ພວກກະບົດອິສລາມຫົວຮຸນແຮງຈັດໄດ້ຍຶດເອົາຖານທັບອາກາດ
ທີ່ສຳຄັນແຫ່ງນຶ່ງ ຢູ່ໃນແຂວງ Idlib ທາງພາກຕາເວັນອອກສຽງ
ເໜືອຂອງຊີເຣຍ ຈາກກອງກຳລັງລັດຖະບານ ອີງຕາມລາຍງານ
ຂອງໂທລະພາບທາງການ ແລະ ກຸ່ມສັງເກດການສົງຄາມ ໃນຊີ
ເຣຍ.
ໂທລະພາບຂອງລັດ ລາຍງານໃນວັນພຸດມື້ນີ້ ໂດຍໄດ້ປະກາດວ່າ
ກອງທັບ ໄດ້ຖອຍອອກຈາກ ສະໜາມບິນທະຫານ Abu Duhur
ບ່ອນທີ່ພວກຫົວຮຸນແຮງຈັດອິສລາມໄດ້ທຳການປິດລ້ອມສະຖານ
ທີ່ດັ່ງກ່າວ ມາໄດ້ເປັນເວລາເກືອບ 2 ປີແລ້ວ.
ກຸ່ມສິ້ງຊອມສິດທິມະນຸດໃນຊີເຣຍ ທີ່ມີຫ້ອງການຕັ້ງຢູ່ອັງກິດ ກ່າວວ່າ ກຸ່ມ al-Nusra ທີ່ເປັນ ເຄືອຂ່າຍຂອງກຸ່ມ al-Qaida ແລະ ກຸ່ມພັນ ທະມິດອິສລາມຕ່າງໆ ບັດນີ້ ໄດ້ເຂົ້າຄວບຄຸມ
“ເກືອບທັງໝົດ” ຂອງສະຖານທີ່ດັ່ງກ່າວນັ້ນ.
ກຸ່ມປະສົມ ທີ່ເອີ້ນວ່າ “ກອງທັບຂອງຜູ້ພິຊິດ” ໄດ້ເຂົ້າຍຶດເອົາເມືອງ Idlib ຊຶ່ງເປັນນະຄອນ
ຫຼວງຂອງແຂວງ ແລະ ບໍລິເວນອື່ນໆອີກຈຳນວນນຶ່ງເມື່ອຕົ້ນປີນີ້. ສະໜາມບິນນີ້ ເຄີຍເປັນ
ທີ່ໝັ້ນແຫ່ງນຶ່ງ ຂອງກອງທັບຊີເຣຍ ທີ່ຍັງຄົງເຫຼືອຢູ່ເປັນແຫ່ງສຸດທ້າຍໃນແຂວງດັ່ງກ່າວ.
ມັນເປັນຄື້ນຟອງຂອງໄຊຊະນະອັນຫຼ້າສຸດ ຂອງພວກກະບົດ ໃນທົ່ວປະເທດ ທີ່ເຮັດໃຫ້ມີ
ການຕັ້ງຄຳຖາມຕ່າງໆຂຶ້ນມາ ກ່ຽວກັບ ການຢູ່ລອດຂອງລັດຖະບານຊີເຣຍ ປະທານາທິບໍດີ Bashar al-Assad ວ່າ ຈະຢູ່ໄດ້ອີກດົນປານໃດ.
ປະມານ 250,000 ຄົນໄດ້ຖືກຂ້າຕາຍ ໃນລະຫວ່າງ ສົງຄາມກາງເມືອງ ທີ່ຍືດຍາວມາໄດ້
ເກືອບ 5 ປີ ຊຶ່ງຍັງໄດ້ກົດດັນໃຫ້ຊາວຊີເຣຍ ຫຼາຍກວ່າ 4 ລ້ານຄົນ ອົບພະຍົບຫລົບໄພຈາກ
ບ້ານເກີດເມືອງນອນຂອງພວກເຂົາເຈົ້າ.
