ນັກຂ່າວຂອງອົງການຂ່າວ ອາລ ຈາຊີຣາ (Al Jazeera) ທີ່ເຂົ້າໄປລາຍງານຂ່າວການບຸກໂຈມຕີໂຮງໝໍຢູ່ຂົງເຂດກາຊາ ໃນວັນຈັນວານນີ້ ໄດ້ຖືກທໍາຮ້າຍຮ່າງກາຍ ແລະຖືກຈັບກຸມໂດຍກອງກໍາລັງຂອງອິສຣາແອລ ເປັນເວລາປະມານ 12 ຊົ່ວໂມງ, ອີງຕາມການກ່າວຂອງເຄືອຂ່າຍອົງການຂ່າວ.
ອົງການຂ່າວ ອາລ ຈາຊີຣາ ລາຍງານວ່າ ສະມາຊິກຂອງກຳລັງປ້ອງກັນຊາດອິສຣາແອລ ຫຼື IDF ໄດ້ທໍາການທໍາຮ້າຍນັກຂ່າວພາກພາສາອາຣັບຂອງພວກເຂົາເຈົ້າ ຄື ທ່ານອິສເມລ ອາລ-ກູລ (Ismail al-Ghoul), ດ້ວຍການທຳລາຍອຸປະກອນຂອງລາວ ແລະທໍາການຈັບກຸມລາວພ້ອມດ້ວຍບັນດານັກຂ່າວ ແລະພະນັກງານໂຮງໝໍຄົນອື່ນໆ.
ທ່ານອາລ-ກູລ ໄດ້ຖືກບັງຄັບໃຫ້ແກ້ເຄື່ອງດ້ວຍການເປືອຍກາຍ ກ່ອນທີ່ຈະຖືກນໍາໂຕອອກໄປໂດຍພວກທະຫານ, ອົງການຂ່າວ ອາລ-ຈາຊີຣາ ກ່າວວ່າ ລາວໄດ້ຖືກປ່ອຍໂຕໃນຕອນແລງຂອງມື້ວັນຈັນວານນີ້, ອີງຕາມການລາຍງານຂອງອົງການຂ່າວກາຕາຮີ.
ອົງການຂ່າວ ອາລ-ຈາຊີຣາ ແລະບັນດາອົງການຕິດຕາມໜ່ວຍງານດ້ານການຂ່າວສາກົນ ໄດ້ປະນາມຕໍ່ການຈັບກຸມດັ່ງກ່າວ.
ອົງການດັ່ງກ່າວ ກ່າວໃນຖະແຫຼງການວ່າ "ອົງການຂ່າວ ອາລ ຈາຊີຣາ ກ່າວປະນາມຕໍ່ອາຊະຍາກຳທີ່ຍັງຄົງດຳເນີນຢູ່ຢ່າງຕໍ່ເນື່ອງໂດຍກອງກຳລັງຢຶດຄອງຂອງອິສຣາແອລ ຕໍ່ບັນດານັກຂ່າວ ແລະຜູ້ຊ່ຽວຊານດ້ານສື່ມວນຊົນຢູ່ໃນກາຊາ ເຊິ່ງໄດ້ດໍາເນີນການຮຽກຮ້ອງຂອງຕົນຄືນໃໝ່ ເພື່ອໃຫ້ຢຸດເຊົາການໂຈມຕີທີ່ເປັນຕາຢ້ານເຫຼົ່ານີ້ໃນທັນທີ."
ກອງກໍາລັງ IDF ບໍ່ໄດ້ຕອບອີເມລໃນທັນທີຂອງ VOA ທີ່ຮ້ອງຂໍໃຫ້ສະແດງຄວາມເຫັນ.
ການຈັບກຸມດັ່ງກ່າວ ໄດ້ເນັ້ນໃຫ້ເຫັນເຖິງຄວາມສ່ຽງທັງຫຼາຍຕໍ່ບັນດານັກຂ່າວທີ່ເຮັດວຽກຢູ່ໃນຂົງເຂດກາຊາ, ເຊິ່ງບັນດານັກຂ່າວຕ້ອງປະເຊີນໜ້າກັບຂໍ້ຈຳກັດໃນການເຂົ້າເຖິງຂອງທັງສອງຝ່າຍ, ແລະຈຳນວນຜູ້ເສຍຊີວິດຂອງບັນດານັກຂ່າວ ແມ່ນສູງທີ່ສຸດຢູ່ໃນຄວາມຂັດແຍ້ງທັງຫຼາຍເຫຼົ່ານີ້.
ຄະນະກຳມະການປົກປ້ອງນັກຂ່າວ ຫຼື CPJ ທີ່ມີສໍານັກງານໃຫຍ່ຢູ່ໃນນິວຢອກ ກ່າວວ່າ ອິສຣາແອລ ເປັນຊັ້ນນໍາໃນການຈັບກຸມນັກຂ່າວໄປຂັງຄຸກ ຈົນມາຮອດທ້າຍປີ 2023. ປະເທດແຫ່ງນີ້ ຢູ່ໃນອັນດັບທີ 6 ຂອງໂລກ ທີ່ມີນັກໂທດຖືກຈັບຂັງຄຸກ 17 ຄົນ, ອີງຕາມການສໍາຫຼວດສໍາມະໂນຄົວປະຈໍາປີຂອງ CPJ ກ່ຽວກັບນັກຂ່າວທີ່ຖືກຈໍາຄຸກ ຍ້ອນການປະຕິບັດໜ້າທີ່ຂອງພວກເຂົາເຈົ້າ.
ກຸ່ມດັ່ງກ່າວ ກ່າວວ່າ ພວກທີ່ຖືກກັກຂັງທັງໝົດນັ້ນ ແມ່ນຖືກຈັບຢູ່ເຂດຝັ່ງຕາເວັນຕົກຂອງແມ່ນໍ້າຈໍແດນ ຫຼື West Bank ລຸນຫຼັງກຸ່ມຮາມາສໄດ້ທໍາການໂຈມຕີກໍ່ການຮ້າຍຕໍ່ ອິສຣາແອລ ໃນວັນທີ 7 ຕຸລາ ທີ່ຜ່ານມາ.
ຟໍຣັມສະແດງຄວາມຄິດເຫັນ