ເຈົ້າໜ້າທີ່ໂຊມາເລຍ ແລະປະຊາຊົນ ໄດ້ຢືນຢັນວ່າ ກອງກຳລັງຂອງລັດຖະບານໂຊມາເລຍແລະກອງທັບເອທິໂອເປຍ ໄດ້ຂັບໄລ່ກຸ່ມ Al-Shabab ອອກຈາກບ້ານ Halgan ຫຼັງຈາກທີ່ໄດ້ປະທະກັນຢ່າງຮ້າຍແຮງໃນວັນພະຫັດມື້ນີ້.
ທ່ານ Guhad Abdi Warsame ຫົວໜ້າບ້ານ ໄດ້ບອກກັບ VOA ວ່າ ມີພວກຫົວຮຸນແຮງ “ສິບກວ່າຄົນ” ໄດ້ຖືກສັງຫານ.
ປະຊາຊົນ ໄດ້ກ່າວວ່າ ລົດລະເບີດສະລະຊີບໄດ້ແຕກຂຶ້ນ ຂ້າງນອກທາງເຂົ້າຄ້າຍທະຫານເອທິໂອເປຍ ຢູ່ໃນບ້ານດັ່ງກ່າວ ຊຶ່ງປະມານ 260 ຫຼັກກິໂລແມັດ ຫ່າງໄປທາງເໜືອຂອງນະຄອນ Mogadishu ຕິດຕາມມາດ້ວຍການໂຈມຕີຢ່າງໜັກຂອງກຸ່ມຫົວຮຸນແຮງທີ່ຕິດ ອາວຸດ.
ຫົວໜ້າບ້ານ ໄດ້ກ່າວວ່າ ກຸ່ມຫົວຮຸນແຮງໄດ້ເປີດສາກໂຈມຕີ 2 ບັ້ນ ຊຶ່ງບັ້ນຫຼັກ ແມ່ນແນເປົ້າໝາຍໃສ່ຄ້າຍທະຫານເອທິໂອເປຍ ທີ່ເປັນສຳນັກງານຂອງກອງກຳລັງສ່ວນນຶ່ງຂອງສະຫະ ພາບອາຟຣິກາ ຫຼື AMISOM ໃນຂະນະທີ່ບັ້ນທີ 2 ແມ່ນແນເປົ້າໝາຍໃສ່ ຄ້າຍຂອງລັດຖະ ບານໂຊມາເລຍ. ທ່ານ Warsame ໄດ້ກ່າວວ່າ ກອງກຳລັງໃນສອງຄ້າຍໄດ້ຕໍ່ສູ້ກັບພວກບຸກໂຈມຕີ ແລະບັງຄັບໃຫ້ພວກຫົວຮຸນແຮງຖອຍອອກໄປ. ທ່ານໄດ້ກ່າວວ່າກຸ່ມຫົວຮຸນແຮງ ໄດ້ເປີດສາກການໂຈມຕີບັ້ນທີ 2 ແລະກໍໄດ້ຮັບການຕ້ານຢັນ ຄືກັນ.
ປະຊາຊົນໄດ້ພາກັນຢືນຢັນວ່າ ກອງກຳລັງເອທິໂອເປຍ ແລະກອງກຳລັງຂອງລັດຖະບານ ຍັງຄວບຄຸມບ້ານດັ່ງກ່າວຢູ່.
ວິທະຍຸ Andalus ຂອງກຸ່ມ Al-Shabab ໄດ້ອ້າງວ່າ ຕົນໄດ້ສັງຫານທະຫານ ເອທິໂອເປຍ 43 ຄົນ ໃນການໂຈມຕີຄັ້ງນີ້ ແລະທຳລາຍຄ້າຍດັ່ງກ່າວ.
ລົດລະເບີດສະລະຊີບ ພ້ອມກັບການໂຈມຕີຢ່າງໜັກນັ້ນ ແມ່ນຖືວ່າເປັນຈຸດເດັ່ນໃນການບຸກ ໂຈມຕີຂອງກຸ່ມ Al-Shabab ຕໍ່ຄ້າຍທະຫານຂອງສະຫະພາບ ອາຟຣິກາ ຫຼື AU ໃນໂຊມາເລຍ ນັບຕັ້ງແຕ່ປີກາຍນີ້ເປັນຕົ້ນມາ.
ກະລຸນາອ່ານຂ່າວນີ້ເພີ້ມຕື່ມເປັນພາສາອັງກິດ
