ບັນດາອົງການຊ່ວຍເຫລືອແລະສິດທິມະນຸດ ກຸ່ມໜຶ່ງທີ່ປະກອບ
ດ້ວຍ 30 ອົງການ ໄດ້ຮຽກຮ້ອງໄປຍັງປະຊາຄົມສາກົນ ໃຫ້ຮັບ
ເອົາຊາວອົບພະຍົບຊີເຣຍ 180,000 ຄົນ ຜູ້ທີ່ໄດ້ຫລົບໜີການ
ສູ້ລົບທີ່ກຳລັງດຳເນີນໄປ ໃນປະເທດຂອງພວກເຂົາເຈົ້າ.
ອົງການຊ່ວຍເຫລືອອົບພະຍົບຂອງສະຫະປະຊາຊາດ ຫຼື
UNHCR ມີກຳນົດຈະຈັດກອງປະຊຸມຂຶ້ນ ໃນວັນອັງຄານມື້ອື່ນນີ້
ໃນນະຄອນ Geneva ເພື່ອຈະປຶກສາຫາລື ເລື່ອງການຈັດຫາຖິ່ນ
ຖານໃໝ່ໃຫ້ແກ່ ຊາວອົບພະຍົບຊີເຣຍ ຊຶ່ງດຽວນີ້ ມີຈຳນວນຫຼາຍ
ກວ່າ 3 ລ້ານ 2 ແສນຄົນແລ້ວ.
ກ່ອນໜ້າກອງປະຊຸມດັ່ງກ່າວ ບັນດາກຸ່ມຊ່ອຍເຫຼືອ ກ່າວໃນວັນຈັນມື້ນີ້ ວ່າ ປະເທດຕ່າງໆ
ຄວນຈະຮັບເອົາ 5 ເປີເຊັນ ຂອງຊາວອົບພະຍົບຊີເຣຍນັ້ນ ຊຶ່ງເພີ້ມຂຶ້ນຈາກ 2 ເປີເຊັນ
ໃນເວລານີ້ ຊຶ່ງຈະເປັນການຊ່ອຍບໍ່ພຽງແຕ່ຊາວອົບພະຍົບເທົ່ານັ້ນ ແຕ່ຍັງຈະຊ່ອຍບັນດາ ປະເທດເພື່ອນບ້ານ ຂອງຊີເຣຍອີກດ້ວຍ ທີ່ໄດ້ດິ້ນຮົນເພື່ອຈະຮັບມືກັບ ຄວາມຕ້ອງການຕ່າງໆ ຂອງຜູ້ຄົນໃນຈຳນວນຫຼວງຫຼາຍຕື່ມອີກນັ້ນ.
ບັນດາກຸ່ມທີ່ທຳການຮຽກຮ້ອງດັ່ງກ່າວ ມີລວມທັງ ອົງການນິລະໂທດກຳສາກົນ ອົງການ
ບັນເທົາທຸກອິສລາມ ອົງການ Oxfam ແລະ ອົງການປົກປ້ອງເດັກນ້ອຍ ຫຼື Save the
Children.
ພວກເຂົາເຈົ້າ ຮຽກຮ້ອງໂດຍສະເພາະ ໄປເຖິງບັນດາລັດຖະບານ ໃນເຂດອ່າວເປີເຊຍ
ແລະ ຂົງເຂດອາເມຣິກາລາຕິນ ໃຫ້ມີສ່ວນຮ່ວມ ໃນຄວາມພະຍາຍາມ ຈັດຫາຖິ່ນຖານໃໝ່ ໃຫ້ຊາວອົບພະຍົບຊີເຣຍ ແລະ ຮຽກຮ້ອງບັນດາປະເທດທີ່ອາດຈະຮັບເອົານັ້ນ ໃຫ້ຮັບເອົາ
ຊາວອົບພະຍົບທີ່ເປັນຜູ້ຍິງ ເດັກນ້ອຍ ແລະ ຜູ້ທີ່ປະເຊີນກັບການຂົ່ມຂູ່ຕໍ່ຄວາມປອດໄພຂອງເຂົາເຈົ້ານັ້ນ ກ່ອນອົບພະຍົບຄົນອື່ນໆ.