ທີ່ອັຟການິສຖານ ເຈົ້າໜ້າທີ່ກ່າວວ່າ ໄດ້ມີການໂຈມຕີໂດຍຄົນວາງລະເບີດສະຫລະຊີບ ທີ່ສົ່ງຜົນໃຫ້ຢ່າງນ້ອຍ 3 ຄົນເສຍຊີວິດໃນນະຄອນຫລວງກາບູລ ເຖິງແມ່ນໄດ້ມີການຮັກສາຄວາມປອດໄພຢ່າງເຄ່ງຄັດກໍຕາມ ລ່ວງໜ້າກອງປະຊຸມນາໆຊາດຄັ້ງສຳຄັນກ່ຽວກັບອະນາຄົດຂອງອັຟການິສຖານ. ເຈົ້າໜ້າທີ່ກ່າວອີກວ່າ ມີຢ່າງນ້ອຍ 35 ຄົນໄດ້ຮັບບາດເຈັບໃນເຫດລະເບີດທີ່ນະຄອນຫລວງກາບູລ ໃນວັນອາທິດມື້ນີ້.
ເມືອງຫລວງຂອງອັຟການິສຖານກຳລັງກຽມຈະເປັນເຈົ້າພາບ ຈັດກອງ ປະຊຸມຄັ້ງໃຫຍ່ຂອງພວກປະເທດພາຄີຂອງອັຟການິສຖານ ໃນວັນອັງ ຄານອາທິດໜ້ານີ້ ຊຶ່ງໃນກອງປະຊຸມທີ່ວ່ານີ້ ລັດຖະບານອັຟການິສ ຖານຈະນຳສະເໜີແຜນການຂອງຕົນສຳລັບອະນາຄົດຂອງປະເທດ.
ທີ່ແຂວງ Farah ທາງພາກຕາເວັນຕົກຂອງອັຟການິສຖານໃນວັນອາ ທິດມື້ນີ້ ພວກກອງໂຈນຕາລີບານໄດ້ທຳການບຸກໂຈມຕີສະຖານີຕຳ ຫລວດ 4 ແຫ່ງຕິດຕໍ່ກັນ ແລະພ້ອມດຽວກັນກໍທຳການລະເບີດທາງເຂົ້າຄຸກເມືອງ Farah ໃນຕອນທີ່ຕຳຫລວດພາກັນໄປຟ້າວຟັ່ງໄປຍັງສະຖານີຕຳຫລວດບ່ອນຖືກໂຈມຕີ ຊຶ່ງການລະເບີດທາງເຂົ້າຄຸກຄັ້ງນີ້ ສົ່ງຜົນໃຫ້ນັກໂທດຫລົບໜີອອກຈາກຄຸກໄປໄດ້ 23 ຄົນ.
