ດ້ວຍປະຕິບັດການເພື່ອເກັບມ້ຽນຊາກຫັກພັງທີ່ເປັນເຫຼັກຫຼາຍພັນໂຕນ ຈາກຂົວທີ່ໄດ້ພັງລົງໃນທ່າເຮືອ ບອລຕິມໍ ກຳລັງດຳເນີນງານຢູ່, ຜູ້ປົກຄອງລັດ ແມຣີແລນ ທ່ານ ເວັສ ມົວ ໃນວັນອາທິດວານນີ້ ໄດ້ຮຽກຮ້ອງຕໍ່ພັກຣີພັບບລິກັນ ໃຫ້ເຮັດວຽກກັບພັກເດໂມແຄຣັດ ເພື່ອອະນຸມັດທຶນລັດຖະບານກາງທີ່ຕ້ອງການ ເພື່ອສ້າງຂົວຄືນໃໝ່ ແລະ ເພື່ອນຳເອົາເສດຖະກິດຂອງທ່າເຮືອດັ່ງກ່າວ ກັບຄືນມາດຳເນີນງານອີກ.
ຂົວ ແຟຣນຊິສ ສກັອດ ຄີ ຂອງນະຄອນ ບອລຕິມໍ ໄດ້ພັງລົງເມື່ອຕອນເຊົ້າວັນອັງຄານທີ່ຜ່ານມາ, ເຮັດໃຫ້ກຳມະກອນສ້ອມແປງຖະໜົນ 6 ຄົນເສຍຊີວິດ, ເວລາທີ່ກຳປັ່ນບັນທຸກຕູ້ສິນຄ້າຂະໜາດເທົ່າກັບຫໍ ໄອເຟລ໌ ໄດ້ສູນເສຍພະລັງງານ ແລະ ຕຳເຂົ້າໃສ່ເສົາຄ້ຳຂົວ. ຊິ້ນສ່ວນຂອງຂົວສ່ວນຫຼາຍໄດ້ຕົກລົງໃສ່ແມ່ນ້ຳ ພາແທັບສໂຄ, ກີດກັ້ນຊ່ອງທາງການຂົນສົ່ງຂອງທ່າເຮືອນະຄອນ ບອລຕິມໍ ນັ້ນ.
ລັດຖະບານທ່ານ ໄບເດັນ ໄດ້ປະກາດການຊ່ວຍເຫຼືອສຸກເສີນໃນເບື້ອງຕົ້ນ 60 ລ້ານໂດລາ ເມື່ອວັນພະຫັດແລ້ວນີ້ ເພື່ອຊ່ວຍເຫຼືອໃນການເກັບກູ້ຊາກຫັກພັງຂອງຂົວ ແລະ ເປີດທ່າເຮືອດັ່ງກ່າວຄືນ, ເຊິ່ງແມ່ນທ່າເຮືອທີ່ໃຫຍ່ທີ່ສຸດໃນ ສະຫະລັດ ສຳລັບ “ການຂົນຂຶ້ນຂົນລົງ” ລົດຍົນທີ່ຖືກນຳເຂົ້າ ແລະ ສົ່ງອອກອຸປະກອນການກະເສດ ແລະການກໍ່ສ້າງ. ທ່າເຮືອນັ້ນຖືກປິດນັບຕັ້ງແຕ່ວັນອັງຄານເປັນຕົ້ນມາ, ເຮັດໃຫ້ວຽກງານຂອງປະຊາຊົນປະມານ 15,000 ຄົນ ບໍ່ມີຄວາມແນ່ນອນ ຜູ້ທີ່ອາໄສການປະຕິບັດງານໃນແຕ່ລະວັນຂອງເຂົາເຈົ້າ.
ບັນດາເຈົ້າໜ້າທີ່ລັດຖະບານກາງໄດ້ບອກບັນດາສະມາຊິກສະພາ ລັດ ແມຣີແລນ ວ່າ ຄ່າໃຊ້ຈ່າຍສຸດທ້າຍຂອງການສ້າງຂົວຄືນອາດສູງເຖິງຢ່າງໜ້ອຍ 2 ຕື້ໂດລາ, ອີງຕາມລາຍງານຂອງໜັງສືພິມ Roll Call, ທີ່ໄດ້ອ້າງເຖິງແຫຼ່ງຂໍ້ມູນທີ່ຄຸ້ນເຄີຍກັບການສົນທະນານັ້ນ.
ຟໍຣັມສະແດງຄວາມຄິດເຫັນ