ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ການ​ຊ່ວຍ​ເຫຼືອ​ສຳ​ລັບ ກາ​ຊາ ຕັ້ງ​ຢູ່​ເທິງ​ຫາດ​ຊາຍ


​ລົດ​ບັນ​ທຸກ​ທີ່​ບັນ​ຈຸ​ການ​ຊ່ວຍ​ເຫຼືອ​ດ້ານ​ມະ​ນຸດ​ສະ​ທຳ​ຈາກ​ສະ​ຫະ​ລັດ ອາ​ຣັບ ເອ​ມີ​ເຣັ​ສ ແລະ ອົງ​ການ​ເພື່ອ​ການ​ພັດ​ທະ​ນາ​ສາ​ກົນ ສະ​ຫະ​ລັດ ຂ້າມ​ຂົວ​ທ່າ​ເຮືອ Trident ກ່ອນ​ໄປ​ຮອດ​ຫາດ​ຊາຍ​ໃນ​ເຂດ​ກາ​ຊາ, 17 ພຶດ​ສະ​ພາ 2024.
​ລົດ​ບັນ​ທຸກ​ທີ່​ບັນ​ຈຸ​ການ​ຊ່ວຍ​ເຫຼືອ​ດ້ານ​ມະ​ນຸດ​ສະ​ທຳ​ຈາກ​ສະ​ຫະ​ລັດ ອາ​ຣັບ ເອ​ມີ​ເຣັ​ສ ແລະ ອົງ​ການ​ເພື່ອ​ການ​ພັດ​ທະ​ນາ​ສາ​ກົນ ສະ​ຫະ​ລັດ ຂ້າມ​ຂົວ​ທ່າ​ເຮືອ Trident ກ່ອນ​ໄປ​ຮອດ​ຫາດ​ຊາຍ​ໃນ​ເຂດ​ກາ​ຊາ, 17 ພຶດ​ສະ​ພາ 2024.

ການ​ຊ່ວຍ​ເຫຼືອ​ດ້ານ​ມະ​ນຸດ​ສະ​ທຳຫຼາຍກວ່າ 1,000 ໂຕນ​ໄດ້​ໄປ​ຮອດ​ທ່າ​ເຮືອ​ຊົ່ວ​ຄາວຂອງສະຫະລັດ ທີ່​ຢູ່ນອກ​ຊາຍ​ຝັ່ງ​ຂອງ​ເຂດ​ກາ​ຊາ ​ນັບ​ຕັ້ງ​ແຕ່​ວັນ​ອັງ​ຄານ​ທີ່​ຜ່ານ​ມາ.

ແນວ​ໃດ​ກໍ​ຕາມ, ການ​ຊ່ວຍ​ເຫຼືອ​ດັ່ງ​ກ່າວບໍ່​ໄດ້​ໄປ​ຮອດ​ຊາວ ປາ​ແລັ​ສ​ໄຕ​ນ໌ ​ຜູ້​ທີ່​ຕ້ອງ​ການ​ມັນ​ຢ່າງ​ແຮງ. ແຕ່​ກົງ​ກັນ​ຂ້າມ, ມັນ​ໄດ້​ຕັ້ງ​ຢູ່​ເທິງ​ຫາດ​ຊາຍ, ອີງ​ຕາມ​ທ່ານ​ນາງ ຊາບ​ຣີ​ນາ ຊິງ, ຮອງ​ໂຄ​ສົກ​ຂອງ​ທຳ​ນຽບ​ຫ້າ​ແຈ.

ໂຄງ​ການ​ອາ​ຫານ​ໂລກ​ຂອງ​ອົງ​ການ​ສະ​ຫະ​ປະ​ຊາ​ຊາດ, ເຊິ່ງ​ແມ່ນ​ນຶ່ງ​ໃນ​ບັນ​ດາ​ອົງ​ການ​ທີ່​ຮັບ​ຜິດ​ຊອບ​ສຳ​ລັບ​ການ​ແຈກ​ຢາຍ​ການ​ຊ່ວຍ​ເຫຼືອ, ໄດ້​ໂຈະ​ການ​ນຳ​ສົ່ງ​ຂອງ​ເຂົາ​ເຈົ້າ​ຊົ່ວ​ຄາວ ນັບ​ຕັ້ງ​ແຕ່​ການ​ໂຈມ​ຕີ​ດ້ວຍ​ຈະຫຼວດ​ໃສ່​ສາງ​ຂອງ​ເຂົາ​ເຈົ້າ​ເມື່ອ​ອາ​ທິດ​ແລ້ວນີ້.

ມັນ​ບໍ່​ມີ​ຄວາມ​ກະ​ຈ່າງ​ແຈ້ງ​ໃນ​ທັນ​ທີ​ວ່າ ເວ​ລາ​ໃດ​ໂຄງ​ການ​ອາ​ຫານ​ໂລກ​ຈະ​ສາ​ມາດ​ສືບ​ຕໍ່​ການ​ນຳ​ສົ່ງ​ນັ້ນ.

ທ່ານ​ນາງ ຊິງ ຈາກ​ທຳ​ນຽບ​ຫ້າ​ແຈ​ກ່າ​ວ​ວ່າ, ສຳ​ລັບ​ຕອນນີ້, ສະ​ຫະ​ລັດ ຈະ​ເພັ່ງ​ເລັງ​ໃສ່​ການ​ນຳ​ເອົາ​ການ​ຊ່ວຍ​ເຫຼືອ​ເພີ່ມ​ເຕີມ​ຈາກ​ປະ​ເທດ ໄຊ​ປ​ຣັ​ສ ໄປ​ຂົວທ່າ​ເຮືອ​ຊົ່ວ​ຄາວ​ນັ້ນ ແລະ ເອົາ​ເຂົ້າ​ໄປ​ໃນ ກາ​ຊາ ສະ​ນັ້ນ​ມັນ​ຈະ​ຢູ່​ທີ່​ນັ້ນ ແລະ ພ້ອມ​ເມື່ອ​ການ​ນຳ​ສົ່ງ​ສືບ​ຕໍ່​ໄປ.

​ຂົວທ່າ​ເຮືອ​ຊົ່ວ​ຄາວ​ດັ່ງ​ກ່າວ, ທີ່ຖືກ​ອອກ​ມາ​ແບບ​ມາ​ເປັນ​ອີກ​ທາງ​ນຶ່ງ​ທີ່​ຈະ​ນຳ​ເອົາ​ການ​ຊ່ວຍ​ເຫຼືອ​ເຂົ້າ​ໄປ​ໃນ ກາ​ຊາ, ໄດ້​ເຊື່ອມ​ຈອດ​ກັບ​ຫາດ​ຊາຍ ກາ​ຊາ ຄືນ​ເມື່ອບໍ່​ດົນ​ມານີ້ ຫຼັງ​ຈາກ​ມັນ​ໄດ້​ຫັກ​ຍ້ອນ​ພາ​ຍຸ​ໃນ​ເດືອນ​ພຶດ​ສະ​ພາ​ທີ່​ຜ່ານ​ມາ.

ອົງ​ການ​ສະ​ຫະ​ປະ​ຊາ​ຊາດ​ເປັນ​ຜູ້​ຄວບ​ຄຸມ​ການ​ຮັບ​ການ​ເອົາ​ການ​ຂົນ​ສົ່ງ ແລະ ເປັນ​ຜູ້​ປະ​ສານ​ງານ​ການ​ແຈກ​ຢາຍ​ຢູ່​ພື້ນ​ດິນ. ການ​ຈັດ​ແຈ​ງ​ນັ້ນ​ແມ່ນ​ພາກ​ສ່ວນ​ນຶ່ງ​ຂອງ​ຄວາມ​ພະ​ຍາ​ຍາມ​ທີ່​ຈະ​ຂະ​ຫຍາຍ​ສິ່ງ​ທີ່​ອົງ​ການ​ມະ​ນຸດ​ສະ​ທຳ​ເວົ້າ​ແມ່ນ​ການ​ຊ່ວຍ​ເຫຼືອ​ຈຳ​ນວນ​ທີ່ບໍ່​ພຽງ​ພໍ​ຢ່າງຫຼວງຫຼາຍ​ສຳ​ລັບ​ພົນ​ລະ​ເຮືອນ ປາ​ແລັ​ສ​ໄຕ​ນ໌.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG