ພະນັກງານຊ່ວຍເຫຼືອຢູ່ໃນເມືອງ Aleppo ທີ່ໄດ້ຖືກທຳລາຍໃນ ຊີເຣຍ ກ່າວວ່າ ຊີເຣຍ ແລະ ພັນທະມິດ ຣັດເຊຍ ຂອງພວກເຂົາເຈົ້າ ໄດ້ເພີ່ມການໂຈມຕີຖິ້ມລະເບີດໃສ່ຫຼາຍ ພາກສ່ວນທາງພາກຕາເວັນອອກຂອງເມືອງດັ່ງກ່າວທີ່ຄວບຄຸມໂດຍພວກຕໍ່ຕ້ານໃນວັນ ຈັນວານນີ້, ເຮັດໃຫ້ປະຊາຊົນເກືອບ 100 ຄົນຖືກຂ້າຕາຍໃນຄວາມຮຸນແຮງ ແລະ ການ ທຳລາຍໃນມື້ທີສີ່ລຽນຕິດ.
ພະນັກງານບັນເທົາທຸກຈາກອົງການສາສະໜາ Anglican ໄດ້ສົ່ງຂໍ້ ຄວາມຜ່ານທາງ Twitter ວ່າ ຜູ້ທີ່ເສຍຊີວິດລວມມີເດັກນ້ອຍ. ພວກເຂົາເຈົ້າຍັງໄດ້ກ່າວວ່າ ເຈົ້າໜ້າທີ່ການ ແພດ ແລະໂຮງໝໍແຫ່ງຕ່າງໆແມ່ນບໍ່ສາມາດຮັບມືກັບຜູ້ບາດເຈັບ ແລະ ເສຍຊີວິດໄດ້, ຍ້ອນວ່າບໍ່ມີການສົ່ງອຸບປະກອນການແພດແລະຢາປົວພະຍາດເພີ່ມເຕີມໄປໃຫ້.
ລັດຖະມົນຕີການຕ່າງປະເທດ ສະຫະລັດ ທ່ານ John Kerry ໄດ້ກ່າວຕອບໂຕ້ຕໍ່ການ ລາຍງານທີ່ວ່າ ລັດຖະບານ ຊີເຣຍ ຂອງປະທາ ນາທິບໍດີ Bashar al-Assad ແລະ ພັນ ທະມິດ ຣັດເຊຍ ຂອງພວກເຂົາເຈົ້າ “ເບິ່ງຄືວ່າຕັ້ງໃຈທີ່ຈະຍຶດເອົາເມືອງ Aleppo ແລະ ທຳລາຍມັນໃນການປະຕິບັດການນັ້ນ.”
ທ່ານ Kerry ບໍ່ໄດ້ໃຫ້ຄວາມສຳຄັນກັບການລາຍງານທາງໂທລະພາບ ຈາກນະຄອນຫຼວງ Damascus ທີ່ເນັ້ນຄຳເວົ້າຂອງນັກການທູດຂອງ ຊີເຣຍວ່າ ລັດຖະບານຂອງທ່ານ Assad ໄດ້ກຽມພ້ອມທີ່ຈະເຂົ້າຮ່ວມ ລັດຖະບານປະສົມເພື່ອຄວາມສາມັກຄີຊາດ.
ທ່ານ Kerry ໄດ້ກ່າວຈາກເມືອງ Cartagena ໃນປະເທດ ໂຄລົມເບຍ ວ່າ “ໃນຂະນະ ທີ່ພວກເຂົາເຈົ້າກຳລັງຖະລົ່ມເມືອງ Aleppo, ຖິ້ມລະເບີດໂດຍບໍ່ແຍກແຍະ, ເຂັ່ນຂ້າ ແມ່ຍິງ ແລະ ເດັກນ້ອຍ, ການກ່າວ ກ່ຽວກັບ ລັດຖະບານສາມັກຄີຊາດນັ້ນແມ່ນຂ້ອນ ຂ້າງຈະຍາກ.”
ບັນດານັກສັງເກດການ ຈາກອົງການສິ້ງຊອມສິດທິມະນຸດ ໃນຊີເຣຍ ກ່າວວ່າ ປະຊາຊົນ ເກືອບ 250 ຄົນໄດ້ຖືກຂ້າຕາຍໃນເມືອງ Aleppo ແລະ ຂົງເຂດທີ່ຢູ່ອ້ອມແອ້ມ ນັບຕັ້ງແຕ່ ສັນຍາການຢຸດຍິງທີ່ບໍ່ໝັ້ນຄົງໄດ້ຖືກທຳລາຍໃນຕົ້ນເດືອນນີ້. ສັນຍາດັ່ງກ່າວ, ໄດ້ຖືກເຈ ລະຈາໂດຍບັນດານັກການທູດ ຣັດເຊຍ ແລະ ສະຫະລັດ ແມ່ນຮຽກຮ້ອງໃຫ້ມີຂຶ້ນເພື່ອອະ ນຸຍາດໃຫ້ພະນັກງານຊ່ວຍເຫຼືອ ສາມາດຈັດສົ່ງອາຫານທີ່ມີຄວາມຕ້ອງການທີ່ສຸດ ແລະ ຢາປົວພະຍາດ ໄປໃຫ້ພົນລະເຮືອນຫຼາຍຮ້ອຍພັນຄົນ ທີ່ຖືກຕັດຂາດຈາກເຄື່ອງໃຊ້ຕ່າງໆ.
ແນວໃດກໍຕາມ, ນັກສັງເກດການ, ໄດ້ຊີ້ໄປໃສ່ການຖິ້ມລະເບີດທີ່ຮ້າຍແຮງຕໍ່ຂະບວນລົດ ບັນເທົາທຸກ ໃນສັບປະດາທີ່ຜ່ານມາ ໃກ້ກັບເມືອງ Aleppo, ໂດຍກ່າວວ່າ ສັນຍາຢຸດຍິງ ໄດ້ປະສົບກັບຄວາມລົ້ມແຫຼວເກືອບຈະຕັ້ງແຕ່ຈາກຕອນເລີ່ມຕົ້ນເລີຍ.
