ໂຄສົກປະຈໍາສະຖານທູດສະຫະລັດໃນອັຟການິສຖານກ່າວວ່າ ຄົນອາເມຣິກັນຄົນນຶ່ງເສຍຊີວິດ ແລະອີກຄົນນຶ່ງໄດ້ຮັບບາດເຈັບໃນເຫດການຍິງກັນຢູ່ບໍລິເວນຕຶກຫລັງນຶ່ງທີ່ອົງການສືບລັບ CIA ຂອງສະຫະລັດໃຊ້ເປັນໂຮງການ.
ໂຄສົກກ່າວໃນວັນຈັນມື້ນີ້ວ່າ ພະນັກງານອັຟການິສຖານຄົນນຶ່ງທີ່ເຮັດ ວຽກໃຫ້ລັດຖະບານສະຫະລັດ ເປັນຜູ້ທໍາການໂຈມຕີດັ່ງກ່າວໃນຕອນແລງວັນອາທິດວານນີ້ໃນກຸງຄາບູລ ແລະວ່າຜູ້ທໍາການໂຈມຕີໄດ້ຖືກຍິງຕາຍ.
ບັນດາເຈົ້າໜ້າທີ່ບໍ່ໄດ້ແຈ້ງເຫດຜົນຂອງການໂຈມຕີໃຫ້ຊາບ ແລະເວລານີ້ ຍັງບໍ່ມີບຸກຄົນໃດອ້າງເອົາຄວາມຮັບຜິດຊອບເທື່ອ.
ຄົນອາເມຣິກັນທີ່ໄດ້ຮັບບາດເຈັບໄດ້ຖືກນໍາໄປປິ່ນປົວບາດແຜທີ່ໂຮງໝໍ ແຕ່ບໍ່ມີອາການສາຫັດເຖິງຂັ້ນເປັນອັນຕະລາຍຕໍ່ຊີວິດແຕ່ຢ່າງໃດ.
ເຫດການດັ່ງກ່າວເກີດຂຶ້ນໃນເວລາບໍ່ຮອດ 2 ອາທິດ ຫລັງຈາກພວກຫົວຮຸນແຮງໄດ້ທໍາການໂຈມຕີທີ່ມີການປະສານງານກັນ ຕໍ່ຫລາຍເປົ້າໝາຍທີ່ສໍາຄັນໃນນະຄອນຫລວງຄາບູລ ຮວມທັງສະຖານທູດສະຫະລັດ ແລະກອງບັນຊາການກຸ່ມເນໂຕ້ ຊຶ່ງເຮັດໃຫ້ 9 ຄົນເສຍຊີວິດໃນການຕໍ່ສູ້ກັນເປັນເວລາເກືອບນຶ່ງມື້ເຕັມນັ້ນ.
ໃນການໂຈມຕີອີກບັ້ນນຶ່ງໃນວັນອາທິດວານນີ້ ຜູ້ວາງລະເບີດສະລະຊີບໄດ້ຈູດວັດຖຸລະເບີດໂຕເອງຕາຍ ຢູ່ນອກກອງບັນຊາການຕໍາຫລວດປະຈໍາທ້ອງຖິ່ນແຫ່ງນຶ່ງໃນແຂວງ Paktika ໃນພາກຕາເວັນອອກຂອງປະເທດ ເຮັດໃຫ້ຕໍາຫລວດ 2 ຄົນເສຍຊີວິດ ແລະພົນລະເຮຶອນ 2 ຄົນ ໄດ້ຮັບບາດເຈັບ.
