ເລຂາທິການໃຫຍ່ອົງການສະຫະປະຊາຊາດທ່ານ Ban Ki-moon ໄດ້ແຕ່ງຕັ້ງໃຫ້ນັກການ
ທູດສະໂລວັກ ທ່ານ Jan Kubis ເປັນຜູ້ຕາງໜ້າພິເສດແລະຫົວໜ້າອົງການສະຫະປະຊາ
ຊາດປະຈຳອັຟການິສຖານ.
ທ່ານ Kubis ຮັບໜ້າທີ່ຕໍ່ຈາກທ່ານ Staffan de Mistura ຈາກສະວີເດັນຊຶ່ງຈະພົ້ນຈາກ
ຕຳແໜ່ງໄປ ໃນວັນທີ 31 ທັນວາປີນີ້.
ໃນຖະແຫຼງການສະບັບນຶ່ງ ທີ່ນຳອອກເຜີຍແຜ່ໃນວັນພຸດວານນີ້ທ່ານ Ban ເວົ້າວ່າ ທ່ານ
ຂໍສະແດງຄວາມຮູ້ບຸນຄຸນຕໍ່ທ່ານ Mistura ໃນການອຸທິດຕົນແລະເປັນຜູ້ນຳພາໃນການປະ ຕິບັດງານຂອງອົງການສະຫະປະຊາຊາດ ຊຶ່ງເປັນບ່ອນປະຈຳການທີ່ທ້າທາຍທີ່ສຸດບ່ອນນຶ່ງ ໃນໄລຍະເວລາທີ່ມີການທ້າທາຍທີ່ສຸດນັ້ນ.
ຖະແຫຼງການເວົ້າວ່າ ທ່ານ Kubis ຊຶ່ງຮັບໜ້າທີ່ເປັນເລຂາທິການບໍລິຫານຂອງຄະນະກຳ
ມາທິການເສດຖະກິດ ສຳລັບເຂດຢູໂຣບຂອງສະຫະປະຊາຊາດ ນັບແຕ່ປີ 2009 ມານັ້ນ
ແມ່ນໄດ້ນຳເອົາປະສົບພະການ ດົນກວ່າ 3 ທົດສະວັດໃນຂົງເຂດວຽກງານທາງດ້ານການ
ທູດ ນະໂຍບາຍການຕ່າງປະເທດແລະຄວາມໝັ້ນຄົງ ຕະຫຼອດທັງຄວາມສຳພັນທາງດ້ານ
ເສດຖະກິດນາໆຊາດຕິດຕົວມານຳ.
ໃນອີກຂ່າວນຶ່ງນັ້ນ ໃນມື້ວັນພຸດວານນີ້ ກຳລັງຮັກສາຄວາມສະຫງົບຮ່ວມອັຟການິສຖານ
ແລະກຳລັງປະສົມ ຈັບໄດ້ພວກຜູ້ນຳຂອງກຸ່ມທາລີບານແລະກຸ່ມຮັກການີຫຼາຍໆຄົນໃນທົ່ວ
ປະເທດ.
ຖະແຫຼງຂ່າວສະບັບນຶ່ງ ຂອງອົງການເນໂຕ້ ແຈ້ງວ່າ ຜູ້ນຳຂອງກຸ່ມທາລີບານນາຍ Wali
Mohammad ແລະພັກພວກອີກ 4 ຄົນໄດ້ຖືກຈັບໃນເຂດເມືອງ Nahr-e Saraj ແຂວງ
Helmand. ນາຍ Mohammad ເປັນຜູ້ຢູ່ເບື້ອງຫຼັງ ການໂຈມຕີສະລະຊີບຫຼາຍໆຄັ້ງແລະ
ການໂຈມຕີອືນໆຕໍ່ພົນເຮືອນໃນເຂດທ້ອງຖິ່ນ. ນອກນັ້ນກຳລັງຮັກສາຄວາມສະຫງົບຍັງຈັບ
ໄດ້ວັດຖຸເຮັດລະເບີດອີກເປັນຈຳນວນຫຼວງຫຼາຍ.
