ພວກເຈົ້າໜ້າທີ່ອັຟການີສຖານກ່າວວ່າ ມີຜູ້ເສຍຊີວິດຢ່າງໜ້ອຍ 48 ຄົນ ຮວມທັງແມ່ຍິງ
ແລະເດັກນ້ອຍໃນການໂຈມຕີດ້ວຍລະເບີດສະຫລະຊີບບັ້ນນຶ່ງທີ່ວັດ Shi’ite ແຫ່ງນຶ່ງ ໃນ
ໃຈກາງເມືອງກາບູລ.
ເຈົ້າໜ້າທີ່ກ່າວວ່າມືລະເບີດສະຫລະຊີບໄດ້ບີບຂະນວນລະເບີດໃຫ້ແຕກຂຶ້ນຢູ່ໄກ້ວັດ Abu
Fazel ໃນຂະນະທີ່ພວກສະແຫວງບຸນໄດ້ເຕົ້າໂຮມກັນເມື່ອວັນອັງຄານມື້ນີ້ ເພື່ອສະເຫລີມ
ສະຫລອງງານບຸນ Ashura ຂອງພວກນິກາຍ Shi’ite. ນອກນັ້ນຍັງມີຜູ້ໄດ້ຮັບບາດເຈັບ
ຫຼາຍກວ່າ 100 ຄົນ ຈາກເຫດລະເບີດດັ່ງກ່າວ.
ພວກທີ່ເຫັນເຫດການກ່າວວ່າ ມີພວກຄົນເຈັບເປັນຈຳນວນຫຼວງຫຼາຍໄດ້ ຖືກສົ່ງໄປຍັງໂຮງ
ໝໍບາງແຫ່ງຢູ່ໃນຂົງເຂດ.
ເຈົ້າໜ້າທີ່ກ່າວວ່າ ເປັນທີ່ຄາດກັນວ່າໂຕເລກຂອງພວກທີ່ບາດເຈັບລົ້ມຕາຍອາດຈະເພີ່ມຈຳ
ນວນຂຶ້ນ.
ໃນຂະນະດຽວກັນ ພວກເຈົ້າໜ້າທີ່ກ່າວວ່າ ເຫດລະເບີດລູກທີ່ສອງ ໄດ້ແນເປົ້າໝາຍໃສ່ວັດ
ທີ່ເມືອງ Mazar-e-Sharif ທາງພາກເໜືອຂອງປະເທດທີ່ໄດ້ສັງຫານສີ່ຄົນ ແຕ່ຍັງບໍ່ເປັນ
ທີ່ແຈ້ງຂາວວ່າພວກ Shi’ite ເປັນເປົ້າໝາຍຂອງລະເບີດລູກທີ່ສອງນີ້ຫລືບໍ່
ເວລານີ້ຍັງບໍ່ມີຝ່າຍໃດອ້າງເອົາຄວາມຮັບຜິດຊອບໂດຍທັນທີໃນການໂຈມຕີດ້ວຍລະເບີດ
ທັງສອງບັ້ນດັ່ງກ່າວນີ້.
ງານບຸນສິບວັນທີ່ໄດ້ດໍາເນີນມາຈົນເຖິງວັນອັງຄານມື້ນີ້ ຊຶ່ງມີຄົນເຂົ້າຮ່ວມຢ່າງໜາແໜ້ນນັ້ນ
ຖືວ່າເປັນວັນພັກທີ່ສໍາຄັນທີ່ສຸດຂອງພວກມຸສລິມນິກາຍ Shi’ite ຊຶ່ງງານບຸນດັ່ງກ່າວນີ້
ເປັນຂີດໝາຍຂອງການເປັນນັກບຸນຫຼືຜູ້ສັກສິດຂອງພະອີໝຳ Hussein ທີ່ເປັນຫລານ
ຊາຍຂອງພະສາສະດາໂມຮັມມັດ.
ປະທານາທິບໍດີອັຟການິສຖານ ທ່ານ Hamid Karzai ໄດ້ປະນາມການ ໂຈມຕີໃນທັນທີ
ໂດຍເວົ້າວ່າ ມັນເປັນເທື່ອທຳອິດທີ່ການໂຈມຕີຂອງພວກກໍ່ການຮ້າຍໄດ້ມີຂຶ້ນໃນວັນສຳຄັນ ທາງສາສະໜາຢູ່ໃນອັຟການິສຖານ.
