ສະຫະລັດ ກ່າວໃນວັນຈັນວານນີ້ ວ່າ ການໂຈມຕີທາງອາກາດ
ເມື່ອອາທິດແລ້ວນີ້ ຢູ່ໃນພາກເໜືອ ຂອງອີຣັກນັ້ນ ໄດ້ສັງຫານ
ນັກຕໍ່ສູ້ຫົວຮຸນແຮງ ລັດອິສລາມຄົນນຶ່ງ ທີ່ສົງໄສວ່າ ມີສ່ວນ
ພົວພັນ ໃນການໂຈມຕີ ເມື່ອປີ 2012 ຕໍ່ກົງສຸນສະຫະລັດ ໃນ
ເມືອງ Benghazi ປະເທດລີເບຍ ທີ່ໄດ້ເຮັດໃຫ້ຊາວອາເມຣິກັນ
4 ຄົນ ເສຍຊີວິດ ລວມທັງ ເອກອັກຄະລັດຖະທູດ ທ່ານ
Christopher Stevens.
ໂຄສົກທຳນຽບຫ້າແຈ ພັນເອກ Steve Warren ກ່າວວ່າ
ການໂຈມຕີທາງອາກາດໃນວັນທີ 15 ມິຖຸນາ ຜ່ານມາ ທີ່ເມືອງ
Mosul ໄດ້ສັງຫານ ນາຍ Ali Awni al-Harzi ຜູ້ທີ່ທຳງານໃກ້
ຊິດກັບພວກຫົວຮຸນແຮງຈັດ ທີ່ເປັນເຄືອຂ່າຍ ຂອງກຸ່ມລັດອິສລາມ ຢູ່ໃນເຂດອາຟຣິກາເໜືອ ແລະ ຕາເວັນອອກກາງ.
ທ່ານ Warren ໄດ້ອະທິບາຍວ່າ ນາຍ al-Harzi ເປັນ “ບຸກຄົນທີອາດພົວພັນ” ໃນການ
ໂຈມຕີຢູ່ເມືອງ Benghazi ໂດຍບໍ່ໄດ້ໃຫ້ລາຍລະອຽດໃດໆຕື່ມ ກ່ຽວກັບ ການສົງໄສວ່າ
ຜູ້ກ່ຽວມີສ່ວນພົວພັນຫຍັງ ແທ້ ແຕ່ທ່ານກໍເວົ້າວ່າ “ການເສຍຊີວິດຂອງນາຍ al-Harzi
ໄດ້ຫລຸດຜ່ອນຄວາມອາດສາມາດ ຂອງກຸ່ມ ISIL ທີ່ຈະເຊື່ອມໂຍງພວກນັກຕໍ່ສູ້
ສົງຄາມສັກສິດ ໃນອາຟຣິກາເໜືອ ເຂົ້າກັບ ການສູ້ລົບຢູ່ ຊີເຣຍ ແລະ ອີຣັກ ແລະ
ກຳຈັດນັກຕໍ່ສູ້ສົງຄາມສັກສິດທາງສາສະໜາ ທີ່ພົວພັນກັບການກໍ່ການຮ້າຍສາກົນ
ມາດົນນານແລ້ວນັ້ນ.”
ກະຊວງການຕ່າງປະເທດສະຫະລັດ ແລະ ອົງການສະຫະປະຊາຊາດ ໄດ້ລະບຸວ່າ ນາຍ
al-Harzi ເປັນຜູ້ກໍ່ການຮ້າຍ ເມື່ອຕົ້ນປີນີ້. ພວກເຂົາເຈົ້າກ່າວວ່າ ຜູ້ກ່ຽວ ໄດ້ເຂົ້າຮ່ວມ ກຸ່ມ
Ansar al-Sharia ຢູ່ໃນ ຕູນີເຊຍ ເມື່ອປີ 2011 ແລະ ຕໍ່ມາໄດ້ຊ່ວຍເຫຼືອ ໃນການເກນນັກ
ຕໍ່ສູ້ຫຼາຍຄົນ ແລະ ຈັດແຈງການເດີນທາງໄປຍັງທັງ ຕູນີເຊຍ ແລະ ຊີເຣຍ ໃຫ້ແກ່ພວກເຂົາ ໃນຂະນະດຽວກັນ ຍັງໄດ້ລັກລອບເອົາອາວຸດຕ່າງໆ ເຂົ້າໄປໃນປະເທດຕູນີເຊຍນຳດ້ວຍ.
