ເຈົ້າໜ້າທີ່ທ້ອງຖິ່ນຄົນນຶ່ງກ່າວວ່າ ທະຫານຂອງອັຟການີສຖານ ແລະເນໂຕ້ ໄດ້ສັງຫານກຸ່ມຕາລິບານຢ່າງໜ້ອຍ 50 ຄົນ ທີ່ໄດ້ທໍາການໂຈມຕີຄ້າຍທະຫານແຫ່ງນຶ່ງ ໃກ້ຊາຍແດນຕິດກັບປາກີສຖານ.
ໂຄສົກຂອງເຈົ້າແຂວງໆ Paktika ເວົ້າວ່າ ກໍາລັງປະສົມອັຟການີສຖານ ແລະເນໂຕ້ ໄດ້ຕອບໂຕ້ຄືນໃນຕອນບ່າຍວັນເສົາຜ່ານມາ ເວລາກຸ່ມຫົວ ຮຸນແຮງ ຈໍານວນຫລາຍຄົນ ກຸ່ມນຶ່ງໄດ້ໂຈມຕີຄ້າຍທະຫານດັ່ງກ່າວ.
ກຸ່ມເນໂຕ້ໄດ້ໃຫ້ການຢືນຢັນວ່າ ການໂຈມຕີບັ້ນດັ່ງກ່າວແມ່ນເກີດຂຶ້ນແທ້ ແລະວ່າ ຍົນຂອງພວກກໍາລັງປະສົມໄດ້ຊ່ວຍສູ້ລົບກັບພວກຫົວຮຸນແຮງ ແຕ່ບໍ່ຍອມບອກວ່າ ພວກຫົວຮຸນແຮງຖືກສັງຫານຈັກຄົນ.
ໃນຕອນເຊົ້າຂອງວັນອັງຄານວານນີ້ ກະຊວງປ້ອງກັນປະເທດອອສເຕຣ ເລຍເວົ້າວ່າ ທະຫານອັຟການີສຖານຄົນນຶ່ງໄດ້ຍິງແລະເຮັດໃຫ້ທະຫານອອສເຕຣເລຍສາມຄົນ ບາດເຈັບສາຫັດ ຢູ່ທີ່ຄ້າຍທະຫານແຫ່ງນຶ່ງທາງພາກໃຕ້ຂອງອັຟການີສຖານ.
ພວກເຈົ້າໜ້າທີ່ກ່າວວ່າ ທະຫານອັຟການີສຖານຄົນນັ້ນຖືອາວຸດອັດຕະໂນມັດ ແລະປືນຍິງລະເບີດ ເວລາຜູ້ກ່ຽວລະດົມຍິງໃສ່ຄ້າຍດັ່ງກ່າວ ທີ່ແຂວງ Uruzgan. ການໂຈມຕີບັ້ນນີ້ໄດ້ຍັງຜົນ ໃຫ້ທະຫານອັຟການີສຖານສອງຄົນບາດເຈັບ ເຊ່ນກັນ.
