາທິດຈະມາ ເຖິງນີ້. ທ່ານ Sajdik ກ່າວວ່າ “ສະພາບຄວາມປອດໄພຈະຕ້ອງໄດ້ມີການສ້າງຕັ້ງຂຶ້ນ ສຳລັບຜູ້ຄົນທີ່ຢູ່ໃກ້ໆກັບເຂດທີ່ເປັນປໍລະປັກກັນ ແລະບັນດາຜູ້ທີ່ຂ້າມໄປມາຫາກັນໃນ ເຂດແນວໜ້າ ໃນລະຫວ່າງວັນບຸນທີ່ຈະມາເຖິງນີ້.” ນັກການທູດທັງສອງໄດ້ລາຍງານຕໍ່ ສະພາຄວາມໝັ້ນຄົງ ຜ່ານທາງວິດີໂອ ຈາກນະຄອນ Kyiv.
