​ຖານ​ທັບ​ອາກາດ​​ສະຫະລັດ ຖືກໂຈມຕີໃນ ອັຟການິສຖານ

ເຈົ້າ​ໜ້າທີ່ອົງການ NATO ກ່າວ​ວ່າ ພວກ​ຫົວ​ຮຸນ​ແຮງໃນອັຟກາ​ນິນ​ຖານ​ໄດ້​ຍິງ​ຈະ​ຫຼວດ​ໂຈມ​ຕີ​ຖານ​ທັບ​ອາກາດແຫ່ງ​ນຶ່ງຂອງສະຫະລັດ ​ໃນ​ອັຟກາ​ນິສຖານ ​ໃນ​ຕອນ​ເຊົ້າ​ຂອງ​ວັນ​ອັງຄານມື້ນີ້ ​ຊຶ່ງ​ໄດ້​ສ້າງ​ຄວາມ​ເສຍ​ຫາຍ​ໃຫ້​ແກ່ເຮືອບິນລຳ​ນຶ່ງ​ທີ່ໃຊ້​ໂດຍ​ຜູ້​ບັນຊາ​ການ​ທ​ະຫານ​ສະຫະລັດ.

ປະທານ​ເສນາ​ທິການ​ຮ່ວ​ມ ຂອງ​ກອງ​ທັບ​ສະຫະລັດ ນາຍ​ພົນ Martin Dempsey ບໍ່​ໄດ້​ຢູ່​ໃນ​ເຮືອບິນ​ ໃນ​ເວລາ​ທີ່​ມີ​ການ​ຍິງ​ໂຈມ​ຕີ. ຕໍ່​ມາທ່ານ​ໄດ້ເດີນ ທາງອອກ​ຈາກ​ຖານ​ທັບ​ແຫ່ງ​ນັ້ນໂດຍໄຊ້​ເຮືອ​ບິນ​ລໍາ​ໃໝ່. ການ​ໂຈມຕີ​ເຮັດ​ໃຫ້​ພະນັກງານພາກພື້ນດິນສອງຄົນ ໄດ້​ຮັບ​ບາດເຈັບນ້ອຍ​ນຶ່ງ.

ການ​ຍິງໂຈມ​ຕີແບບ​ກະ​ຈັດກະ​ຈ​າຍບໍ່​ເປັນ​ທີ່ແປກ​ຫຍັງ​ເລີຍ​ຢູ່​ຖານ​ທັບ Bagram. ​ແຕ່​ວ່າພວກ​ກະບົດທາ​ລິ​ບານ ບໍ່​ຄ່ອຍ​ສ້າງ​ຄວ​າມ​ເສຍ​ຫາຍ ຫລື ​ເຮັດ​ໃຫ້​ມີ​ການ​ບາດ​ເຈັບ​ຮ້າຍ​ແຮງ​ແຕ່ຢ່າງໃດຢູ່​ທີ່ຖານ​ທັບ​ ຊຶ່ງ​ຕັ້ງຢູ່​ທາງ​ທິດ​ເໜືອ​ຂອງ​ນະຄອນ ຫຼວງ Kabul ນັ້ນ​.

​ໂຄສົກອົງການ NOTA ກ່າວ​ວ່າ ການ​ໂຈມ​ຕີ​ບໍ່​ໄດ້ຂົ່ມ​ຂູ່​ຕໍ່​ຄວາມ​ປອດ​ໄພ​ຂອງ ນາຍ​ພົນ Dempsey ຫລື​ພະນັກງານ​ຂອງ​ທ່ານ ຜູ້​ທີ່​ເຂົາ​ເຈົ້າ​ກ່າວວ່າ “ບໍ່​ໄດ້​ຢູ່ໃກ້” ​ເຮືອບິນ ​

ເວລາລູກ​ຈະ​ຫຼວດຕົກລົງໃສ່​ ​ໃກ້​ກັບ​ບ່ອນ​ເຮືອບິນ​ຈອດ​ຢູ່ນັ້ນ.
ນາຍ​ພົນ Dempsey ​ໄດ້​ເດີນທາງໄປ​ເຖິງ​ອັຟກາ​ນິສຖານ ​ໃນ​ວັນ​ຈັນວານ​ນີ້ ​ເພື່ອ​ຫາລືກັບບັນດາຜູ້​ບັນຊາ​ການຂອງ​ອົງການ NATO ​ແລະອັຟກາ​ນິສຖານ ທີ່​ເນັ້ນ​ໜັກ​ໃສ່ການ​ສັງຫານ​ທະຫານ​ຕ່າງປະ​ເທດ ທີ່​ມີມາ​ເປັນ​ລຳດັບຫວ່າງ​ມໍ່ໆ​ມາ​ນີ້ ໂດຍ​ກໍາລັງ​ຮັກສາ​ຄວາມ​ປອດ​ໄພ​ຂອງອັຟກາ​ນິສຖານ.