ສານ ສຫລ ຕັດສິນໂທດ ຈຳຄຸກ ຜູ້ສົມຮູ້ຮ່ວມຄິດ ກັບກຸ່ມກໍ່ການຮ້າຍ

ສານລັດຖະບານກາງຂອງສະຫະລັດແຫ່ງນຶ່ງ ໄດ້ຕັດສິນໂທດ
ຄົນສັນຊາດ Eritrea ໃຫ້ຈໍາຄຸກ ເປັນເວລາຫລາຍກວ່າ 9 ປີ
ຍ້ອນໄດ້ສົມຮູ້ຮ່ວມຄິດກັບ ພວກກໍ່ການຮ້າຍ Al-Shabab
ຢູ່ໃນໂຊມາເລຍ.

ທ້າວ Mohhammed Ibrahim Ahmed ຍອມຮັບຜິດ ໃນປີ
ກາຍນີ້ວ່າໄດ້ຮັບການຝຶກອົບຮົມທາງທະຫານຈາກກຸ່ມອິສລາມຫົວຮຸນແຮງຈັດດັ່ງກ່າວ ແລະວ່າ ໄດ້​ເປັນ​ຜູ້​ຈັດ​ຫາປືນ ແລະກະສຸນ ໃຫ້ແກ່ຜູ້ບັນຊາການພວກກໍ່ການຮ້າຍ Al-Shabab.

ທ້າວ Ahmed ທີ່ເກີດຢູ່ໃນປະເທດ Eritrea ໄດ້ດໍາລົງຊີວິດ ຢູ່ປະເທດສະວີເດັນ ກ່ອນຈະ​
ເດີນທາງໄປຍັງໂຊມາເລຍ. ລາວໄດ້ຖືກຈັບຢູ່ໄນຈີເຣຍ ແລະ ໃນທີ່ສຸດກໍໄດ້ຖືກສົ່ງຕົວ
ໃຫ້ແກ່ເຈົ້າໜ້າທີ່ສະຫະລັດ.

ກຸ່ມກໍ່ການຮ້າຍ Al-Shabab ແມ່ນທໍາການຕໍ່ສູ້ເພື່ອຢາກຫັນປ່ຽນ​ໃຫ້ໂຊມາເລຍ ກາຍເປັນ
ປະເທດອິສລາມ ທີ່ນິຍົມແນວທາງເດີມ. ກຸ່ມດັ່ງກ່າວ​ໄດ້​ຮັບການເສຍໄຊຢ່າງຮ້າຍແຮງ ຍ້ອນ​ນໍ້າມືຂອງກໍາລັງສະຫະພາບອາຟຣິກາ ແຕ່ວ່າກໍຍັງຄວບຄຸມພື້ນທີ່ພາກສ່ວນໃຫຍ່ ຂອງປະເທດດັ່ງກ່າວຢູ່.