ເຫດລະເບີດແຕກ ແລະການຍິງກັນໄດ້ເກີດຂຶ້ນໃນວັນຈັນມື້ນີ້ ທີ່ໂຮງແຮມແຫ່ງນຶ່ງໃນນະຄອນຫຼວງຂອງໂຊມາເລຍ ທີ່ຖືກໂຈມຕີໂດຍກຸ່ມກະບົດ ໃນວັນອາທິດວານນີ້.
ສີ່ຄົນໄດ້ເສຍຊີວິດໄປໃນຕອນກາງຄືນຢູ່ໃນໂຮງແຮມນັ້ນ ອີງຕາມການລາຍງານຂອງອົງການຂ່າວຝຣັ່ງເອເອັຟພີ (AFP).
"ພວກມືປືນທີ່ກໍ່ການຮ້າຍ ຖືກປິດລ້ອມໃຫ້ຢູ່ໃນຫ້ອງນຶ່ງໃນຕຶກໂຮງແຮມ ແລະກຳລັງຮັກສາຄວາມປອດໄພ ກຳລັງຈະຍຸດຕິການປິດລ້ອມໃນໄວໆນີ້... ມາຮອດດຽວນີ້ ພວກເຮົາໄດ້ຢືນຢັນການເສຍຊີວິດຂອງສີ່ຄົນ," ນັ້ນຄືຄຳເວົ້າຂອງທ່ານໂມຮາເມັດ ດາເຮຍ (Mohamed Dahir) ເຈົ້າໜ້າທີ່ຮັກສາຄວາມປອດໄພກ່າວຕໍ່ອົງການຂ່າວ AFP.
ອົງການຂ່າວຣອຍເຕີສ໌ (Reuters) ລາຍງານວ່າ ສະພາແຫ່ງຊາດໂຊມາເລຍໄດ້ຍົກເລີກກອງປະຊຸມ ສໍາລັບທັງສອງສະພາຂອງຕົນ ຍ້ອນການໂຈມຕີໂຮງແຮມຂອງພວກຫົວຮຸນແຮງ.
ພວກຫົວຮຸນແຮງອາລ-ຊາບັບ ໄດ້ທຳການໂຈມຕີແບບສະຫຼັບຊັບຊ້ອນໃສ່ໂຮງ ແຮມວິລລາ ໂຣສຊາ (Villa Rossa) ທີ່ຕັ້ງຢູ່ໃນພື້ນທີ່ ທີ່ມີການຮັັກສາຄວາມປອດໄພ ຢູ່ບໍ່ໄກຈາກທຳນຽບປະທານາທິບໍດີໃນນະຄອນຫລວງໂມກາດີສຊູ ແລະ ຄຸກທີ່ຄຸ້ມຄອງໂດຍອົງການສືບລັບແຫ່ງຊາດ, ອີງຕາມຜູ້ທີ່ເຫັນເຫດການ ແລະຕຳຫຼວດ. ໂຮງແຮມແຫ່ງນັ້ນ ແມ່ນໄດ້ມີເຈົ້າຫນ້າທີ່ລັດຖະບານ ແລະ ນັກການເມືອງເຂົ້າມາພັກຢູ່ເລື້ອຍ.
ບັນດາຜູ້ເຫັນເຫດການໄດ້ເຫັນກຳລັງຮັກສາຄວາມປອດໄພພິເສດ ເຄື່ອນຍ້າຍເຂົ້າໄປຢູ່ໃນເຂດດັ່ງກ່າວ. ຕຳຫຼວດກ່າວວ່າ ພວກເຂົາເຈົ້າໄດ້ຊ່ວຍຊີວິດພົນລະເຮືອນ ແລະເຈົ້າໜ້າທີ່ຫຼາຍຄົນ.
ໃນການລົງຂໍ້ຜ່ານຄວາມທາງສື່ສັງຄົມເທເລແກຣມ (telegram) ນັ້ນ ກຸ່ມຫົວຮຸນແຮງກ່າວວ່າ ພວກນັກລົບຂອງຕົນໄດ້ປະຕິບັດພາລະກິດທະຫານສະຫລະຊີບອັນນຶ່ງ.
ການໂຈມຕີຄັ້ງນີ້ ມີຂຶ້ນໃນຂະນະທີ່ກຳລັງລັດຖະບານໂຊມາເລຍ ທີ່ໄດ້ຮັບການສະໜັບສະໜູນຈາກນັກລົບທ້ອງຖິ່ນ ສືບຕໍ່ໂຈມຕີພວກຫົວຮຸນແຮງໃນລັດເຮີຊາແບລ (Hirshabelle) ແລະລັດກາລມາດັກ (Galmudug).
ນາຍົກລັດຖະມົນຕີໂຊມາເລຍ ທ່ານຮາມຊາ ອັບດີ ບາເຣ (Hamza Abdi Barre) ໃນອາທິດແລ້ວນີ້ ກ່າວວ່າ ກຳລັງຮັກສາຄວາມປອດໄພ ໄດ້ສັງຫານພວກຫົວຮຸນແຮງ 600 ກວ່າຄົນ ແລະເຮັດໃຫ້ບາດເຈັບອີກ 1,200 ຄົນ ໃນສາມເດືອນ ຂອງການປະຕິບັດງານທາງທະຫານ ຕໍ່ກຸ່ມດັ່ງກ່າວ.
