ພວກນັກດຳນ້ຳຊາວອິນໂດເນເຊຍ ເວລານີ້ໄດ້ກູ້ເອົາເຄື່ອງບັນທຶກ
ທັງສອງ ຫລືຫີບດຳ ຂຶ້ນ ມາແລ້ວ ຈາກເຮືອບິນສາຍກາຍບິນ
AirAsia ໃນທະເລຈາວາ ໃນເດືອນແລ້ວນີ້ ທີ່ສັງຫານທັງໝົດ
162 ຄົນນ້ັນ.
ພວກນັກດຳນ້ຳ ໄດ້ກູ້ເອົາຫີບດຳ ອັນທີ 2 ຊຶ່ງເປັນເຄື່ອງບັນທຶກ
ສຽງຈາກຫ້ອງຄົນຂັບເຮືອບິນ ຂຶ້ນມາແລ້ວ ໃນເຊົ້າວັນອັງຄານ
ມື້ນີ້ ນຶ່ງມື້ ຫຼັງຈາກທີ່ໄດ້ພົບເຫັນ ແລະກູ້ເອົາເຄື່ອງບັນທຶກຂໍ້ມູນ
ຕ່າງໆຂອງເຮືອບິນຂຶ້ນມາ. ທັງສອງຫີບດັ່ງກ່າວນີ້ ຈະຊ່ອຍ
ພວກນັກວິເຄາະໃນນະ ຄອນຫຼວງຈາກາຕາ ທີ່ຄາດກັນວ່າ
ຈະໃຫ້ບົດສະຫຼຸບທີ່ເປັນຮູບຮ່າງຢ່າງລະອຽດຫຼາຍຂຶ້ນຂອງ
ສາເຫດ ທີ່ພາໃຫ້ເຮືອບິນສາຍການບິນ AirAsia ຖ້ຽວບິນ 8510 ໄດ້ຕົກ ໃນວັນທີ 28 ທັນວາ ຜ່ານມານັ້ນ.
ໃນປະຈຸບັນນີ້ ພວກນັກສືບສວນ ເຊື່ອວ່າ ພວກນັກບິນໄດ້ບິນຕ່ຳລົງເພື່ອຫຼີກພາຍຸ ໃນຖ້ຽວບິນ ຈາກເມືອງ Surabaya ໄປຫາ Singapore.
ເຮືອບິນ Airbus ລຳນີ້ ໄດ້ຫາຍໄປຈາກຈໍເຣດາ ໃນພາກເໜືອຂອງທະເລຈາວາ ຍັງບໍ່ຮອດເຄິ່ງທາງບິນ ຂອງການເດີນທາງເປັນເວລາ 2 ຊົ່ວໂມງນັ້ນ.
ເຮືອບິນ ໄດ້ບັນຈຸທັງໝົດຜູ້ໂດຍສານແລະພະນັກງານ 162 ຄົນ. ຈົນເທົ່າເຖີີງປະຈຸບັນນີ້ ມີພຽງ 48 ສົບເທົ່ານັ້ນທີ່ໄດ້ຄົ້ນພົບແລະກູ້ຂຶ້ນມາ.
ເຈົ້າໜ້າທີ່ຄາດຫວັງວ່າພວກເຄາະຮ້າຍທີ່ຍັງເຫຼືອນັ້ນ ສາມາດຈະຄົ້ນພົບໄດ້ອີກຈາກຊາກ
ສ່ວນໃຫຍ່ໆທີ່ຫັກພັງຂອງເຮືອບິນ ທີ່ໄດ້ພົບເຫັນໃນໃຕ້ພື້ນນ້ຳທະເລ ນັ້ນ.
ບໍ່ມີຜູ້ໃດລອດຊີວິດມາໄດ້ ຈັກຄົນ ໃນອຸບັດເຫດດັ່ງກ່າວນີ້.
