ພວກແຮງງານກຳປູເຈຍກຳລັງພາກັນກັບຄືນໄປຍັງໄທ ຫຼັງຈາກ
ໄດ້ອົບພະຍົບໜີຢ່າງຂະໜານໃຫຍ່ໃນຮອບ 6 ສັບປະດາຜ່ານມາ
ຊຶ່ງກະປະມານວ່າມີ 2 ແສນຄົນ ພາກັນຫລັ່ງໄຫລ ກັບຄືນບ້ານ
ເກີດເມືອງນອນຂອງເຂົາເຈົ້າ ຍ້ອນມີຄວາມຢ້ານກົວ ຂ່າວຊ່າລື
ທີ່ວ່າ ລັດຖະບານໄທ ຈະທຳການປາບປາມພວກແຮງງານຕ່າງ
ດ້າວນັ້ນ.
ທີ່ນະຄອນຫຼວງພະນົມເປັນ ທ່ານ Hor Namhong ລັດຖະມົນ
ຕີຕ່າງປະເທດກຳປູເຈຍ ກ່າວຕໍ່ຄູ່ຕຳແໜ່ງຈາກໄທ ທີ່ກຳລັງທຳ
ການຢ້ຽມຢາມກຳປູເຈຍວ່າ ມີພວກແຮງງານກຳປູເຈຍຢ່າງໜ້ອຍ
10 ພັນຄົນກຳລັງຂໍວີຊາ ພາຍໃຕ້ການດຳເນີນຂັ້ນຕອນ ທີ່ປັບປຸງໃໝ່. ມີພວກແຮງງານຫຼາຍຄົນແລ້ວ ໄດ້ກັບຄືນໄປໄທ.
ທ່ານສີຫາສັກ ພວງເກດແກ້ວ ລັດຖະມົນຕີຮັກສາການ ກະຊວງການຕ່າງປະເທດໄທ
ກ່າວວ່າ ພວກຊາວກຳປູເຈຍ ຈະສາມາດໄດ້ຮັບວີຊາຂໍເຮັດວຽກເຮັດການໄດ້ພາຍໃນ
ນຶ່ງມື້ ຈັດການໂດຍພວກສູນລົງທະບຽນແຮງງານເລາະຊາຍແດນນັ້ນ.
ໃນສັບປະດາແລ້ວນີ້ ກຳປູເຈຍປະກາດເກັບຄ່າທຳນຽມທີ່ຕໍ່າລົງສຳລັບໜັງສືຜ່ານແດນ
ແລະເອກະສານອື່ນໆເພື່ອເຂົ້າໄປໃນໄທນັ້ນ.
ມີຂ່າວຊ່າລືຕ່າງໆ ວ່າພວກເຈົ້າໜ້າທີ່ໄທ ໄດ້ໃຊ້ອຳນາດເກີນຂອບເຂດແລະທຳການ
ຈັບກຸມພວກແຮງງານຕ່າງດ້າວໃນເດືອນແລ້ວນີ້ ຊຶ່ງໄດ້ກະຕຸ້ນໃຫ້ພວກຊາວກຳປູເຈຍ
ອົບພະຍົບກັບຄືນປະເທດຄັ້ງໃຫຍ່. ແຕ່ລັດຖະບານໄທ ຊຶ່ງໄດ້ກໍ່ລັດຖະປະຫານໃນທ້າຍ
ເດືອນພຶດສະພາຜ່ານມານັ້ນ ປະຕິເສດຕໍ່ຂ່າວທີ່ວ່າ ມີການຂັບໄລ່ພວກແຮງງານອອກ
ຈາກປະເທດນັ້ນ.
