ກຸ່ມປົກປ້ອງສິດທີ່ມະນຸດທີ່ສຳຄັນກຸ່ມນຶ່ງ ໄດ້ຮຽກຮ້ອງໃຫ້ສະພາ
ຄວາມໝັ້ນຄົງອົງການສະຫະປະຊາຊາດ ອອກຄຳສັ່ງຫ້າມບໍ່ໃຫ້
ຂາຍອາວຸດ ແກ່ລັດຖະບານຊີເຣຍ ຫລັງຈາກການໂຈມຕີທາງ
ອາກາດ ໃນສັບປະດາແລ້ວນີ້ ທີ່ໄດ້ສັງຫານ ພົນລະເຮືອນສິບ
ກວ່າຄົນ ໃກ້ໆກັບນະຄອນຫຼວງ Damascus.
ໃນຖະແຫຼງການສະບັບນຶ່ງ ທີ່ອອກໃນວັນພະຫັດມື້ນີ້ ກຸ່ມປົກ
ປ້ອງສິດທີ່ມະນຸດ Human Rights Watch ຫຼື HRW ກ່າວວ່າ
ຕົນໄດ້ໂອ້ລົມກັບພວກທີ່ເຫັນເຫດການ 4 ຄົນ ທີ່ໄດ້ກ່າວວ່າ
ບໍ່ມີເປົ້າໝາຍທາງທະຫານໃດໆ ໃກ້ໆເມືອງ Douma ທີ່ພວກ
ຕໍ່ຕ້ານລັດຖະ ບານຄວບຄຸມຢູ່ບ່ອນທີ່ການໂຈມຕີທາງອາກາດ ໃນວັນທີ 16 ສິງຫາ ຜ່ານ
ມານີ້ ທີ່ໄດ້ສັງຫານຢ່າງນ້ອຍ 112 ຄົນ ຊຶ່ງສ່ວນໃຫຍ່ແມ່ນພົນລະເຮືອນ. ກຸ່ມດັ່ງກ່າວຍັງກ່າວວ່າ ຄ້າຍທະຫານ ຫຼື ເຂດ ແນວໜ້າທີ່ໃກ້ສຸດ ແມ່ນຢູ່ໄກອອກໄປ ຢ່າງນ້ອຍ 2 ກິໂລແມັດ.
ຮອງຜູ້ອຳນວຍການຂອງກຸ່ມ HRW ປະຈຳພາກຕາເວັນອອກກາງ ທ່ານ Nadim Houry ກ່າວວ່າ “ການຖິ້ມລະເບີດໃສ່ຕະຫຼາດທີ່ເຕັມໄປດ້ວຍຜູ້ຄົນຈັບຈ່າຍໃຊ້ສອຍ ແລະພໍ່ຄ້າຊາວຂາຍ ໃນຕອນກາງວັນແສກໆນີ້ ແມ່ນສະແດງໃຫ້ເຫັນເຖິງການທີ່ລັດຖະບານຊີເຣຍ ບໍ່ໄດ້ເອົາຫົວຊາທີ່ໜ້າຕື່ນຕົກໃຈຕໍ່ປະຊາຊົນ. ການສັງຫານຄັ້ງຫຼ້າສຸດນີ້ ແມ່ນເປັນການຍ້ຳເຕືອນອີກຄັ້ງນຶ່ງ ຖ້າວ່າ ຄັ້ງໃດຄັ້ງນຶ່ງນັ້ນແມ່ນຍັງມີຄວາມຈຳເປັນອີກ ກ່ຽວກັບຄວາມຈຳເປັນ
ຢ່າງ ຮີບດ່ວນຂອງສະພາຄວາມໝັ້ນຄົງອົງການສະຫະປະຊາຊາດ ທີ່ຈະເອົາບາດກ້າວຢ່າງແຂງຂັນ ຕໍ່ມະຕິສະບັບກ່ອນໆ ແລະເອົາບາດກ້າວ ເພື່ອຍຸຕິການໂຈມຕີ ທີ່ບໍ່ຈຳແນກນັ້ນ.”
ພວກທີ່ເຫັນ ເຫດການກ່າວວ່າ ລັດຖະບານໄດ້ຖິ້ມລະເບີດ ໃສ່ຕະຫຼາດທີ່ແອອັດໄປດ້ວຍຜູ້ຄົນແລະຄຸ້ມທີ່ປະຊາຊົນອາໄສຢູ່ໃນເມືອງ Douma ບ່ອນທີ່ພວກນັກລົບຕໍ່ຕ້ານລັດຖະ
ບານໄດ້ຍິງຕໍ່ສູ້ກັນເປັນປະຈຳ ກັບກອງກຳລັງທະຫານລັດຖະບານຊີເຣຍ ທ່າມກາງສົງຄາມກາງເມືອງ ຊຶ່ງຍ່າງເຂົ້າປີທີ 5 ແລ້ວ.
ທ່ານ Stephen O’Brien ຫົວໜ້າດ້ານມະນຸດສະທຳ ຂອງອົງການສະຫະປະຊາຊາດ
ຊຶ່ງຫາກໍສິ້ນສຸດການຢ້ຽມຢາມຊີເຣຍ ເປັນເວລາ 3 ມື້ ໃນຕົ້ນອາທິດນີ້ ເອີ້ນເຫດລະເບີດ
ຄັ້ງນີ້ວ່າ “ໜ້າຕື່ນຕົກໃຈ” ແລະ “ຮັບເອົາບໍ່ໄດ້.” ທ່ານ Jeffrey Feltman ຫົວໜ້າດ້ານ
ການເມືອງ ຂອງສະຫະປະຊາຊາດ ກ່າວເຖິງເຫດການນີ້ວ່າ “ແມ່ນການກໍ່ອາຊະຍາກຳສົງຄາມ.”
ຊີເຣຍ ຍັງບໍ່ໄດ້ໃຫ້ຄວາມເຫັນໃດໆໃນການໂຈມຕີຄັ້ງນີ້ ຍົກເວັ້ນການຕຳນິຕິຕຽນເຈົ້າໜ້າທີ່ຂອງອົງການສະຫະປະຊາຊາດ ທີ່ອອກຄວາມເຫັນກ່ຽວກັບເຫດການດັ່ງກ່າວ.
