ກອງທັບອັຟການິສຖານແລະກໍາລັງປະສົມກ່າວວ່າ ການໂຈມຕີທາງອາກາດໄດ້ສັງຫານ
ຜູ້ນໍາຂັ້ນສູງລະດັບສອງຂອງກຸ່ມກໍ່ການຮ້າຍ al-Qaida ໃນອັຟການິສຖານ.
ໃນຖະແຫຼງຂ່າວສະບັບນຶ່ງທີ່ນຳອອກເຜີຍແຜ່ໃນວັນອັງຄານມື້ນີ້ ກຳລັງປະສົມລະບຸຊື່
ຜູ້ນຳກຸ່ມກໍ່ການຮ້າຍຄົນນີ້ວ່າ Sakh al-Taifi ຊຶ່ງເປັນຄົນຊາອຸດີ ແລະນອກນັ້ນ ຍັງ
ມີຄົນຮ້ອງລາວວ່າ Musthag ແລະ Nasim ນຳດ້ວຍ.
NATO ກ່າວວ່າ ລາວເປັນຜູ້ສັ່ງການໂດຍຕົງໃນການໂຈມຕີກໍາລັງປະສົມ ແລະກໍາລັງ
ຂອງອັຟການິສຖານ ມັກເດີນທາງເລື້ອຍໆລະຫວ່າງອັຟການິສຖານ ແລະປາກິສຖານ
ເພື່ອປະຕິບັດຕາມຄຳສັ່ງພວກຜູ້ນໍາລະດັບສູງຂອງກຸ່ມກໍ່ການຮ້າຍ al-Qaida ແລະ
ເປັນຜູ້ສົ່ງອາວຸດຍຸດທະພັນພ້ອມທັງອຸປະກອນໃຫ້ພວກກະບົດໃນພາກຕາເວັນອອກ
ຂອງອັຟການິສຖານ.
ຖະແຫຼງການກ່າວວ່າ ການໂຈມຕີທາງອາກາດທີ່ວ່ານີ້ ໄດ້ມີຂື້ນໃນວັນອາທິດຜ່ານມາ
ທີ່ແຂວງ Kunar ແລະພ້ອມນີ້ຍັງໄດ້ສັງຫານຜູ້ກໍ່ການຮ້າຍ al-Qaida ອີກຄົນນຶ່ງ.