ກໍາລັງພັນທະມິດນາໆຊາດໃນອັຟການີສຖານກ່າວວ່າ ທະຫານຂອງຕົນ 5 ຄົນເສຍຊີວິດ
ຍ້ອນລະເບີດແຄມທາງໃນເຂດນຶ່ງທາງພາກໃຕ້ຂອງອັຟການີສຖານ.
ກອງກໍາລັງຊ່ອຍເຫລືອຮັກສາຄວາມປອດໄພນາໆຊາດຫລື ISAF ກ່າວວ່າ ພວກທະຫານ
ເຫລົ່ານີ້ເສຍຊີວິດຍ້ອນວັດຖຸລະເບີດທີ່ພວກກະບົດເຮັດເອົາເອງ ແລະຫ້າງໄວ້ແຄມທາງໃນ
ວັນພະຫັດມື້ນີ້ ແຕ່ບໍ່ໄດ້ໃຫ້ລາຍລະອຽດ.
ການໂຈມຕີດັ່ງກ່າວມີຂຶ້ນໃນເວລາບໍ່ຮອດ 1 ສັບປະດາຫລັງຈາກພວກທະຫານອະເມລິກັນ
30 ຄົນແລະທະຫານອັຟການີສຖານ 8 ຄົນເສຍ ຊີວິດເວລາເຮືອບິນເຮລີຄອບເຕີກອງທັບ
ບົກລຸ່ນ CH-47 ຕົກລົງ ຫລັງຈາກຖືກຍິງໂດຍພວກກະບົດຕາລີບັນນັ້ນ.
ໃນວັນພຸດວານນີ້ ຜູ້ບັນຊາການກອງກໍາລັງສະຫະລັດແລະເນໂຕ້ໃນອັຟການີສຖານ ນາຍ
ພົນ John Allen ກ່າວວ່າ ຝ່າຍພັນທະມິດໄດ້ທໍາການໂຈມຕີທາງອາກາດຢ່າງແມ່ນຢໍາໃນ
ມື້ວານນີ້ ແລະໄດ້ສັງຫານພວກນັກຕໍ່ສູ້ຫົວຮຸນແຮງຂອງກຸ່ມຕາລີບັນໄປຫລາຍຄົນ ຮວມ
ທັງກະບົດຜູ້ທີ່ຍິງເຮືອບິນເຮລີຄອບເຕີສະຫະລັດລໍານັ້ນຕົກນໍາດ້ວຍ.
ແຕ່ພວກເຈົ້າໜ້າທີ່ຕາລີບັນໄດ້ປະຕິເສດໃນວັນພະຫັດມື້ນີ້ ຕໍ່ລາຍງານຂ່າວທີ່ວ່າ ນັກຕໍ່ສູ້
ຂອງຕົນທີ່ເປັນຜູ້ຍິງເຮືອບິນເຮລີຄອບເຕີຕົກ ໄດ້ຖືກຂ້າຕາຍນັ້ນ ໂດຍກ່າວວ່າ ເວລານີ້
ຜູ້ກ່ຽວກໍາລັງຫຍຸ້ງຢູ່ກັບການໄປປະຕິບັດພາລະກິດສັກສິດ ຫລື jihad ຢູ່ບ່ອນອື່ນ.
ໃນເຫດເຮືອບິນເຮລີຄອບເຕີຖືກຍິງຕົກໃນວັນເສົາຜ່ານມານັ້ນ ທະຫານ NAVY SEALS
ເສຍຊີວິດໄປ 17 ຄົນ ພ້ອມທັງທະຫານໝ່ວຍລົບພິເສດກອງທັບເຮືອ 5 ຄົນ ທະຫານ
ອາກາດ 3 ຄົນ ແລະທະຫານບົກ 5 ຄົນ. ລາຍງານຂ່າວກ່ອນໜ້ານັ້ນກ່າວວ່າ ທະຫານ
NAVY SEALS 22 ຄົນເສຍຊີວິດ.
ນັບວ່າເປັນການສູນເສຍຊີວິດຄັ້ງຮ້າຍແຮງທີ່ສຸດສໍາລັບສະຫະລັດ ໃນເຫດການຄັ້ງດຽວ
ໃນສົງຄາມທີ່ໄດ້ດໍາເນີນມາເປັນເວລາ 10 ປີ ໃນອັຟການີສຖານນັ້ນ.
