ເຈົ້າໜ້າທີ່ສະຫະລັດທ່ານນຶ່ງກ່າວວ່າ ນາຍ Atiyah Abd al-Rahman ຜູ້ນໍາໝາຍເລກ
ສອງຂອງກຸ່ມອາລຄາອີດາ ໄດ້ຖືກສັງຫານທີ່ປາກີສຖານ.
ເຈົ້າໜ້າທີ່ດັ່ງກ່າວ ທີ່ຂໍບໍ່ໃຫ້ອອກຊື່ ກ່າວໃນວັນເສົາວານນີ້ວ່າ ນາຍ Rahman ຖືກສັງ
ຫານເມື່ອວັນທີ່ 22 ສິງຫາ ທີ່ເຂດຊົນເຜົ່າ Waziristan ທາງພາກຕາເວັນຕົກສຽງເໜືອ
ຂອງປາກີສຖານ ທີ່ຮູ້ກັນວ່າເປັນບ່ອນຫລົບໄພຂອງກຸ່ມຕາລິບານແລະພວກຫົວຕໍ່ສູ້ທີ່ພົວ
ພັນກັບກຸ່ມ ອາລຄາອີດາ ນັ້ນ.
ເຈົ້າໜ້າທີ່ທ່ານນີ້ບໍ່ໄດ້ບອກວ່າ ນາຍ Rahman ຖືກສັງຫານໂດຍວິທີໃດ.
ພວກເຈົ້າໜ້າທີ່ຮັກສາຄວາມປອດໄພປາກີສຖານກ່າວເມື່ອວັນທີ່ 22 ສິງຫາ ວ່າ ຍົນບໍ່ມີ ຄົນຂັບຂອງສະຫະລັດລໍານຶ່ງ ທີ່ຖືກສົ່ງໄປໂຈມຕີໃນ ມື້ນັ້ນ ໄດ້ສັງຫານພວກຕ້ອງສົງໃສວ່າ ເປັນພວກຫົວຮຸນແຮງສີ່ຄົນ ຢູ່ໃກ້ ເມືອງ Mir Ali ໃນເຂດ Waziristan ເໜືອ.
ນາຍ Rahman ໄດ້ໄຕ່ເຕົ້າຂື້ນມາຢູ່ໃນຕໍາແໜ່ງຜູ້ນໍາໝາຍເລກສອງຂອງ ກຸ່ມອາລຄາອີດາ ຫລັງຈາກກໍາລັງລົບພິເສດຂອງສະຫະລັດໄດ້ສັງຫານ ນາຍໂອຊາມາ ບິນ ລາເດັນ ຜູ້ນໍາ ເຄືອຂ່າຍກຸ່ມອາລຄາອີດາ ໃນລະຫວ່າງ ການບຸກໂຈມຕີບ້ານພັກຂອງຜູ້ກ່ຽວໃນປາກີສຖານ ເມື່ອເດືອນພຶດສະພາ ຜ່ານມາ ຕໍ່ມາໃນ ເດືອນມິຖຸນາ ກຸ່ມອາລຄາອີດາ ໄດ້ແຕ່ງຕັ້ງ ນາຍ Ayman al-Zawahri ເປັນຜູ້ສືບຕໍາແໜ່ງນາຍບິນ ລາເດັນ ໃນຖານະ ຫົວໜ້າອົງການ ການກໍ່ການຮ້າຍດັ່ງກ່າວ.
ເຈົ້າໜ້າທີ່ສະຫະລັດກ່າວເມື່ອວັນເສົາວານນີ້ວ່າ ນາຍ Zawahri ໄດ້ອາໃສນາຍ Rahmanໃຫ້ຊ່ວຍບໍລິຫານກຸ່ມອາລຄາອີດາ.
